តុលាការកំពូល សម្រេចបន្តឃុំខ្លួន លោក គឹម សុខ ក្នុងពន្ធនាគារដដែល ជុំវិញសំណុំរឿងប្តឹងសុំនៅក្រៅឃុំជាលើកទី២
10-01-2018 11:52
(ភ្នំពេញ)៖ បន្ទាប់ពីបញ្ចប់សវនាការ នៅព្រឹកថ្ងៃទី១០ ខែមករា ឆ្នាំ២០១៨ នេះ លោកស្រី គិម សត្ថាវី ប្រធានក្រុមប្រឹក្សាជំនុំជម្រះតុលាការកំពូល សម្រេចបន្តឃុំខ្លួនជនជាប់ចោទ គឹម សុខ ក្នុងពន្ធនាគារដដែល ជុំវិញសំណុំរឿងប្តឹងសុំនៅក្រៅឃុំជាលើកទី២។
លោក គី តិច មេធាវីតំណាងដោយអាណត្តិរបស់ សម្តេចតេជោនាយករដ្ឋមន្ត្រី ដែលជាដើមបណ្តឹង បានថ្លែងប្រាប់បណ្តាញព័ត៌មាន Fresh News ឱ្យដឹងថា តុលាការកំពូលសម្រេចតម្កល់សាលដីការ នៃសំណុំរឿងសុំនៅក្រៅឃុំជាលើទី២របស់ លោក គឹម សុខ នៅសាលាឧទ្ធរណ៍ដដែល ពោលគឺបន្តឃុំខ្លួនជនជាប់ចោទគឹម សុខ ដាក់ពន្ធនាគារដដែល ។
លោក គឹម សុខ ត្រូវបានសាលាដំបូងរាជធានីភ្នំពេញ និង សាលាឧទ្ធរណ៍ សម្រេចដូចគ្នាឱ្យជាប់ពន្ធនាគារ គារចំនួន១៨ខែ ពិន័យជាប្រាក់ចំនួន៨លានរៀល និង សងសំណងជំងឺចិត្តដល់សម្តេចតេជោនាយករដ្ឋមន្ត្រីជាដើមបណ្ដឹងរដ្ឋប្បវេណី ចំនួន៨០០លានរៀល ក្រោមការចោទប្រកាន់ពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍ និង បទបរិហារកេរ្តិ៍ជាសាធារណៈ» តាមមាត្រា៤៩៤ មាត្រា៤៩៥ និង មាត្រា៣០៥ នៃក្រមព្រហ្មទណ្ឌ ។
បច្ចុប្បន្នលោក គឹម សុខ នៅជាប់បណ្តឹងមួយទៀត ដែលប្តឹងដោយសម្តេចតេជោដូចគ្នា គឺពាក់ព័ន្ធការដែលលោក គឹម សុខ បានចោទប្រកាន់ថា រាជរដ្ឋាភិបាលកម្ពុជាបានបង្កើតប្រព័ន្ធសម្លាប់មនុស្ស រួចរកឃាតកមិនដែលឃើញ៕
