(ព្រះសីហនុ)៖ ចៅក្រមស៊ើបសួរ នៃសាលាដំបូងខេត្តព្រះសីហនុ លោក កែវ មុនី នៅថ្ងៃទី១១ ខែធ្នូ ឆ្នាំ២០១៧នេះ បានចេញដីកាបង្គាប់ឲ្យឃុំខ្លួន ជនជាតិចិន៣នាក់ ដែលត្រូវបានកម្លាំងនគរបាលខេត្តព្រះសីហនុ បង្រ្កាបបាននាពេលកន្លងទៅ ពាក់ព័ន្ធករណីចាប់ជំរិតទារប្រាក់៨០ម៉ឺនដុល្លារ។ នេះបើតាមដីកាបង្គាប់ឲ្យឃុំខ្លួន ដែលអង្គភាព Fresh News ទទួលបាននៅល្ងាចថ្ងៃនេះ។

ជាមួយគ្នានោះដែរ អភិបាលខេត្តព្រះសីហនុ លោក យន្ដ មីន បានចេញលិខិតថ្លែងអំណរគុណ កម្លាំងនគរបាលខេត្តព្រះសីហនុ ក្រោមការបញ្ជាផ្ទាល់ពីលោកឧត្តមសេនីយ៍ទោ ជួន ណារិន្ទ ដែលបានខិតខំប្រឹងប្រែង មិនខ្លាចនឿយហត់ ដើម្បីការពារសន្ដិសុខ សណ្ដាប់ធ្នាប់សង្គម ជាពិសេសនាពេលថ្មីៗនេះ​ បានបង្ក្រាបក្រុមជនជាតិចិនចាប់ជំរិតបានសម្រេច។

កម្លាំងនគរបាលខេត្តព្រះសីហនុ ក្រោមការបញ្ជាផ្ទាល់ពីលោកឧត្ត​សេនីយ៍ទោ ជួន ណារិន្ទ ស្នងការនគរបាលខេត្ត បានបើកប្រតិបត្តិការពេញមួយយប់ទល់ភ្លឺ ដើម្បីបង្ក្រាបក្រុមជនជាតិចិន ដែលបានចាប់ជំរិតទារប្រាក់ទ្រង់ទ្រាយធំ ដោយដកហូតបានអាវុធខ្លីទំនើបមួយដើម និងរថយន្ដទំនើប២គ្រឿងផងដែរ។

ជាកស្ដែងនៅ​ព្រឹក​ថ្ងៃ​ទី​១​០ ​ខែ​ធ្នូ​ ឆ្នាំ​២០១៧​​​ លោក​ឧត្តម​សេនីយ៍​ទោ ជួន​ ណា​រិន្ទ បានធ្វើសន្និសីទកាសែត ដើម្បីប្រាប់​អំពើករណី​ចាប់ជំរិត​ជនជាតិចិននេះ​ បាន​កើតឡើង​​នៅ​យប់ថ្ងៃទី​៨-៩ ខែធ្នូ ឆ្នាំ២០១៧​​ ស្ថិតនៅចំណុចក្រុមទី១ ភូមិ៥ សង្កាត់៤ ក្រុងព្រះសីហនុ។

លោកឧត្តមសេនីយ៍ទោ ជួន ណារិន្ទ បានបញ្ជាក់ថា ប្រតិបត្ដិបង្ក្រាបដោយជោគជ័យនេះ ត្រូវបានធ្វើឡើងដោយកម្លាំងនគរបាលរបស់លោក សហការជាមួយកម្លាំងនាយកដ្ឋានសន្ដិសុខផ្ទៃ និងកម្លាំងនាយកដ្ឋាននគរបាលព្រហ្មទណ្ឌ ក្រសួងមហាផ្ទៃ ក្រោមការសម្របសម្រួលពីតំណាងអយ្យការ និងការចង្អុលបង្ហាញពីគណៈបញ្ជាការ​ឯកភាពខេត្ត។

បើតាមលោកឧត្តមសេនីយ៍ស្នងការ ​ក្រុម​ជនសង្ស័យ​បាន​រៀប​ផែនការ​យ៉ាង​ល្អិតល្អន់​ តាម​ដាន​ឃ្លាំមើល​ជន​រង​គ្រោះ​​ធ្វើ​ដំណើរ​ ពេល​ជនរងគ្រោះ​បើ​ក​រថយន្ដម៉ាក PORSCHE​ ម្នាក់​ឯង​​មក​ដល់កន្លែង​ស្ងាត់​ ចំណុច​ជិត​ស្ថានីយ​ចំរោះ​ទឹក​ នៅអូរឈើទាល់​សង្កាត់​លេខ​៤​ ក្រុម​ជនសង្ស័យ​មាន​គ្នា​ចំនួន​៣​នាក់​ បាន​បើក​រថយន្ដ​ Lexus ស្ទាក់​គៀរ ពេលនោះ​ជនរងគ្រោះ​ បាន​ឈប់​រថយន្ត​ដើម្បី​សួរ​នាំ​ ក៏ត្រូវ​ពួក​ជន​ល្មើស​យក​កាំភ្លើង​ភ្ជង់​ ចាប់​ក្រៀក​ដាក់​ឡាន​សង្កត់​ក្បាល​ ចុះ​ក្រោម​ ចង​ដៃ​ដោ​យ​ខ្សែ​រឹត ​(ខ្សែ​ស៊ី​ល​)​ ហើយ​នាំ​ខ្លួន​យក​មក​បង្ខាំង​ទុក​នៅ​ផ្ទះ​ជួល​ បុរី​BS អូរ​ទី​១​ សង្កាត់​លេខ​៤​ ក្រុង​ព្រះសីហនុ។

