(ភ្នំពេញ)៖ សាលាដំបូងរាជធានីភ្នំពេញ នៅថ្ងៃទី២៥ ខែធ្នូ ឆ្នាំ២០១៧នេះ បានបើកសវនាការជំនុំជម្រះ ស្ត្រីដែលជនជាប់ចោទ ការជេរប្រមាថសម្តេចតេជោ ហ៊ុន សែន និងក្រុមគ្រួសារ តាមបណ្តាញសង្គម Facebook ថាជាឃាតកសម្លាប់បណ្ឌិត កែម ឡី។
ស្ត្រីជាប់ចោទឈ្មោះ ហ៊ឺន វ៉ាន់ស្រីពៅ ហៅហេង លក្ខិណា អាយុ៣៧ឆ្នាំ ត្រូវបានតំណាងអយ្យការចោទពីបទ «ញុះញង់ឲ្យប្រព្រឹត្តបទឧក្រិដ្ឋជាអាទិ៍ តាមមាត្រា៤៩៤ និងមាត្រា៤៩៥ នៃក្រមព្រហ្មទណ្ឌ»។ បទចោទប្រកាន់មួយនេះ អាចប្រឈមការជាប់ពន្ធនាគារពី ៦ខែ ទៅ២ឆ្នាំ និងពិន័យជាប្រាក់ពី ១លានរៀល ទៅ៤លានរៀល។
ក្នុងសវនាការនោះ មានលោក អ៊ី ថាវរៈ ជាចៅក្រមជំនុំជម្រះនិងលោក ស្រី ម៉ាក់នី ជាតំណាងអយ្យការ បានធ្វើសេចក្តីសន្និដ្ឋាន រក្សាបទចោទប្រកាន់នៅដដែល និងផ្តន្ទាទោសតាមច្បាប់។ ក្រោយការសួរដេញដោយ តុលាការបានលើកពេលប្រកាសសាលក្រមទៅថ្ងៃទី១១ ខែមករា ឆ្នាំ២០១៨ខាងមុខ។
សូមជម្រាបថា ស្ត្រីរូបនេះត្រូវសមត្ថកិច្ចឃាត់ខ្លួនកាលពីថ្ងៃទី១២ ខែកក្កដា ឆ្នាំ២០១៧ នៅបេនឡាន រិទ្ធីមុនី បន្ទាប់ពីរូបនាងបានបង្ហោះវីដេអូតាមគណនី Facebook ឈ្មោះ ហេង លក្ខិណា កាលពីថ្ងៃទី៩ ខែកក្កដា ដោយចោទសម្តេច ហ៊ុន សែន និងក្រុមគ្រួសារថា សុទ្ធតែជាឃាតក ក្នុងអំឡុងពេលនាង កំពុងស្ថិតក្នុងពិធីបុណ្យរំលឹកខួប១ឆ្នាំ នៃការបាញ់សម្លាប់លោកបណ្ឌិត កែម ឡី អ្នកវិភាគនយោបាយ ដែលរៀបចំឡើងនៅភូមិអង្គតាកុប ឃុំលាយបូរ ស្រុកត្រាំកក់ ខេត្តតាកែវ៕
