(ភ្នំពេញ)៖ ក្រុមហ៊ុនម៉ូតូធំ Harley-Davidson® ថមីៗនេះ​ បានប្រកាសបើកសម្ពោធអគារតាំងលក់ដំបូងរបស់ខ្លួន នៅប្រទេសកម្ពុជា គឺ «Harley-Davidson ភ្នំពេញ» ដើម្បីពង្រីកវត្តមានរបស់យីហោ Harley-Davidson នៅក្នុងតំបន់ និង​បន្តពង្រឹងបន្ថែមភាពល្បីល្បាញ របស់យីហោនេះទៅកាន់តំបន់អាស៊ី។ ក្រុមហ៊ុន ដែលទទួលបានសិទ្ធិចែកចាយផ្តាច់មុខដំបូងគេ សម្រាប់យីហោ Harley-Davidson នៅប្រទេសកម្ពុជា គឺ​ក្រុមហ៊ុន អេជជីប៊ីខូអិលធីឌី [HGB Group Co. Ltd.]។

Harley Davidson គឺជាប្រភេទម៉ូតូធំ​ ដែលជាផលិតផលរបស់អាមេរិក ដែលត្រូវបានផលិតឡើងនៅឆ្នាំ ១៩០៣ ។ ក្នុងការឈរជើងនៅក្នុងទីផ្សារជាង ១០០ ឆ្នាំមកនេះ Harley Davidson នៅតែរក្សាភាពប្រកួតប្រជែងខ្លាំង។ ចំណុចពិសេសរបស់ Harley Davidson គឺ កំលាំងម៉ាស៊ីនខ្លាំងធំ ទម្ងន់ម៉ូតូធ្ងន់ និង សំឡេងគ្មានគូប្រៀប។ កំលាំងម៉ាស៊ីនរបស់ Harley មានចាប់ពី ៧០០ ដល់ជាង២០០០ ដែលស្មើរនឹងម៉ាស៊ីនឡាន។ ជាធម្មតាម៉ូតូ Harley Davidson ជាប្រភេទម៉ូតូធ្ងន់ ជាងម៉ូតូផ្សេងៗ ដែលវាផ្តល់នូវលំនឹងល្អ ទោះក្នុងល្បឿនកំរិតណាក៏ដោយ។ ទោះជាវាមានទម្ងន់ធ្ងន់បន្តិចមែន តែអ្នកមានអារម្មណ៍សុវត្ថិភាពបំផុត នៅពេលអ្នកបានជិះវា​។ រីឯ សំឡេងជ្រៅ និងធំ ដែលផលិតដោយម៉ាស៊ីនរបស់ពួកគេ គឺជាលក្ខណៈពិសេសមួយ ដែលធ្វើឲ្យមនុស្សខ្លះចង់ទិញម៉ូតូនេះ។

ក្នុងរយៈពេលជាង ១០០ ឆ្នាំមកនេះ Harley Davidson មិនត្រឹមតែជាម៉ូតូសម្រាប់ជិះទេ តែវាបានក្លាយជាចំណែកមួយ នៅក្នុង lifestyle របស់អ្នកប្រើ។ វាប្រើបច្ចេកវិជ្ជាចុងក្រោយបង្អស់ ប៉ុន្តែរក្សាទុកនូវរូបរាងបែបបុរាណ និងអារម្មណ៍ មួយដែលអាចឲ្យអ្នកប្រើប្រាស់ ចងចាំម៉ាកយីហោយ៉ាងច្បាស់។ Harley-Davidson គឺនិយាយអំពីសេរីភាពផ្ទាល់ខ្លួន - All For Freedom: Freedom For All។ អ្នកជិះនឹងទទួលបាននូវសេវាកម្មលំដាប់កំពូល, ការចូលរួមនិងការរំភើប។

ទាំងនេះជាហេតុផល ដែលក្រុមហ៊ុន HGB Group នាំយក Harley-Davidson មកកាន់ប្រទេសកម្ពុជា ដើម្បីនាំយកនូវផលិតផល ដែលពិភពលោកកើតសរសើរ ឲ្យកាន់តែខិតជិតអ្នកប្រើប្រាស់ និង​ស្រឡាញ់ម៉ូតូធំនៅកម្ពុជា។

ក្នុងពិធីសម្ពោធនេះ មានការចូលរួមពី ក្រុមអ្នកជិះម៉ូតូ Harley-Davidson® នង ក្រុមអ្នកជិះម៉ូតូធំៗយ៉ាងច្រើន នៅទូទាំងប្រទេសកម្ពុជា រួមជាមួយភ្ញៀវកិត្តិយសជាតិ និង អន្តរជាតិផងដែរ។

