(ត្បូងឃ្មុំ)៖ ក្រុមជនខិលខូចដែលតែងតែយកឈ្មោះថ្នាក់ដឹកនាំ ទៅ​បោកប្រាស់ដើម្បីតម្លើងស័ក្ដិ ផ្ទេរតំណែង ឡើងកាំប្រាក់ និងរត់ការផ្សេងៗក្នុងជួរមន្ដ្រីរាជការនោះ ត្រូវបានកម្លាំងនគរបាលខេត្តត្បូងឃ្មុំ ​ឃាត់ខ្លួនបាន៣នាក់ ហើយបញ្ជូនទៅតុលាការដើម្បីផ្ដន្ទាទោសតាមច្បាប់។

ស្នងការនគរបាលខេត្តត្បូងឃ្មុំ លោកឧត្តមសេនីយ៍ទោ បែន រ័ត្ន បានប្រាប់ឲ្យដឹងនៅថ្ងៃទី១៨ ខែធ្នូ ឆ្នាំ២០១៧នេះថា ជនសង្ស័យទាំង៣នាក់ត្រូវបានបញ្ជូនទៅសាលាដំបូងខេត្តត្បូងឃ្មុំ នៅថ្ងៃទី១៧ ខែធ្នូ ឆ្នាំ២០១៧ម្សិលមិញនេះ បន្ទាប់ពីកម្លាំងនគរបាលខេត្ត​ត្បូងឃ្មុំ សហការនគរបាលស៊ើបការខាងក្រៅ និងបច្ចេកទេស និងប្រឆាំងបទល្មើសបច្ចេកវិទ្យា នៃអគ្គស្នងការដ្ឋាននគរបាលជាតិ ចាប់ខ្លួនកាលពីថ្ងៃ១៣ ខែធ្នូនៅចំណុចភូមិនិគមក្រោម ឃុំស្រឡប់ ខេត្តត្បូងឃ្មុំ។

លោកឧត្តមសេនីយ៍ស្នងការ បានបញ្ជាក់ថា ជនសង្ស័យខាងលើបាន​យកឈ្មោះថ្នាក់ដឹកនាំ ​នៅខុទ្ទកាល័យសម្តេចតេជោ ហ៊ុន សែន, ក្រសួងមុខងារសាធារណៈ, ក្រសួងមហាផ្ទៃ សម្រាប់រត់ការតម្លើងសក្តិយស ផ្ទេរតំណែង រកបច្ច័យចូលបុណ្យ ឡើងកាំប្រាក់ និងរត់ការផ្សេងទៀត។ ជនសង្ស័យទាំង៣រួមមាន ទី១៖ ឈ្មោះ ខន សុម៉ាលី ហៅស្រីទូច, ទី២៖ ត្រូវជាប្ដី​ឈ្មោះ ថា សុផាត និងទី៣៖ឈ្មោះ ខន សុរិយា ហៅស្រីពៅ ជាប្អូនរបស់ស្រីទូច (ជាអ្នកបំផ្លាញវត្ថុតាង)។

ពួកគេបានប្រើទូរស័ព្ទ សម្រាប់ធ្វើសកម្មភាពឆបោកមនុស្សជាច្រើន និងបានប្រើទូរស័ព្ទលេខ 092249333, 092615522, 0965520906, 0974465888, 0972803666, 0978252666 និង​0317644448។ បច្ចុប្បន្នកម្លាំងនគរបាលជំនាញ កំពុង​ស្រាវជ្រាវតាមបច្ចេកទេសជំនាញ ដើម្បីតាមចាប់អ្នកពាក់ព័ន្ធក្នុងករណីនេះបន្តទៀត៕​