(ភ្នំពេញ)៖ សម្ដេច​ក្រឡាហោម ស ខេង ឧបនាយករដ្ឋមន្ដ្រី ​និងជារដ្ឋមន្ដ្រី​ក្រសួង​មហាផ្ទៃ បានថ្លែងឲ្យដឹងថា សម្តេចចង់ឲ្យប្ដូរ ឬបន្ថែមឈ្មោះនាយកដ្ឋានកិច្ចការប៉ុស្ដិ៍រដ្ឋបាល ទៅជានាយកដ្ឋានកិច្ចការប៉ុស្ដិ៍រដ្ឋបាល និងប្រជាការពារ។

ការប្រកាសឲ្យចង់ដូរ ឬបន្ថែមឈ្មោះនាយកដ្ឋានកិច្ចការប៉ុស្តិ៍រដ្ឋបាល តាមរយៈការបន្ថែមពាក្យ «ប្រជាការពារ» នៅខាងក្រោយ យ៉ាងដូច្នេះ ក៏ព្រោះសម្តេចក្រឡាហោម បានចាត់ទុកថា ក្រុមប្រជាការពារនៅតាមភូមិ ជាកម្លាំងដ៏សំខាន់មួយ ក្នុងការជួយការងារដល់កម្លាំងនគរបាលប៉ុស្តិ៍រដ្ឋបាល។ នេះជាការលើកឡើងរបស់សម្ដេច​ក្រឡាហោម ស ខេង នៅ​ព្រឹក​ថ្ងៃទី១៣ ខែ​ធ្នូ ឆ្នាំ​២០១៧​នេះ ក្នុង​សន្និបាត​ប៉ុស្ដិ៍​នគរបាល​ទូទាំង​ប្រទេស លើក​ទី​២ និង​ការអនុវត្ត​ការងារ​នគរបាល និង​សហគមន៍​។​

​ពិធីនេះ ត្រូវបានធ្វើឡើងនៅមជ្ឈមណ្ឌលសន្និបាតកោះពេជ្រ ដោយ​មាន​ការចូលរួម​ពី​នាយ​ឧត្តមសេនីយ៍ សន្ដិបណ្ឌិត នេ​ត សាវឿន អគ្គស្នងការ​នគរបាល​ជាតិ អភិបាលខេត្តនានា ព្រមទាំងមន្ដ្រី​នគរបាល​ ​មន្ដ្រី​ពាក់​ព័ន្ធ ជាច្រើនរូបផងដែរ។

បើតាមព័ត៌មានមួយចំនួនពីមូលដ្ឋានដែលអង្គភាពព័ត៌មាន Fresh News ទទួលបាននោះគឺថា រឿងប្រជាការពារតាមមូលដ្ឋានគ្មានប្រាក់ខែទេ។ ជាក់ស្តែងក្រុមប្រជាការពារទាំងនេះ អាចរកចំណូលបានដោយខ្លួនឯង គឺបើមានកម្មវិធីបុណ្យ ឬការផ្សេងៗ ពួកគេទទួលបានកញ្ចប់ថវិកាមួយចំនួន ដែលម្ចាស់កម្មវិធីផ្តល់ជូន ដើម្បីសន្សំទុកសម្រាប់ជួយសមាជិកណា ដែលជួបបញ្ហានៅពេលណាមួយ។

ដោយឡែកសម្ភាររួមមាន៖ ដំបងឆក់ ខោអាវ មួក និងអាយកូមជាដើមនោះ ពួកគាត់ខ្លះបានស្នើសុំពីថ្នាក់ឃុំ គណៈពង្រឹង និងសប្បុរសជននានា។ នៅពេលបច្ចុប្បន្ន ក្រុមប្រជាការពារ ត្រូវបានប្រជាពលរដ្ឋចាត់ទុកថា ជាក្រុមមួយដ៏សំខាន់ណាស់ មិនអាចមើលរំលងបានទេ ដើម្បីជួយទប់ស្ថានការជាមួយនគរបាលប៉ុស្តិ៍ដែលមានចំនួនតិចតួចបំផុត នៅតាមប៉ុស្តិ៍នីមួយៗ។ ដូច្នេះមានការលើកឡើងថា បើមានកញ្ចប់ថវិកាណាមួយជូនពួកគាត់ ​ចឹងពួកគាត់​រឹតតែប្រឹងប្រែង សម្រាប់ការពារភូមិថែមទៀត និងពង្រឹងសមាជិកភូមិកាន់តែខ្លាំង៕