(ភ្នំពេញ)៖ នាយករដ្ឋមន្ត្រីចិន និងជាមេដឹកនាំជាន់ខ្ពស់លំដាប់ទី២ ក្នុងជួររដ្ឋាភិបាលក្រុងប៉េកាំង លោក លី ខឺឈាង នឹងអញ្ជើញមកបំពេញទស្សនកិច្ចផ្លូវការ នៅកម្ពុជានាសប្តាហ៍ក្រោយនេះ តបតាមការអញ្ជើញរបស់បុរសខ្លាំង សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា។
ក្នុងដំណើរបំពេញទស្សនកិច្ចជាលើកដំបូងនៅកម្ពុជា ក្នុងតំណែងជានាយករដ្ឋមន្ត្រីរបស់ចិននេះ លោក លី ខឺឈាង នឹងអញ្ជើញចូលបង្គំគាល់ព្រះមហាក្សត្រខ្មែរ សម្តេចព្រះបរមនាថ នរោត្តម សីហមុនី ហើយក៏នឹងអញ្ជើញជួបពិភាក្សាការងារទ្វេភាគីជាមួយសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាផងដែរ។
ក្រៅពីការពីបំពេញទស្សនកិច្ចផ្លូវការហើយនោះ លោក លី ខឺឈាង ក៏នឹងអញ្ជើញចូលរួមកិច្ចប្រជុំមេគង្គ-ឡានឆាងលើកទី០២ ដែលកម្ពុជានឹងធ្វើជាម្ចាស់ផ្ទះចាប់ពីថ្ងៃទី១០ ដល់ថ្ងៃទី១២ ខែមករា ឆ្នាំ២០១៨ផងដែរ ជាមួយមេដឹកនាំប្រទេសជាប់ទន្លេមេគង្គ៤ផ្សេងទៀតរួមមាន៖ ថៃ ឡាវ វៀតណាម និងមីយ៉ាន់ម៉ា។
មកដល់ពេលបច្ចុប្បន្ននេះ លោក លី ខឺឈាង មានអាយុ ៦៣ឆ្នាំ កើតនៅក្នុងខេត្តអានហួយ ប្រទេសចិន។ លោក លី ខឺឈាង ត្រូវបានបក្សកុម្មុយនិស្តចិន បោះឆ្នោតជ្រើសតាំងជានាយករដ្ឋមន្ត្រីទី៧របស់ចិន បន្ទាប់ពីលោក វេន ជាប៉ាវ នៅឆ្នាំ២០១៣។
ខាងក្រោមគឺជាប្រវត្តិសង្ខេបរបស់លោក លី ខឺឈាង៖
