(ភ្នំពេញ)៖ រដ្ឋាភិបាលចិន បានចុះហត្ថលេខាលើកិច្ចព្រមព្រៀងផ្លូវការមួយ នាថ្មីៗនេះ ដើម្បីផ្តល់ជំនួយសម្ភារបរិក្ខាចំនួន៣០មុខ ដល់គណៈកម្មាធិការជាតិរៀបចំការបោះឆ្នោត(គ.ជ.ប) សម្រាប់ការបោះឆ្នោតនៅឆ្នាំ២០១៨ ខាងមុខនេះ។ នេះបើតាមសេចក្តីប្រកាសរបស់គ.ជ.ប ដែលបណ្តាញព័ត៌មាន Fresh News ទទួលបាននៅថ្ងៃនេះ។

លោក សោម សូរីដា អគ្គលេខាធិការរងគ.ជ.ប បានបញ្ជាក់ឱ្យដឹងថា សម្ភារទាំងនោះ នឹងក្លាយជំនួយថ្មីលើកដំបូងរបស់រដ្ឋាភិបាលចិន ចាប់តាំងពីប្រទេសមហាយក្សនេះ បានប្រកាសផ្តល់ជំនួយដល់ការបោះឆ្នោតកម្ពុជាកន្លងមក ក្រោយពេលអឺរ៉ុប និងអាមេរិកផ្តាច់ជំនួយមក ប៉ុន្តែសម្ភារៈទាំងនោះមិនទាន់បញ្ជូនមកដល់គ.ជ.ប នៅឡើយទេ។

បើតាមសេចក្តីប្រកាសគ.ជ.ប នៅថ្ងៃទី២៧​ ខែធ្នូ ឆ្នាំ២០១៧ បានឱ្យដឹងថា សម្ភារៈបរិក្ខាដែលចិនព្រមព្រៀងផ្តល់ជូនកម្ពុជានេះ រួមមានដូចជា កុំព្យូទ័រ ម៉ាស៊ីនព្រីន ម៉ាស៊ីនថតចម្លង កាមេរ៉ា រួមទាំងសម្ភារៈប្រើប្រាស់ផ្សេងៗទៀតជាដើម ខណៈដែលការប៉ាន់ប្រមាណជាទឹកប្រាក់ មិនទាន់អាចធ្វើបាននៅឡើយទេ។

សូមបញ្ជាក់ថា ការចូលខ្លួនផ្តល់ជំនួយដល់គ.ជ.បរបស់ មហាយក្សចិន បានធ្វើឡើងបន្ទាប់ពីសហរដ្ឋអាមេរិក និងអឺរ៉ុប ប្រកាសផ្អាកជំនួយផ្សេងៗ ដល់គណៈកម្មាធិការជាតិរៀបចំការបោះឆ្នោតនៅកម្ពុជា ក្រោយពីតុលាការកំពូល កាត់ទោសរំលាយគណបក្សសង្រ្គោះជាតិ ពាក់ព័ន្ធនឹងអំពើក្បត់ជាតិ។

ក្រោយកិច្ចព្រមព្រៀងនេះ ភាគីចិន បានសន្យាថា នឹងបន្តផ្តល់ជំនួយដល់គ.ជ.ប បន្ថែមទៀត សម្រាប់ការបោះឆ្នោតជាបន្តបន្ទាប់ឱ្យប្រព្រឹត្តទៅដោយរលូន មានភាពត្រឹមត្រូវមានតម្លាភាព និងគណនេយ្យភាព។

សូមបញ្ជាក់ថា​ កម្ពុជានឹងរៀបចំការបោះឆ្នោតសំខាន់ៗចំនួនពីរនៅក្នុងឆ្នាំ២០១៨ ខាងមុននេះ ក្នុងនោះមានការបោះឆ្នោតជ្រើសតាំងសមាជិកព្រឹទ្ធសភាអាណត្តិទី៤ ដែលធ្វើឡើងនៅថ្ងៃទី២៥ ខែកុម្ភៈ និងការបោះឆ្នោតជ្រើសតាំងតំណាងរាស្រ្តអាណត្តិទី៦ នៅថ្ងៃទី២៩ ខែកក្កដា។ ការបោះឆ្នោតទាំងពីនេះ កម្ពុជាគ្រោងនឹងចំណាយប្រមាណជាង៥០លានដុល្លារ គណៈដែលទឹកប្រាក់នេះ ត្រូវបានកម្ពុជា ត្រៀមនិងអនុម័តរួចរាល់ហើយដែរ៕