បើតាមលោកឧត្តមសេនីយ៍ទោ ជួន ណារិន្ទ បន្ទាប់​មកក្រុមជនសង្ស័យបាន​ទុក​គ្នា​ម្នាក់​ឲ្យ​យាម​ជន​រង​គ្រោះ​ រីឯគ្នា​២​នាក់​ទៀត​ បាន​បើក​ឡាន​របស់​ជន​រង​គ្រោះ​ម៉ាក ​PORSCHE យកទៅ​ផ្លុង​ចោល​នៅ​ បេន​ឡាន​ចាស់​ ជិត​កាំ​កុងត្រូល​។ ​ប្រមាណ​ជិត​២ម៉ោង ក្រោយ​មក​​ក្រុម​ជន​សង្ស័យ​បាន​ទូរសព្ទ​ជំរិត​ ទារ​ប្រាក់​ពី​ប្អូន​ជន​រង​គ្រោះ​ចំនួន​៨​០​ម៉ឺន​ដុល្លារ​។

ជនសង្ស័យដែលកម្លាំងនគរបាលជំនាញ បង្ក្រាបបានទាំង៣នាក់នោះ ទី១៖ឈ្មោះ ​ZHENG RONGMAO ​អាយុ​២៦ឆ្នាំ, ទី២៖ឈ្មោះ DAI HONGDA ​​អាយុ​២៣ឆ្នាំ និងទី៣​៖ឈ្មោះ LIN JINPEI អាយុ​២៤ឆ្នាំ​។ ក្នុងប្រតិបត្តិការនេះ កម្លាំងជំនាញដកហូតបាន កាំភ្លើងខ្លី​ម៉ាក BERITA STOM ១​ដើម​ មាន​បង់២ ​គ្រាប់ចំនួន១០គ្រាប់,​ កូនកាំប៊ិតមួយ,​ ខ្សែចងរឹត​ (ស៊ីល) ២ដុំ​​, ​ទូរស័ព្ទដៃ៦គ្រឿង និង​​រថយន្តលុចសីស RX300​ ចំនួន១​គ្រឿង និងរថយន្ដទំនើបរបស់ជនរងគ្រោះ​។ ដោយឡែកជនរងគ្រោះឈ្មោះ LI FUJIE ភេទប្រុស អាយុ​៤៧ឆ្នាំ ក៏បានសមត្ថកិច្ចរំដោះបានផងដែរ។

បើតាមការបញ្ជាក់របស់លោកស្នងការ ប្រសិនបើក្រុមនេះធ្វើសកម្មភាពបានសម្រេច ពួកគេនឹងហៅគ្នីគ្នាមកពីប្រទេសចិនបន្ថែមទៀត មកពីធ្វើសកម្មភាពចាប់ជំរិតក្រុមអ្នករកស៊ីជាជនជាតិចិនដែលមានលុយ ​ប៉ុន្ដែជាអកុសលក៏ត្រូវកម្លាំងនគរបាលបង្ក្រាបបានទាន់ពេល។

​លោក​ឧត្តម​សេនីយ៍​ស្នងការ​ បាន​បញ្ជាក់​ថា​ ក្រុម​ជន​សង្ស័យ​ទាំង​នេះ​ មក​ពី​ប្រទេស​ចិន​បាន​ប្រើ​ប្រាស់​លិខិត​ឆ្លងដែន​ ពីរ​ផ្សេង​ៗ​គ្នា​ លិខិត​ពិតប្រាកដ​​សម្រាប់​ការ​ធ្វើទិដ្ឋាការ​ធ្វើ​ដំណើរ​ លិខិត​ក្លែង​ក្លាយ​សម្រាប់​ការ​ជួល​រថយន្ត​ និង​ជួលផ្ទះ​ ដើម្បី​ងាយ​ផ្លាស់​ប្តូរ​អត្តសញ្ញាណ​ ទីតាំង​គេច​ខ្លួន​ក្រោយ​ពេល​បែក​ការណ៍​ ហើយ​ក្រុម​នេះ​ មក​ប្រទេស​កម្ពុជា​ដើម្បី​តាម​សម្គាល់​មើល​​អ្នក​វិនិយោគ​ចិន​ ដែល​មាន​លុយ​ច្រើន​ ដោយ​បាន​កត់​លេខ​រថយន្ត​ចំនួន​៦​គ្រឿង​ មាន​បំណង​ចាប់​ជំរិត​ ប៉ុន្តែ​ទើប​​ប្រព្រឹត្ត​បាន​មួយ​លើក​ ក៏ត្រូវ​​កម្លាំងនគរបាលបង្ក្រាបបានតែម្ដង៕