(កណ្តាល)៖ នគរបាលចរាចរណ៍ នៃស្នងការដ្ឋាននគរបាល ខេត្តកណ្តាល​ នៅរសៀលថ្ងៃទី២៥​ ខែធ្នូ​ ឆ្នាំ២០១៧​នេះ​ បានបញ្ជូនយុវជនម្នាក់ មកអយ្យការអមសាលាដំបូងខេត្តកណ្តាល​ ដើម្បីសាកសួរករណី បើករថយន្តបុកម៉ូតូបណ្តាលឲ្យមនុស្សបួននាក់ស្លាប់ នៅស្រុកអង្គស្នួល​។

ជនសង្ស័យកំពុងស្ថិតក្រោម ការសាកសួររបស់ព្រះរាជអាជ្ញារង នៃអយ្យការអមសាលាដំបូងខេត្តកណ្តាល។

គួររំលឹកថា​ ប្តីប្រពន្ធកូននិងក្មួយតូចៗ បានស្លាប់ភ្លាមៗ នៅនឹងកន្លែង​ ដោយសារតែរថយន្តបែនមួយគ្រឿង បើកលឿនជ្រុលទៅបុកយ៉ាងពេញទំហឹង នៅចំណុចគីឡូម៉ែត្រលេខ១និងលេខ២ ភូមិព្រៃគោ ឃុំលំហាច ស្រុកអង្គស្នួល កាលពីសៀល ថ្ងៃទី២៤ ខែធ្នូ ឆ្នាំ២០១៧។

នគរបាលបានឱ្យដឹងថា ជនរងគ្រោះទី១​ឈ្មោះ ម៉ន ជីមី អាយុ២៦ឆ្នាំ មុខរបរកម្មករជាប្តី​ ទី២​ឈ្មោះ ហៀង គឹមសាន អាយុ២៤ឆ្នាំ មុខរបរកម្មករជាប្រពន្ធ​ ទី៣​ ឈ្មោះ ម៉ន សម្បត្តិ អាយុ២ឆ្នាំ ជាកូននិងទី៤​ ឈ្មោះ ខេម ស្រីម៉ី អាយុ៩ឆ្នាំជាក្មួយ។

មន្ត្រីនគរបាលបន្ដថា អ្នកទាំងបួននាក់នេះ មានទីលំនៅភូមិត្រពាំងសុក្រម ឃុំបែកចាន ស្រុកអង្គស្នួល ខេត្តកណ្ដាល ជិះម៉ូតូមួយគ្រឿងម៉ាកហុងដាឌ្រីមសង់សេ១២៥ពណ៌ខ្មៅ ពាក់ផ្លាកលេខ ភ្នំពេញ១CW-៤៦១៤។

ចំណែករថយន្តបង្ក ម៉ាកនីសសាន់ ប្រភេទបែនពណ៌ខៀវ ពាក់ផ្លាកលេខ ភ្នំពេញ ៣A-២៧៧៧ បើកបរដោយឈ្មោះ សេង ចាន់ឌឿន ភេទប្រុស អាយុ២៣ឆ្នាំ មុខរបរតៃកុងឡាន ទីលំនៅភូមិព្រពាំងស្យា ឃុំស្វាយរំពារ ស្រុកបរសេដ្ឋ ខេត្តកំពង់ស្ពឺ។

នគរបាល បានបន្តទៀតថា មុនពេលកើតហេតុ គេឃើញជនរងគ្រោះជិះម៉ូតូឌុបគ្នា ក្នុងទិសដៅពីត្បូងទៅជើង។ លុះដល់ចំណុចកើតហេតុ ស្រាប់តែរថយន្តនេះ​ បើក​បញ្ច្រាសទិសគ្នា ក្នុងល្បឿនលឿន ជ្រុលមកបុកយ៉ាងពេញទំហឹង បណ្តាលឱ្យដួលបោកទៅនឹងថ្នល់ បណ្តាលឱ្យស្លាប់ទាំងបួននាក់។

ក្រោយកើតហេតុនគរបាល ចុះទៅដល់រួចឃាត់ខ្លួន អ្នកបើកបររថយន្តបញ្ជូន ទៅកាន់អធិការដ្ឋាន រួមនឹងវត្ថុតាងផងដែរ។ ចំណែកសាកសព ត្រូវបានប្រគល់ ទៅឲ្យក្រុមគ្រួសារយកទៅធ្វើបុណ្យតាមប្រពៃណី៕