(ភ្នំពេញ)៖ ចោរឆក់២នាក់ ត្រូវបានប្រជាពលរដ្ឋក្របួចជាប់ ក្រោយពីធ្វើសកម្មភាពឆក់ទូរស័ព្ទដៃពីនារី២នាក់ កំពុងជិះម៉ូតូឌុបគ្នាទៅផ្សារបានសម្រេច ហើយព្យាយាមរត់គេចខ្លួន បានចម្ងាយជាង១០០ម៉ែត្រ ពលរដ្ឋជួយព័ទ្ធចាប់បានភ្លាមៗ ស្ថិតនៅក្បែរផ្សារពោធិចិនតុង ភូមិប៉ប្រ៉កជើង សង្កាត់កាកាប១ ខណ្ឌពោធិ៍សែនជ័យ នៅរសៀលថ្ងៃទី២៦ ខែធ្នូ ឆ្នាំ២០១៧។
ជនសង្ស័យទាំង២នាក់ ឃាត់ខ្លួនបាន ទី១៖ឈ្មោះ ហុញ ថៃ អាយុ១៨ឆ្នាំ មុខរបរមិនពិតប្រាកដ ស្នាក់នៅវត្តពោធិ៍ចិនតុង ភូមិប៉ប្រ៉កជើង សង្កាត់កាកាប, ទី២៖ឈ្មោះ ចេត សុផលចន្ទ្រា អាយុ២៦ឆ្នាំ ស្នាក់នៅភូមិប៉ប្រ៉កជើង សង្កាត់កាកាប១ ខណ្ឌពោធិសែនជ័យ។ ចំណែកជនរងគ្រោះឈ្មោះ ហ៊ុន ពិសី ភេទស្រី អាយុ១៧ឆ្នាំ មុខរបរសិស្ស មានទីលំនៅភូមិបាគូរ សង្កាត់ដង្កោ ខណ្ឌដង្កោ ជាម្ចាស់ទូរស័ព្ទ ចំណែកអ្នកបើកបរម៉ូតូ ឈ្មោះ សូ អេសធើរ ភេទស្រី អាយុ២៥ឆ្នាំ មុខរបរសិស្សមានទីលំនៅភូមិព្រៃព្រីងជើង សង្កាត់ចោមចៅ។
បើតាមមន្ដ្រីនគរបាលមូលដ្ឋាន មុនកើតហេតុខណៈដែលខ្លួនជិះម៉ូតូឌុបគ្នា ទៅផ្សារពោធិចិនតុង គ្រាន់តែជិតដល់កន្លែងផ្ញើរម៉ូតូ ស្រាប់តែជនសង្ស័យ២នាក់ខាងលើជិះម៉ូតូមួយគ្រឿងម៉ាក វីវ៉ា ពណ៌ខ្មៅ ពាក់ស្លាកលេខ ភ្នំពេញ1X-9519 តាមមកពីក្រោយដល់ទន្ទឹមក៏ធ្វើសកម្មភាពឆក់ យកទូរស័ព្ទបានសម្រេចហើយ ព្យាយាមរត់គេច តែដោយសារផ្លូវស្ទះចរាចរណ៍ ជនរងគ្រោះដេញតាមស្រែក ផ្អើលប្រជាពលរដ្ឋព័ទ្ធចាប់ខ្លួនបាន២នាក់ ប្រគល់ឲ្យសមត្ថកិច្ច៕
