(សៀមរាប)៖ ខេត្តទេសចរណ៍សៀមរាប មានជនបរទេស១,៦៨៧គ្រួសារ សរុប៤,៧៩៦នាក់ ស្នើនឹង៥សញ្ជាតិ កំពុងរស់នៅនាពេលបច្ចុប្បន្ននេះ ខណៈរដ្ឋលេខាធិការក្រសួងមហាផ្ទៃ លោក អ៊ុក គឺមឡេង ជំរុញឲ្យមន្ត្រី និងអាជ្ញាធរជាប់ពាក់ព័ន្ធបន្តកិច្ចខិតខំប្រឹងប្រែង ក្នុងការចុះសម្រង់ស្ថិតិជនបរទេស ឲ្យបានរួចរាល់នៅក្នុងខែកក្កដា ឆ្នាំ២០១៨ខាងមុខ។
ការជំរុញបែបនេះ ត្រូវបានធ្វើឡើងនៅព្រឹកថ្ងៃទី២៧ ខែធ្នូ ឆ្នាំ២០១៧នេះ ក្នុងឱកាសលោក ដឹកនាំប្រជុំផ្សព្វផ្សាយអនុក្រឹត្យ ស្ដីពីការលុបចោល និងដកហូតឯកសាររដ្ឋបាលកម្ពុជា មិនប្រក្រតីដែលជនបរទេសកំពុងកាន់កាប់ប្រើប្រាស់ ដល់មន្ត្រីនគរបាល និងសមត្ថកិច្ច អាជ្ញាធរពាក់ព័ន្ធ នៅខេត្តសៀមរាប ដោយមានការចូលរួមពីលោក ឃឹម ប៊ុនសុង អភិបាលខេត្តសៀមរាប និងមន្ដ្រីពាក់ព័ន្ធជាច្រើនទៀតផងដែរ។
ថ្លែងក្នុងឱកាសនោះ រដ្ឋលេខាធិការ លោក អ៊ុក គឹមឡេង បានធ្វើបានកោតសរសើរ និងបន្តលើកទឹកចិត្តដល់មន្ត្រី និងអាជ្ញាធរជាប់ពាក់ព័ន្ធ ឲ្យបន្តកិច្ចខិតខំប្រឹងប្រែង ក្នុងការចុះសម្រង់ស្ថិតិជនបរទេស ឲ្យបានរួចរាល់នៅក្នុងខែកក្កដា ឆ្នាំ២០១៨ខាងមុខនេះ។
លោកវរសេនីយ៍ត្រី ជា គឹមសាន ស្នងការរងនគរបាលខេត្តសៀមរាប បានលើកឡើងថា បច្ចុប្បន្ននៅខេត្តសៀមរាប ស្ថិតិជនបរទេសអន្តោប្រវេសន្ដសរុប ១,៦៨៧គ្រួសារ សរុប៤,៧៩៦នាក់ (ស្រី២,៣១៤នាក់) ដែលមាន៥សញ្ជាតិ គឺវៀតណាម, ឡាវ, ថៃ, ភូមា, នេប៉ាល់។ ក្នុងនោះជនបរទេសបែបអន្ដោប្រវេសន្ដ ដែលបានជំរឿន មាន៩៩៧គ្រួសារ មាន៤សញ្ជាតិ មាន២,៣៨២នាក់ (ស្រី១,១០៦នាក់) ហើយការិយាល័យគ្រប់គ្រងជនបរទេស បានបំពេញបែបបទសុំប្រកាសទទួលស្គាល់ ដល់ជនបរទេសអន្តោប្រវេសន្ត និងកូនក្នុងបន្ទុកគ្រប់អាយុ១៨ឆ្នាំ មានចំនួន១,០៧២នាក់ ស្មើនឹង៦៤២គ្រួសារ។
បើតាមលោកស្នងការរង ជនបរទេសបែបអន្តោប្រវេសន្តស្នាក់នៅយូរ មានចំនួន៩៩៥គ្រួសារ ស្នើនឹង២,៦៦៤នាក់ ស្នាក់នៅយូរមានឯកសាររដ្ឋបាលកម្ពុជា មិនប្រក្រតី មានចំនួន៤៦២គ្រួសារ ស្មើនឹង១,៥២០នាក់ បានធ្វើកិច្ចសន្យារក្សាទុក (មានគល់បញ្ជីត្រឹមត្រូវ) បានចំនួន៤៤១ឯកសារ និងធ្វើកំណត់ហេតុដកហូតឯកសារ (គ្មានគល់បញ្ជី) បានចំនួន១៩៣ឯកសារ៕
