(ភ្នំពេញ)៖ នៅវេលាម៉ោង១៣៖០០នាទីរសៀល ថ្ងៃទី១០ ខែមករា ឆ្នាំ២០១៨នេះ លោក ថងលូន ស៊ីសូលីត នាយករដ្ឋមន្ដ្រីឡាវ បានមកដល់ ព្រលានយន្តហោះអន្តរជាតិភ្នំពេញហើយ ដើម្បីចូលរួមកិច្ចប្រជុំកំពូលថ្នាក់តំបន់ មេគង្គ-ឡានឆាង លើកទី២ ដែលកម្ពុជាធ្វើជាម្ចាស់ផ្ទះ នៅម៉ោង៤៖០០រសៀល ថ្ងៃទី១០ ខែមករា ឆ្នាំ២០១៨នេះ។
សូមបញ្ជាក់ថា គិតត្រឹមម៉ោង១៣៖០០នាទីរសៀលថ្ងៃនេះ មានមេដឹកនាំនៃប្រទេសមេគង្គ-ឡានឆាងចំនួន៣រូបហើយ បានមកដល់កម្ពុជា ដែល២រូបផ្សេងទៀត រួមមាន៖ ទី១៖ លោក មៀន ស្វេ អនុប្រធានាធិបតីមីយ៉ាន់ម៉ា និ ងទី២៖លោក ង្វៀន សួនហ្វ៊ុក នាយករដ្ឋមន្ដ្រីវៀតណាម។ ចំណែកនាយករដ្ឋមន្រ្តីថៃ នឹងមកដល់១៣៖៤០នាទី និងនាយករដ្ឋមន្រ្តីចិន នឹងមកដល់ម៉ោង ១៤៖៤៥នាទី។
សូមបញ្ជាក់ថា សម្រាប់កិច្ចប្រជុំកំពូលមេគង្គ-ឡានឆាងលើកទី២ នឹងចាប់ផ្តើមឡើងនៅវិមានសន្តិភាព នៅ៤៖០០រសៀលថ្ងៃទី១០ ខែមករា ឆ្នាំ២០១៨នេះ ដោយសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងលោក លី ខឺឈាង នាយករដ្ឋមន្ត្រីចិន ធ្វើជាសហប្រធាន។ កិច្ចប្រជុំនេះ ក៏នឹងមានការអញ្ជើញចូលរួមពី លោក ថងលូន ស៊ីស៊ូលីត នាយករដ្ឋមន្រ្តីឡាវ លោក មិន ស្វេ អនុប្រធានាធិបតីមីយ៉ាន់ម៉ា លោក ប្រាយុទ្ធ ច័ន្ទអូឆា នាយករដ្ឋមន្រ្តីថៃ និង លោក ង្វៀន សួនហ៊្វុក នាយករដ្ឋមន្រ្តីវៀតណាម។
កិច្ចប្រជុំកំពូលថ្នាក់តំបន់នេះ នឹងធ្វើឡើងក្រោមមូលបទ «ទន្លេរបស់យើងដើម្បីសន្តិភាព និងការអភិវឌ្ឍប្រកបដោយចីរភាព»។ ថ្នាក់ដឹកនាំប្រទេសទាំង៦ នៃកិច្ចសហប្រតិបត្តិការមេគង្គ-ឡានឆាង នឹងពិភាក្សាលើបញ្ហាសំខាន់ៗ ដើម្បីអភិវឌ្ឍន៍អនុតំបន់ទន្លេមេគង្គ ផ្តោតជាសំខាន់ទៅលើការតាំងចិត្ត ក្នុងការរក្សាសន្តិភាព ស្ថិរភាព ការអភិវឌ្ឍប្រកបដោយចីរភាព និងវិបុលភាពនៃអនុតំបន់ទន្លេមេគង្គ៕
