(ភ្នំពេញ)៖ ផលិតកភាពយន្តរឿង «មនុស្សឆ្កួត» បានថ្លែងអះអាងថា ទោះបីជាភាពយន្តបែបកំប្លែងមួយនេះ បានបង្កើនការចំណាយ លើសពីគម្រោងយ៉ាងណាក្ដី ប៉ុន្តែនៅពេលដាក់បញ្ចាំង តាមរោងភាពយន្តនានា គឺនឹងទទួលបានការគាំទ្រច្រើន និង​ជោគជ័យ ជាមិនខាន។

ការប្រកាសឲ្យដឹងបែបនេះ ត្រូវបានធ្វើឡើង ខណៈដែលផលិតកម្ម អិលឌី (LD) បានដាក់សម្ពោធជាផ្លូវការ នូវវណ្ណកម្មរឿងថ្មី​ គឺរឿង «មនុស្សឆ្កួត» ​នាល្ងាចថ្ងៃទី២៧ ខែធ្នូ ឆ្នាំ២០១៧នេះ នៅរោងភាពយន្ត Legend សាខាទួលគោក ខណៈរឿង «មនុស្សឆ្កួត» នឹងត្រូវលក់សំបុត្រឲ្យមហាជនចូលទស្សនា ចាប់ពីថ្ងៃទី២៨ ខែធ្នូ ឆ្នាំ២០១៧នេះតទៅ នៅគ្រប់រោងភាពយន្តទំនើប ក្នុងរាជធានីភ្នំពេញ។

លោក លៀក លីដា ជាផលិតករ និងជាចាងហ្វាងផលិតកម្ម LD ថ្លែងឲ្យដឹងថា រឿង​ «មនុស្សឆ្កួត» មិនដឹងអ្នកទស្សនាទទួលយកបានឬអត់ទេ ​តែក្នុងចិត្តគិតថារឿងនេះ អាចនឹងទទួលជោគជ័យ ដោយសារតែលោកបាន​ព​ង្រឹង​ លើគុណភាពជាគោល ហើយចាយប្រាក់វិញ ក៏អស់ច្រើន។ ប៉ុន្តែ​បើសិនទីផ្សារមាន លោកអត់ខ្លាចផលិតរឿងឲ្យ​ មានគុណភាពដូចបរទេស ឬប្រទេសជិតខាងទេ។ ភាពយន្តរឿង «មនុស្សឆ្កួត» ដែលជាការដឹកនាំសម្ដែង ដោយនាយ គ្រឿន ជាកាដូចុងឆ្នាំ និងដើមឆ្នាំថ្មី បូកទាំងបច្ចេកទេសទំនើប​ សហការគ្នា ធ្វើពីក្រុមការងារទាំងលើស ពីរឿងកន្លងមក។ ​

ចាងហ្វាងផលិតកម្ម LD រូបនេះ បញ្ជាក់យ៉ាង​ថា «ដូចករណីរឿង "មនុស្សឆ្កួត" គឺចាយធនធានណាស់ យើងប្រឹងតាំងពីកាត់តប្លង់បច្ចេកទេស ពន្លឺ សំឡេងផងដែរ។ បើចង់ដឹងថា មានកម្រិតបែបណា មានតែអញ្ជើញបងប្អូនមកចូលរួមទស្សនាថា ម្តងនេះ អិលឌី ប្លែកយ៉ាងណា»។

ជាមួយគ្នា លោក លៀក លីដា ក៏បានស្នើឲ្យទស្សនិកជនមានការយោគយល់ ​ខណៈមានទស្សនិកជនខ្លះរិះគន់ថា រឿងខ្មែរ ធ្វើមិនដូចគេ ប៉ុន្តែអត់ដឹងថា យើងផលិតរឿងរងសម្ពាធអ្វីខ្លះនោះឡើយ ដូច្នេះត្រូវយល់ពីចំណុចនេះទាំងអស់គ្នា៕