(ភ្នំពេញ)៖ មជ្ឈមណ្ឌលកំចាត់មីនកម្ពុជា ដែលហៅកាត់ថា ស៊ីម៉ាក់ ទើបទទួលបានជំនួយជាថវិកាចំនួន១,២០០,០០០ដុល្លារអាមេរិក ពីអង្គការ​ UNDP សម្រាប់រំដោះចំការមីនរយៈពេល១ឆ្នាំ (ឆ្នាំ២០១៨) នៅក្នុងខេត្តជាប់ព្រំដែនថៃ ចំនួនបីរួមមានខេត្ត ប៉ៃលិន, បាត់ដំបង និងបន្ទាយមានជ័យ។

អគ្គនាយកស៊ីម៉ាក់ លោក ហេង រតនា បានថ្លែងប្រាប់បណ្ដាញព័ត៌មាន Fresh News នៅរសៀលថ្ងៃទី​២៨​ ខែធ្នូ ឆ្នាំ២០១៧នេះថា ជំនួយរបស់​អង្គការ​ UNDP នេះ ស៊ីម៉ាក់ទទួលបានតាមរយៈការដាក់ដេញថ្លៃ ដោយអាជ្ញាធរមីនកម្ពុជា។ ចំពោះថវិកាជំនួយទាំងនេះ UNDP ទទួលបានពីរដ្ឋាភិបាល​អូស្រ្ដាលី ស្វីស កាណាដា ដើម្បីគាំទ្រដល់គម្រោងសកម្មភាពមីនមួយហៅថា «គម្រោងបោសសំអាតសម្រាប់ទិន្និផល Clearing for results» សម្រាប់​រំដោះផ្ទៃដីចំការមីន នៅខេត្តប៉ៃលិន, បាត់ដំបង និងបន្ទាយមានជ័យ។

អគ្គនាយកដដែលរូបនេះ បានបញ្ជាក់ទៀតថា គម្រោងបោសសំអាតមីនដែលមានរយៈពេល១ឆ្នាំនេះ ស៊ីម៉ាក់នឹងពង្រាយកម្លាំងប្រតិបត្តិការរំដោះផ្ទៃដី ចំនួន៧,៥០០,០០០ម៉ែត្រការ៉េ។

លោកបន្តថា លើសពីនេះទៅទៀតនោះ អាជ្ញាធរមីននឹងអង្គការ UNDP ក៏បានសម្រេចបន្ថែមថវិកាចំនួន៧៥ម៉ឺនដុល្លារថែមទៀត ដល់ស៊ីម៉ាក់ ​សម្រាប់គម្រោងឆ្នាំ២០១៧ ដែលធ្វើសកម្មភាពបោសសំអាតមីន នៅខេត្តចំនួន២ គឺខេត្តបាត់ដំបង និងបន្ទាយមានជ័យ ឲ្យបន្ដប្រតិបត្តិការ រហូតដល់ខែមិថុនា ឆ្នាំ២០១៨។

អ្វីដែលគួរឲ្យកត់សំគាល់នោះ ក្នុងគម្រោងបោសសំអាតមីនដែលស៊ីម៉ាក ដែលទើបទទួលបានថវិកា១.២លានដុល្លារនេះ ក៏មានថវិការបស់រដ្ឋាភិបាលកាណាលដាផងដែរ ដែលប្រទេសនេះ បានត្រឡប់មកផ្ដល់ជំនួយដោះមីនដល់កម្ពុជាឡើងវិញ បន្ទាប់ពីបញ្ចប់ជំនួយជាច្រើនឆ្នាំកន្លងមក។

សូមជម្រាបថា ​ក្នុងឆ្នាំ២០១៧​ អង្គភាពស៊ីម៉ាក់ សំរេចបោសសំអាតដី មានបញ្ហាគ្រាប់មីន និងផ្ទៃដីចំការគ្រាប់បានចំនួន ៨,៦៣៦ហិចតា​ និងរុករកកំទេចចោលគ្រាប់មីន និងគ្រាប់យុទ្ធភណ្ឌ័គ្រប់ប្រភេទបានចំនួន​៣៧,៤៤៨គ្រាប់៕