(ភ្នំពេញ)៖ រយៈពេលពេញ១ឆ្នាំ២០១៧ យ៉ាងហោចណាស់មានកុមារប្រមាណ៩០៩,១៩២នាក់ និងស្រ្ដីមានផ្ទៃពោះចំនួន១៥៤,៧១៦នាក់ ទទួលបានការពិនិត្យ ព្យាបាល ដោយឥតគិតថ្លៃពី ពីមន្ទីរពេទ្យគន្ធបុប្ផាភ្នំពេញ និងមន្ទីរសម្ពពជ័យវរ្ម័នទី៧ ក្រុងសៀមរាប។ នេះបើយោងតាមរបាយការណ៍ របស់មន្ទីរពេទ្យគន្ធបុប្ផាដែលបណ្តាញព័ត៌មាន Fresh News ទទួលបាននៅថ្ងៃទី០៥ ខែមករា ឆ្នាំ២០១៨នេះ។
យោងទៅតាមរបាយការណ៍បានឲ្យដឹងថា កុមារមានជំងឺទាំងអស់សរុបចំនួន ៩០៩,១៩២នាក់ ត្រូវបានពិនិត្យព្យាបាលនៅក្នុងផ្នែកពិគ្រោះជំងឺក្រៅ កើនឡើងចំនួន៧% បើធៀបនឹងរយៈពេលដូចគ្នាក្នុងឆ្នាំ២០១៦ ដែលមានអត្រាកុមារកើតជំងឺត្រឹមតែ ៨៤៨,៣៩៣នាក់តែប៉ុណ្ណោះ។ ក្នុងនោះកុមារដែលមានផ្ទុក ជំងឺធ្ងន់ធ្ងរមានចំនួន ១៧២,៤៧០នាក់ កើនឡើង១១% បើធៀបនឹងរយៈពេលដូចគ្នានឹងឆ្នាំ២០១៦ ដែលមានត្រឹមតែ១៥៥,៣៣៨នាក់។
របាយការណ៍បញ្ជាក់ទៀតថា ពេញ១ឆ្នាំ២០១៧ ជំងឺដែលត្រូវវះកាត់មានចំនួន២៦,៤៤២នាក់ កើន៨.៦% បើធៀបនឹងឆ្នាំ២០១៦។ ក្នុងនោះការវះកាត់បេះដូង និងភ្ជិតប្រហោងបេះដូង តាមសសៃឈាមកាតេទែរបានចំនួន៤១៣នាក់។
ចំណែកឯស្រ្ដីមានផ្ទៃពោះពេញ១ឆ្នាំ២០១៧ មានចំនួន១៥៤,៧១៦នាក់ បានពិនិត្យ និងព្យាបាល នៅក្នុងផ្នែកពិគ្រោះជំងឺក្រៅនៃមន្ទីរសម្ភព កើនឡើងចំនួន៦.៦% បើធៀបនឹងរយៈពេលដូចគ្នាឆ្នាំ២០១៦ ដែលមានចំនួន ១៤៥,០៨០នាក់។ ក្នុងនោះមានអ្នកសម្រាលកូនបានចំនួន ២៥,៣៥៧នាក់ កើន៧.២%។ ស្រ្ដីដែលសម្រាលកូនដោយវះកាត់មានចំនួន៣,០០៥នាក់៕
