(ភ្នំពេញ)៖ ពិតជាមានការភ្ញាក់ផ្អើលជាខ្លាំង ខណៈដែលចាងហ្វាងផលិតកម្ម Galaxy នាពេលថ្មីៗនេះ បន្ទាប់ពីឈ្មោះជាលោកឧកញ៉ាវ័យក្មេង លោក ឡេង ណាវ៉ាត់ត្រា បានប្រកាសថា នឹងបរិច្ចាកថវិកាផ្ទាល់ខ្លួន ចំនួនជាង ២៥០០០ដុល្លារ ស្មើនឹងទឹកប្រាក់កូរ៉េ ២៥លានវ៉ុន សម្រាប់ជួយដល់សមាគមពលករខ្មែរ ដែលបានបម្រើការងារនៅឯប្រទេស កូរ៉េខាងត្បូង ដើម្បីជួយសម្រួលការលំបាក និងជួយផ្គត់ផ្គង់ដល់សមាគម ឲ្យមានដំណើរការកាន់តែល្អ។
លោក ឡេង ណាវ៉ាត់ត្រា ធ្លាប់បានអះអាងថា មុនពេលលោកមានឈ្មោះបោះសំឡេង ក្លាយជាម្ចាស់ «ផលិតកម្ម Galaxy» និង តារាចម្រៀងនោះ លោកធ្លាប់បានឆ្លងកាត់នូវជីវិតតស៊ូ លំបាក សព្វគ្រប់បែបយ៉ាង តាមរយៈបម្រើការងារពលករ នៅប្រទេសកូរ៉េខាងត្បូង ត្រូវចំណាយពេលវេលាយ៉ាងយូរ ទម្រាំបានក្លាយជាម្ចាស់បុរី ព្រមទាំងអាចសន្សំថវិកាបន្តិចម្ដងៗ រហូតអាចមានលទ្ធភាព ធ្វើជំនួញដីធ្លី សាងសង់បានបុរី បានមកទល់សព្វថ្ងៃនេះ។
ម្ចាស់ផលិតកម្ម «Galaxy» ត្រូវបានមហាជនចាត់ទុកថា ជាមហាសេដ្ឋីវ័យក្មេង លោក ឡេង ណាវ៉ាត់ត្រា បានប្រាប់ឲ្យដឹងថា «បាទបង.! ទឹកប្រាក់ចំនួន ២៥លានវ៉ុន ឬជាង ២៥០០០ ដុល្លារនោះ ខ្ញុំនឹងប្រគល់ជូនផ្ទាល់ ដល់សមាគមពលករកូរ៉េ នៅថ្ងៃទី៧ ខែមករា ខាងមុខនេះ គឺចំថ្ងៃបុណ្យជាតិ ៧មករាតែម្ដង។ ការប្រកាសផ្ដល់ប្រាក់រង្វាន់នេះ មិនមែនជាលើកចុងក្រោយ សម្រាប់ខ្ញុំនោះទេ នាពេលខាងមុខ ខ្ញុំនឹងផ្ដល់ជំនួយថវិកា ជូនដល់សមាគមពលករខ្មែរបន្ថែមទៀត ដើម្បីឲ្យពួកគេ ចាត់ចែងការងារជួយដល់ពលករកម្ពុជា ខណៈដែលពួកគេ ត្រឡប់មកមាតុប្រទេសវិញ។ ការធ្វើបែបនេះ ដើម្បីឲ្យទំនាក់ទំនងរបស់ខ្ញុំ និងពលករនៅទីនោះ មានភាពស្និទ្ធស្នាលនឹងគ្នា ពោលគឺខ្ញុំចង់រក្សាទំនាក់ទំនងល្អ ជាមួយនឹងពលករខ្មែរនៅកូរ៉េ ដោយមិនចង់បំភ្លេច ពីជីវប្រវត្តិអតីតរបស់ខ្ញុំ ដែលធ្លាប់បម្រើការងារ នៅប្រទេសកូរ៉េនោះទេ!»។
លើសពីនេះទៅទៀត លោកក៏ធ្លាប់បានយកខ្សែភាពយន្ត ប្រចាំផលិតកម្មរបស់ខ្លួន មានចំណងជើងថា «កំពូលល្ងង់នៅអាស៊ី» យកទៅចាក់បញ្ចាំងនៅរោងកុន ប្រទេសកូរ៉េ ដើម្បីឲ្យពលករខ្មែរនៅទីនោះ ចូលរួមទស្សនា ដោយសេរីផងដែរ។
បន្ថែមពីលើចំណុចខាងលើ លោក ឡេង ណាវ៉ាត់ត្រា ក៏បានបន្ថែមដែរថា ផលិតកម្មរបស់លោក ស្វាមគមន៍យ៉ាងកក់ក្ដៅចំពោះពលករខ្មែរ មានសមត្ថភាពខាងវិស័យសិល្បៈ មិនថាសម្ដែង ឬ ចម្រៀង ដោយពួកគេបានបញ្ចប់ការងារ នៅប្រទេសកូរ៉េ លោកនឹងផ្ដល់ឱកាសឲ្យពួកគេ បានសម្រេចក្ដីប្រាថ្នា ដើរនៅក្នុងវិស័យសិល្បៈ ប្រសិនបើមានពលករណា ចង់ប្រឡូកចូលវិស័យសិល្បៈ នៅកម្ពុជា។
ជំនួយជាទឹកប្រាក់ចំនួន ២៥លានវ៉ុន ដល់សមាគមពលករខ្មែរ នៅប្រទេសកូរ៉េ ម្ចាស់បុរី លោក ឡេង ណាវ៉ាត់ត្រា ក៏បានផ្ដល់ឱកាសឲ្យពលករនៅទីនោះ ដែលគ្មានឱកាសបន្តការងារ លោកនឹងទទួលស្វាគមន៍ អនុញាតិ្តឲ្យធ្វើការនៅបុរី របស់លោកទៀតផង៕