លោក Johan Kleinsteuber នាយកចាត់តាំងនៃក្រុមហ៊ុន Harley-Davidson Asia Emerging Markets បានថ្លែងថា «យើងមានក្តីរំភើប ក្នុងការពង្រីកបណ្តាញ ចែកចាយផ្តាច់មុខ ទៅកាន់ក្រុមហ៊ុនដ៏គួរឲ្យទុកចិត្តរបស់យើង នៅប្រទេសកម្ពុជា។ ម៉ូតូដែលផ្តល់ឲ្យអ្នកនូវបទពិសោធ ដែលគ្មានគូប្រៀប Harley-Davidson ពេលនេះគឺកាន់តែចូល ទៅជិតនឹងអ្នកដែលចូលចិត្ត ជិះម៉ូតូធំនៅក្នុងប្រទេសកម្ពុជា និងនៅទូទាំងទ្វីបអាស៊ី​​ ដែលជួយពួកគេបំពេញក្តីសុបិន្តរបស់ពួកគេ ក្នុងការស្វែងរកសេរីភាព ផ្ទាល់ខ្លួន»។

លោកបន្តថា «អគារតាំងលក់ថ្មី នឹងផ្តល់ជូននូវ ម៉ូតូ Harley គ្រប់ម៉ាក គ្រប់ប្រភេទ រួមទាំង Softail ស៊េរី ២០១៨ ចុង​ក្រោយ ដែលផ្តល់ជូននូវបទពិសោធន៍ ពិតប្រាកដនិងមានតម្លៃសមរម្យ សម្រាប់អ្នកជិះម៉ូតូធំជំនាន់ថ្មី។ ក្នុងអគារតាំងលក់ថ្មីនោះ ក៏មានផ្តល់ សេវាកម្មជួសជុល និងថែទាំម៉ូតូដ៏ទំនើប និងគ្រឿងបន្លាស់ original សម្រាប់ម្ចាស់ម៉ូតូ​ក្នុងការច្នៃ និង​តុបតែងម៉ូតូរបស់ពួកគេ ក៏ដូចជាមានលក់សម្លៀកបំពាក់ និងឧបករណ៍ការពារផ្សេងៗ សម្រាប់អ្នកជិះ។ ម៉ូតូHarley នឹងក្លាយជាហេតុផលមួយ សម្រាប់អ្នកជិះម៉ូតូធំក្នុងស្រុក ចូលរួមចែករំលែកចំណង់ចំណូលចិត្ត របស់ពួកគេសម្រាប់ការជិះ ជាមួយគ្នាទៅកាន់តំបន់ស្អាតៗជាច្រើន នៅទូទាំងប្រទេសកម្ពុជា!»។

លោក Steve Beattie អ្នកចាត់ការទូទៅបាននិយាយថា «យើងមានមោទនភាព និងរីករាយយ៉ាងខ្លាំង ចំពោះការនាំយក Harley-Davidson មកកាន់ប្រទេសកម្ពុជា។ អគារតាំងលក់ និងសេវាកម្មផ្តល់ជូននូវភាពឈានមុខ នៅក្នុងតំបន់ ហើយយើងប្តេជ្ញាយ៉ាងពេញលេញ ក្នុងការផ្តល់ជូននូវកម្រិតសេវាកម្ម និងបទពិសោធន៍ដ៏ល្អបំផុតរបស់អតិថិជន»។
យើងសូមថ្លែងអំណរគុណ ដល់អ្នកជិះ Harley-Davidson ដែលមាននៅភ្នំពេញ តាំងពីមុនការមកដល់របស់យើង ចំពោះការគាំទ្ររបស់ពួកគេ ហើយយើងសង្ឃឹមថា នឹងមានអ្នកជិះថ្មីៗជាច្រើននាក់ទៀត នៅក្នុងប្រទេសកម្ពុជា។

អគារតាំងលក់ថ្មី មានទីតាំងនៅមហាវិថីរុស្ស៊ី នៅទល់មុខព្រលានយន្តហោះភ្នំពេញ។ Harley-Davidson ភ្នំពេញ នឹងផ្តល់ជូននូវបទពិសោធន៍ នូវអារម្មណ៍ជាម្ចាស់កម្មសិទ្ធិ របស់ Harley-Davidson៕