(ភ្នំពេញ)៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានជំរុញឲ្យតាមដានព្រឹត្តិការណ៍នយោបាយ នៅអ៉ីស្រាអ៊ែល និងប៉ាឡេស្ទីន ក្រោយសហរដ្ឋអាមេរិក ដែលមានប្រធានាធិបតីដូណាល់ ត្រាំ ប្រកាសទទួលស្គាល់ក្រុងហ្សេរុយសាឡឹម ជារដ្ឋធានីរបស់អ៉ីស្រាអ៊ែល។

ការមានប្រសាសន៍ខាងលើនេះ របស់​សម្ដេចតេជោ ហ៊ុន សែន បានធ្វើឡើង​នៅព្រឹកថ្ងៃទី១២ ខែធ្នូ ឆ្នាំ២០១៧នេះ ក្នុងឱកាសសម្ដេចអញ្ជើញជាអធិបតី សម្ពោធដាក់ឲ្យប្រើប្រាស់នូវហេដ្ឋារចនាសម្ព័ន្ធ អាគារហ្វឹកហ្វឺនជំនាញចារកម្ម និងបុកគ្រឹះសាងសង់សាលប្រជុំ នៃអគ្គនាយកដ្ឋានស្រាវជ្រាវ ចារកិច្ច ស្ថិតនៅក្នុងខណ្ឌព្រែកព្នៅ។

បើតាមសម្ដេចតេជោ ហ៊ុន សែន, ការទទួលស្គាល់របស់ប្រធានាធិបតីអាមេរិក លោក ដូណាល់ ត្រាំ ចំពោះទីក្រុងហ្សេរុយសាឡឹម នាពេលនេះ បានក្លាយទៅជា ចំណាប់អារម្មណ៍ នៃបណ្ដាប្រទេសទាំងអស់នៅលើពិភពលោក ហើយប្រទេសខ្លះទៀត ក៏ចាប់ផ្ដើមមានបាតុកម្ម និងប្រឈមមុខដាក់គ្នាផងដែរ។​

សម្ដេចតេជោ នាយករដ្ឋមន្ដ្រី បានមានប្រសាសន៍យ៉ាងដូច្នេះថា «​បញ្ហាថ្មីបំផុតគឺបញ្ហាអាមេរិក តាមរយៈប្រធានធិបតី ដូណាល់ ត្រាំ ទទួលស្គាល់ ហ្សេរ៉ូសាឡឹម ជារដ្ឋធានីអ៉ីស្រាអ៊ែល នេះទើបជារឿងដែលទាមទារឲ្យត្រូវតាមដាន ដោយប្រុងប្រយ័ត្នបំផុត រឿងនេះធំណាស់»។

សូមជម្រាបថា ការសម្រេចចិត្តទទួលស្គាល់ទីក្រុងហ្សេរុយសាឡឹម ជារដ្ឋធានីរបស់អ៉ីសា្រអែល ពីសំណាក់ប្រធានាធិបតីអាមេរិក លោក​ ដូណាល់ ត្រាំបាននិងកំពុងបង្កឱ្យ មានភាពចលាចលកាន់តែខ្លាំងរវាងប៉ាឡេស្ទីន និងអ៉ីសា្រអែល។

មិនតែប៉ុណ្ណោះ បាតុកម្មតវ៉ាប្រឆាំងនឹងការសម្រេចចិត្តនេះ ក៏ត្រូវបានធ្វើឡើងផងដែរ នៅតាមបណ្ដាប្រទេស អ្នកកាន់សាសនាអ៉ីស្លាមភាគច្រើន ខណៈបណ្ដាប្រទេសអារ៉ាប់ និងសម្ព័ន្ធមិត្តអាមេរិកមួយចំនួន នៅអឺរ៉ុបដូចជាបារាំង អង់គ្លេស និងអាល្លឺម៉ង់សុទ្ធ តែបង្ហាញការជំទាស់នឹងការសម្រេចចិត្ត របស់លោកត្រាំ៕