(ភ្នំពេញ)៖ សហភាពសហព័ន្ធអ្នកសារព័ត៌មានកម្ពុជា នៅថ្ងៃទី០២ ខែមករា ឆ្នាំ២០១៨នេះ បានឲ្យដឹងថា ខ្លួននឹងរៀបចំ «វេទិកាអ្នកសារព័ត៌មាន និងអ្នកនាំពាក្យ» នៅចុងសប្ដាហ៍ក្រោយនេះ ពោលគឺនៅថ្ងៃទី១២ ខែមករា។

បើតាមសេចក្ដីប្រកាសព័ត៌មានដែល Fresh News ទទួលបានបញ្ជាក់ថា ដើម្បីឲ្យអ្នកនាំពាក្យ និងអ្នកសារព័ត៌មាន ​បង្កើនកម្រិតទំនាក់ទំនង, បង្កើនការជឿទុកចិត្តគ្នា, បង្កើនការគោរពគ្នា និងអនុសាសន៍ដោះស្រាយ ហើយចង់ដឹងថា តើអ្នកសារព័ត៌មានត្រូវការអ្វីខ្លះពីអ្នកនាំពាក្យ? តើអ្នកនាំពាក្យត្រូវការអ្វីខ្លះពីអ្នកសារព័ត៌មាន?។

លោក ហ៊ុយ វណ្ណៈ ប្រធានសហភាពសហព័ន្ធអ្នកសារព័ត៌មានកម្ពុជា បានលើកឡើងថា ​អ្នកនាំពាក្យ និងអ្នកសារព័ត៌មាន គឺជាដៃគូបំពេញឲ្យគ្នា ពីព្រោះម្ខាងជាអ្នកផ្ដល់ខ្លឹមសារ ហើយម្ខាងទៀតជាអ្នកផ្សាយខ្លឹមសារនោះទៅកាន់ប្រជាជន។ ប្រសិនបើការទទួលខ្លឹមសារព័ត៌មាន មិនច្បាស់លាស់ មិនបានស៊ីជម្រៅ នោះការផ្សាយក៏នឹងមិនបានគ្រប់ជ្រុងជ្រោយដែរ ហើយការខាតបង់នោះគឺប្រជាជនដែលត្រូវការព័ត៌មានពិត ត្រឹមត្រូវ ពេញលេញ គ្រប់ជ្រុងជ្រោយ សម្រាប់ធ្វើជាមូលដ្ឋានក្នុងការសម្រេចចិត្តដ៏ប្រសើរ​។ ប្រសិនបើអ្នកសារព័ត៌មានចេញផ្សាយមុន ហើយអ្នកនាំពាក្យបែរជាចាំតែកែខ្លឹមសារតាមក្រោយ នោះក៏មិនមែនជាទិដ្ឋភាពដែលប្រសើរនោះទេ។

សហភាពសហព័ន្ធអ្នកសារព័ត៌មាន រំពឹងទុកថា វេទិកានេះនឹងពង្រីកបាននូវកិច្ចទំនាក់ទំនងក្នុងភាពជាដៃគូរវាងអ្នកសារព័ត៌មាន និងអ្នកនាំពាក្យ ក្នុងការផ្លាស់ប្តូរមតិយោបល់ លើយន្តការទទួលព័ត៌មាន និងផ្តល់ព័ត៌មាន ដើម្បីលើកកម្ពស់សិទ្ធិទទួលព័ត៌មាន និងពង្រឹងគុណភាព នៃការផ្សព្វផ្សាយលើគ្រប់វិស័យនៅកម្ពុជាឲ្យកាន់តែល្អប្រសើរឡើង។

«វេទិកាអ្នកសារព័ត៌មាន និងអ្នកនាំពាក្យ» ដែលជាជំនួបប្រចាំឆ្នាំលើកដំបូង ទទួលបានកិច្ចសហការនិងឧបត្ថម្ភគាំទ្រពី៖ ក្រសួងបរិស្ថាន, សាលារាជធានីភ្នំពេញ, សាកលវិទ្យាល័យ CUP, អគ្គនាយកដ្ឋានអន្តោប្រវេសន៍ និងអគ្គនាយកដ្ឋានអត្តសញ្ញាណកម្ម នៃក្រសួងមហាផ្ទៃ និងវិទ្យាស្ថាន Mekong Dialogue Institute។

សូមអានខ្លឹមសារលម្អិតនៃសេចក្ដីប្រកាសព័ត៌មាន របស់សហភាពសហព័ន្ធអ្នកសារព័ត៌មាន នៅខាងក្រោមនេះ៖