(វ៉ាស៊ីនតោន)៖ បន្ទាប់ពីប្រធានាធិបតីអាមេរិក លោក ដូណាល់ ត្រាំ មិនបានទទួលស្គាល់ថា អ៊ីរ៉ង់បានគោរពប្រតិបត្តិយ៉ាងខ្ជាប់ខ្លួន ចំពោះកិច្ចព្រមព្រៀងនុយក្លេអ៊ែរ ប្រមុខការទូតជប៉ុន នាពេលនេះបានចេញមុខអះអាងថា ទីក្រុងតូក្យូគាំទ្រពេញទំហឹងចំពោះកិច្ចព្រមព្រៀងនេះ ហើយក៏ពុំឃើញមានការបំពានណាមួយ ដោយទីក្រុងតេហេរ៉ង់ឡើយ។ នេះបើតាមការចេញផ្សាយ ដោយសារព័ត៌មានរុស្ស៊ី Sputnik នៅរសៀលថ្ងៃសៅរ៍ ទី១៦ ខែធ្នូ ឆ្នាំ២០១៧។
ថ្លែងក្នុងអំឡុងការធ្វើសន្និសីទមួយ នៅឯទីស្នាក់ការអង្គការសហប្រជាជាតិ រដ្ឋមន្រ្តីការបរទេសជប៉ុន លោក Taro Kono បាននិយាយថា ប្រទេសជប៉ុនពិតជាគាំទ្រកិច្ចព្រមព្រៀងនុយក្លេអ៊ែរអ៊ីរ៉ង់ ហៅកាត់ថា JCPOA ហើយមកទល់វេលានេះ ទីក្រុងតូក្យូអាចបញ្ជាក់បានថា ពុំមានការំលោភបំពានណាមួយ ត្រូវបានធ្វើឡើងដោយភាគីអ៊ីរ៉ង់នោះឡើយ។
កិច្ចព្រមព្រៀង JCPOA ត្រូវបានចុះហត្ថលេខាកាលពីខែកក្កដា ឆ្នាំ២០១៥ រវាងភាគីអ៊ីរ៉ង់ និងភាគីម្ខាងទៀតរួមមានចិន បារាំង រុស្ស៊ី ចក្រភពអង់គ្លេស សហរដ្ឋអាមេរិក និងអាល្លឺម៉ង់។ ដោយបានចូលជាធរមានកាលពីខែមករា ឆ្នាំ២០១៦ កិច្ចព្រមព្រៀងបាននាំឲ្យមានការដកទណ្ឌកម្មបន្តិចម្តងៗ លើផ្នែកសេដ្ឋកិច្ច និងការទូត ដែលត្រូវបានដាក់ទៅលើប្រទេសអ៊ីរ៉ង់ ដោយលោកខាងលិចជាថ្នូរនឹងការធានាថា កម្មវិធីនុយក្លេអ៊ែរអ៊ីរ៉ង់ នឹងនៅតែបន្តស្ងប់ស្ងាត់ដោយសន្តិភាពជានិច្ច។
គួរជម្រាបថា ជុំវិញរឿងកិច្ចព្រមព្រៀង JCPOA ប្រធានាធិបតីអាមេរិក លោក ដូណាល់ ត្រាំ ពុំបានបញ្ជាក់ទទួលស្គាល់ថា ប្រទេសអ៊ីរ៉ង់បានគោរពប្រតិបត្តិតាមកិច្ចព្រមព្រៀងខាងលើនេះឡើយ៕
