(កំពត)៖ កម្លាំងនគរបាលអន្តរាគមន៍ឈុតខ្មៅពិសេសខេត្ត សហការជាមួយកម្លាំងអធិការដ្ឋាននគរបាលក្រុងកំពត ដោយមានការចង្អុលបង្ហាញ និងបញ្ជានីតិវិធី ពីលោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត បានចុះបង្ក្រាបករណីចែកចាយ និងប្រើប្រាស់គ្រឿងញៀន មួយកន្លែងថ្ងៃទី១៥ ខែធ្នូ ឆ្នាំ២០១៧នេះ នៅភូមិសុវណ្ណសាគរ សង្កាត់កំពង់កណ្តាល ក្រុងកំពត ដោយឈានទៅឃាត់ខ្លួនបានជនសង្ស័យជនជាតិអូរស្ត្រាលីម្នាក់ និងប្រពន្ធខ្មែរ។
លោកវរសេនីយ៍ទោ លក ញ៉ាវ នាយការិយាល័យគរបាលព្រហ្មទណ្ឌកម្រិតស្រាលខេត្ត ដែលជាអ្នកដឹកនាំកម្លាំងបង្ក្រាប ករណីគ្រឿងញៀនខាងលើ បានឲ្យដឹងថា ជនសង្ស័យ ឈ្មោះ KNOWLES GARY ROBERT KNOWLES អាយុ៧២ឆ្នាំ និងឈ្មោះ មាស ផារី ជាប្រពន្ធ អាយុ២៨ឆ្នាំ ស្នាក់នៅភូមិសង្កាត់ កន្លែងឃាត់ខ្លួនខាងលើ។
បើតាមលោកនាយការិយាល័យ វត្ថុតាងដកហូតបាន រួមមាន ជញ្ជីងថ្លឹងគ្រឿងញៀនមួយ ម្ស៉ៅក្រាមពណ៌សថ្លា ចំនួន០៦កញ្ចប់ ថ្នាំយ៉ាម៉ាពណ៌ផ្កាឈូក ៥គ្រាប់កន្លះ ថ្នាំសម្រើប៩ប្រអប់ ឧបករណ៍ជក់មួយកំផ្លេ ទូរស័ព្ទដៃ៥គ្រឿង ប្រាក់រៀន៥០ម៉ឺន និងប្រាក់ដុល្លារ៣០០ដុល្លារ ព្រមទាំងសម្ភារៈមួយចំនួនទៀត។
ក្រោយឃាត់ខ្លួនបានជនសង្ស័យទាំង២នាក់ ត្រូវបាននាំមកសាកសួរបន្ដនៅការិយាល័យនគរបាលជំនាញគ្រឿងញៀនខេត្ត ដើម្បីកសាងសំណុំចាត់ការតាមនីតិវិធី៕
