(ភ្នំពេញ)៖ លោក នុត ពុធដារ៉ា ជំនួយការសម្តេចតេជោ ហ៊ុន សែន និងជាអភិបាលខណ្ឌដង្កោ នៅព្រឹកថ្ងៃទី១១ ខែធ្នូ ឆ្នាំ២០១៧នេះ បានចុះសំណេះសំណាលសួរសុខទុក្ខ និងស្វែងយល់ពីតម្រូវការសំណើ និងបញ្ហាផ្សេងៗ របស់បងប្អូនប្រជាពលរដ្ឋ ក្នុងភូមិធម្មត្រ័យ សង្កាត់ព្រៃស។
ក្នុងឱកាសនោះ លោកអភិបាលខណ្ឌដង្កោ ក៏បានពិនិត្យមើល គម្រោងស្ថាបនាផ្លូវបេតុ០២ខ្សែ ប្រវែងសរុប២,៤២៨ម៉ែត្រ ក្នុងភូមិធម្មត្រ័យ និងភូមិ២៤ សង្កាត់ព្រៃស។
លោក នុត ពុធដារ៉ា បានលើកឡើងអំពីការអភិវឌ្ឍន៍រីកចម្រើនរបស់ប្រទេសជាតិ ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រី ដែលបាននាំយកការនូវសុខសន្តិភាព និងការអភិវឌ្ឍលើគ្រប់វិស័យនៅទូទាំងប្រទេស។ តួយ៉ាងផ្លូវថ្មីចំនួន០២ខ្សែ ដែលគ្រោងនឹងស្ថាបនានាពេលខាងមុខនេះ និងជួយសម្រួលដល់ការធ្វើដំណើររបស់បងប្អូនប្រជាពលរដ្ឋក្នុងមូលដ្ឋាន។
លោកអភិបាល ក៏បានផ្តាំផ្ញើសាកសួរសុខទុក្ខពីសំណាកសម្តេចតេជោ និងសម្តេចកិត្តិព្រឹទ្ធបណ្ឌិត ជូនដល់បងប្អូនទាំងអស់ និងបានលើកឡើងអំពីការយកចិត្តទុកដាក់របស់សម្តេចទាំងពីរ ដែលតែងគិតគូពីការលំបាក និងបញ្ហាប្រឈមនានារបស់ប្រជាពលរដ្ឋទាំងអស់ក្នុងមូលដ្ឋាន។
ជាមួយគ្នានោះ បងប្អូនប្រជាពលរដ្ឋភូមិទ័ពបោះ និងត្រពាំងស្វាយ បានធ្វើការថ្លែងអំណរគុណ ចំពោះការយកចិត្តទុកដាក់របស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត និងអាជ្ញាធរគ្រប់លំដាប់ថ្នាក់ ដែលបានគិតគូរពីការលំបាករបស់ពួកគាត់ និងបានដោះស្រាយជូនបានទាន់ពេលវេលា៕
