(ភ្នំពេញ)៖ នៅថ្ងៃទី០៥​ ខែមករា ឆ្នាំ២០១៨នេះ លោក ពេជ្រ ស្រស់ ប្រធានគណបក្សយុវជនកម្ពុជា បានអំពាវនាវដល់អ្នកនយោបាយគ្រប់និន្នាការទាំងអស់ ទទួលស្គាល់ការពិតចំពោះថ្ងៃ៧មករា ដែលជាថ្ងៃបញ្ចប់សង្រ្គាមស៊ីវិលនៅកម្ពុជា។

ការអំពាវនាវនេះ ធ្វើឡើង២ថ្ងៃមុនខួបលើកទី៣៩ នៃថ្ងៃជ័យជំនះ៧មករា ឆ្នាំ១៩៧៩ ដែលជាថ្ងៃរំដោះប្រជាពលរដ្ឋខ្មែរ ឱ្យរួចផុតពីរបបប្រល័យពូជសាសន៍ប៉ុលពត ដែលបានកាប់សម្លាប់មនុស្សអស់រាប់លាននាក់។

ក្នុងនាមអ្នកនយោបាយថ្មី លោក ពេជ្រ ស្រស់ បានលើកឡើងយ៉ាងដូច្នេះថា៖ «ទោះបីជាខ្ញុំ ពេជ្រ ស្រស់ កើតមិនទាន់ ថ្ងៃ ៧ មករា ក៏ដោយក៏ខ្ញុំ ពេជ្រ ស្រស់ មិនអាចប្រមាថ ថ្ងៃ ០៧ មករា បានដែរ ពីព្រោះថាខ្ញុំទទួលយកការពិតនៅក្នុងប្រវត្តិ សាស្រ្តប្រទេសកម្ពុជា នាចន្លោះឆ្នាំ ១៩៧៥-១៩៧៩ ពិតជាមានសង្រ្គាមពិតមែន ដូច្នេះ យើងមិនអាចប្រមាថ ថ្ងៃបញ្ចប់សង្រ្គាមបង្ហូរឈាមខ្មែរនឹងខ្មែរបានទេ»។

លោកបានបន្តថា «ក្នុងន័យនេះ សូមអ្នកនយោបាយ និងអ្នកគាំ ទ្របក្សនយោបាយគ្រប់និន្នាការទទួលយកការពិត ដើម្បីប្រទេសកម្ពុជារីកចំរើនជានិច្ចនិរន្ត»។

សម្រាប់ខួបលើកទី៣៩ឆ្នាំ នៃទិវាជ័យជំនះ៧មករា ឆ្នាំនេះ រាជរដ្ឋាភិបាល គ្រោងនឹងរៀបចំឡើង នៅមជ្ឈមណ្ឌលកោះពេជ្រ ដោយមានលក្ខណៈធំជាងមុន ហើយមានមនុស្សចូលរួមប្រមាណ៤,៥០០០នាក់៕