(កំពង់ចាម)៖ សម្រាប់ខេត្តកំពង់ចាមទាំងមូល គិតត្រឹមល្ងាចថ្ងៃទី២ ខែមករា ឆ្នាំ២០១៨នេះ ស្រ្តីជាកម្មការិនីដំបូងគេចំនួន៣នាក់ ដែលសម្រាលកូន បានទទួលរបបថវិកាឧបត្ថម្ភពីសម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា តាមរយៈបេឡាជាតិសន្តិសុខសង្គម (បសស)។ ថវិកាសម្រាប់ស្រ្តីកម្មការិនីសម្រាលកូនទាំង៣រូបនេះ ត្រូវបានអភិបាលខេត្តកំពង់ចាម លោក គួច ចំរើន និងមន្រ្តី ប.ស.ស នាំយកទៅប្រគល់ជូនដោយផ្ទាល់ នៅមន្ទីរពេទ្យតែម្តងទីដែលពួកគេកំពុងសម្រាកព្យាបាល ក្រោយពេលសម្រាលកូនបានដោយសវុត្ថិភាព។
លោក គួច ចំរើន បានថ្លែងប្រាប់អង្គភាពព័ត៌មាន Fresh News ថា ថ្ងៃនេះស្រ្តីកម្មការិនីចំនួន៣រូប ក្នុងចំណោម១៥រូប បានទទួលថវិកាឧបត្ថម្ភបន្ថែម ដែលជាគោលនយោបាយរបស់សម្តេចតេជោ ហ៊ុន សែន ដោយលោក និងមន្រ្តីពាក់ព័ន្ធ រួមទាំងមន្រ្តី ប.ស.ស យកទៅប្រគល់ផ្ទាល់តែម្តង។ សម្រាប់ស្រ្តីកម្មការិនីទំាំង៣រូបខាងលើនេះ គឺម្នាក់ៗទទួលបានចំនួន៤០ម៉ឺនរៀល (កើតបានកូនម្នាក់)។
សូមបញ្ជាក់ថា ចាប់ពីម៉ោង០០៖០០នាទីចូលឆ្នាំ២០១៨ រហូតដល់ត្រឹមម៉ោង១៧៖០០នាទីថ្ងៃទី០២ ខែមករានេះ កម្មការិនីសម្រាលកូនបានចំនួន១៤០នាក់ និងទទួលបានថវិកាឧបត្ថម្ភពី ប្រមុខរាជរដ្ឋាភិបាល តាមរយៈបេឡាជាតិសន្តិសុខសង្គម (បសស) សរុបចំនួនជាង៥៦លានរៀល នេះបើយោងតាមការបញ្ជាក់ពីលោក ហេង សួរ អ្នកនាំពាក្យក្រសួងការងារ ថ្លែងប្រាប់បណ្តាញព័ត៌មាន Fresh News ឲ្យដឹងយ៉ាងដូច្នេះ។
លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានថ្លែងប្រាប់អង្គភាព Fresh News ឲ្យដឹងនៅល្ងាចថ្ងៃនេះថា៖ «យោងអនុសាសន៍ដ៏ខ្ពង់ខ្ពស់របស់សម្តេចតេជោ នាយករដ្ឋមន្ត្រី ហ៊ុន សែន ឲ្យក្រសួងការងារ និងបណ្តុះបណ្តាលវិជ្ជាជីវៈយកចិត្តទុកដាក់លើការបើកផ្តល់សាច់ប្រាក់ដល់កម្មការិនីទាំងក្នុង និងក្រៅប្រព័ន្ធ ដែលសម្រាលកូនបានទាន់ពេលវេលានោះ ឯកឧត្តមរដ្ឋមន្ត្រី អ៊ិត សំហេង បានណែនាំដល់ថ្នាក់ដឹកនាំ ប.ស.ស គ្រប់ជាន់ថ្នាក់ឲ្យបង្កើតក្រុមការងារ រៀបចំយន្តការតាមដាន និងធ្វើរបាយការណ៍ជាប្រចាំជូនលោក។ គិតត្រឹមម៉ោង១៧៖០០នាទី ថ្ងៃទី០២ ខែមករា ឆ្នាំ២០១៨នេះ ប.ស.ស បានទទួលបញ្ជីទារកចំនួន ១៤០នាក់ និងចំណាយថវិកាសរុបអស់៥៦លានរៀល ក្នុងនោះ ថ្ងៃទី១ ខែមករា ចំនួន២៨នាក់ ចំណាយថវិកាអស់ ១១.២លានរៀល និងថ្ងៃទី២ ខែមករា ចំនួន ១១២នាក់ ចំណាយថវិកាអស់៤៤.៨លានរៀល»។
សូមជំរាបថា សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានប្រកាសដាក់ចេញគោលនយោបាយថ្មីរបស់រាជរដ្ឋាភិបាល ឧបត្ដម្ភថវិកាដល់កម្មការិនីឆ្លងទន្លេចំនួន៤០ម៉ឺនរៀល សម្រាប់អ្នកកើតបានកូនម្នាក់, ចំណែកអ្នកកើតបានកូនភ្លោះពីរនាក់ ទទួលបាន៨០ម៉ឺនរៀល និងសម្រាប់អ្នកកើតបានកូនភ្លោះបី ១,២០០,០០០រៀល ដែលគោលនយោបាយនេះ ចាប់អនុវត្តចាប់ពីថ្ងៃទី០១ ខែមករា ឆ្នាំ២០១៨ តទៅ។ រាជរដ្ឋាភិបាល បានត្រៀមបម្រុងចំណាយថវិកាប្រមាណ ១០លានដុល្លារអាមេរិក ក្នុងមួយឆ្នាំសម្រាប់ចំណាយប្រាក់ ឧបត្ថម្ភដល់កម្មការិនីឆ្លងទន្លេ៕
