(ភ្នំពេញ)៖ ម្ចាស់ក្រុមហ៊ុននាំចេញអង្ករដ៏ល្បីមួយ បានគំរាមពីផលអវិជ្ជមាន ចំពោះវិស័យកសិកម្មកម្ពុជា ប្រសិនបើប្រជាកសិករ នៅតែបន្តប្រើប្រាស់ ថ្នាំគីមីលើសកម្រិត និងអះអាងថា ប្រសិនបើកម្ពុជា មិនចង់ក្លាយជាប្រទេសវៀតណាមទី២ទេនោះ សូមកសិករពិចារណា ឲ្យច្បាស់និងប្រើប្រាស់ថ្នាំ សម្លាប់សត្វល្អិតឲ្យបានត្រឹមត្រូវ។

ថ្លែងក្នុងកិច្ចសម្ភាស៍ជាមួយបណ្តាញព័ត៌មាន Fresh News លោក សុង សារ៉ន អគ្គនាយកក្រុមហ៊ុន Amru Rice បានថ្លែងថា  «យើងដឹងហើយ ពិភពលោកបច្ចុប្បន្ន គេងាកទៅរកបញ្ហាសុខភាព ក្នុងករណីការប្រើប្រាស់សារជាតិគីមីមិនបាន ត្រឹមត្រូវតាម​ការណែនាំ នោះនាំឲ្យមុខរបររបស់យើងធ្លាក់ចុះ។ ដូច្នេះខ្ញុំស្នើឲ្យកសិករទាំងអស់ មុននឹងប្រើប្រាស់ថ្នាំអ្វីមួយ សូម​អានសេចក្តីណែនាំ ឲ្យបានត្រឹមត្រូវ ធ្វើទៅតាមបច្ចេកទេស​ កុំប្រើប្រាស់ទៅតាមអ្វីដែលខ្លួនឯងចង់ប្រើ។ យើងមិនអាចចេះតែប្រើលើសកំណត់ទេ ព្រោះវានឹងធ្វើឲ្យមានសល់ សារធាតុពុល នៅក្នុងអង្ករ។ កម្ពុជាយើង បើយើងធ្វើបែបនេះ (ប្រើប្រាស់ថ្នាំគីមីលើសកម្រិត) យើងនឹងក្លាយជាប្រទេសវៀតណាម ហើយយើងមិនបាច់លក់ចេញទេ គឺលក់មិនឈ្នះវៀតណាមទេអង្ករប្រភេទនេះ ព្រោះវៀតណាមគេធ្វើល្អជាងកម្ពុជា»។  

កសិផលរបស់វៀតណាមកំពុងគំរាមកំហែងយ៉ាងខ្លាំង លើការប្រើប្រាស់សារធាតុគីមីនេះ ប្រជាពលរដ្ឋវៀតណាម ភាគច្រើនមិនហ៊ានហូបបន្លែ ផ្លែឈើ និងកសិផលរបស់ខ្លួននោះឡើយ។ ជាក់ស្តែងរយៈពេល១១ខែ ឆ្នាំ២០១៧នេះ វៀតណាមចំណាយលុយ រហូតដល់ ១.៤ពាន់លានដុល្លារ ដើម្បីទិញបន្លែ ផ្លែឈើពីថៃ និងចិន ដើម្បីឲ្យប្រជាជនបរិភោគ។ នេះបើតាម​ការចេញផ្សាយ​ដោយ ទីភ្នាក់ងារ​ព័ត៌មានចិន ស៊ីនហួរ កាលរសៀល​ថ្ងៃសុក្រ ទី០១ ខែ​ធ្នូ ឆ្នាំ២០១៧៕