(ភ្នំពេញ)៖ រដ្ឋបាលខណ្ឌដង្កោ រួមជាមួយរដ្ឋបាលសង្កាត់ និងយុវជន នៅថ្ងៃទី៣ ខែធ្នូ ឆ្នាំ២០១៧នេះ បានបន្តចុះសំណេះសំណាលសួរសុខទុក្ខបងប្អូនកម្មករ កម្មការិនីនៅតាមផ្ទះជួល និងផ្សព្វផ្សាយបន្ថែម អំពីអត្ថប្រយោជន៍ជាច្រើនដែលសម្តេចតេជោ​នាយករដ្ឋមន្ត្រី បានផ្តល់ជូនដល់បងប្អូនកម្មករនារយៈពេលកន្លងមក និងនៅឆ្នាំ២០១៨ខាងមុខ ដើម្បីឲ្យកាន់តែយល់ជ្រួតជ្រាបបន្ថែមទៀត។

មន្រ្តីសាលាខណ្ឌដង្កោ បានបញ្ជាក់ថា សម្រាប់យុទ្ធនាការសប្ដាហ៍នេះ ក្រុមការងាររបស់រដ្ឋបាលខណ្ឌ បានចុះសំណេះសំណាល និងផ្សព្វផ្សាយដល់ផ្ទះជួលកម្មករនៅតាមគោលដៅមួយចំនួន នៅសង្កាត់ចំនួន៣រួមមាន៖ សង្កាត់ដង្កោ សង្កាត់ពងទឹក និងសង្កាត់សាក់សំពៅ។

ក្នុងឱកាសនោះ ក្រុមការងារបាន​ផ្សព្វផ្សាយអត្ថប្រយោជន៍ជាច្រើន ដែលជាគោលនយោបាយរបស់សម្តេចតេជោ ​ហ៊ុន សែន នាយករដ្ឋមន្ត្រី ផ្តល់ជូនដល់កម្មករ រួមមាន៖ ប្រាក់ឈ្នួលអប្បបរមា ១៧០ដុល្លារ ក្នុងមួយខែ (ប្រាក់ខែគោល) និងបូករួមប្រាក់អត្ថប្រយោជន៍ផ្សេងៗទៀត ការបញ្ចុះតម្លៃអគ្គិសនី បញ្ចុះតម្លៃទឹកស្អាត។ ការផ្តល់ការគាំពារសន្តិសុខសង្គម ដល់កម្មករ ចាប់ពីខែមករា ឆ្នាំ២០១៨ គឺម្ចាស់ក្រុមហ៊ុនទាំងអស់ ត្រូវបង់ថ្លៃរបបសន្តិសុខសង្គម១០០ភាគរយ ដល់កម្មករ កម្មការិនី ដែលបងប្អូនកម្មករ អាចនៅសល់ប្រាក់ប្រមាណ​៨,០០០រៀល ទៅ​១២,០០០រៀល។

ជាមួយគ្នានេះ កម្មករ កម្មការិនីទាំងអស់ ទទួលបានការពិនិត្យព្យាបាលជំងឺនៅមន្ទីរពេទ្យរដ្ឋ ដោយឥតគិតថ្លៃតាមរយៈមូលនិធិសមធម៌។ ចំពោះស្ត្រីមានផ្ទៃពោះ សម្រាលកូន នឹងទទួលបានការឈប់សម្រាកពីការងារ រយៈពេល០៣ខែ និងទទួលបានប្រាក់ខែ១២០ភាគរយ លើសពីនេះ កម្មការិនី នឹងទទួលបានប្រាក់ឧបត្ថម្ភពីរាជរដ្ឋាភិបាល នៅពេលសម្រាលកូនដោយ អ្នកសម្រាលកូន០១ ទទួលបាន៤០ម៉ឺនរៀល អ្នកសម្រាលកូនភ្លោះ០២ បានទទួល៨០ម៉ឺនរៀល និងអ្នកសម្រាលកូនភ្លោះ០៣ ទទួលបាន១លាន ២០ម៉ឺនរៀល។

កម្មករកម្មការិនី ទទួលបានសេវាជិះរថយន្តក្រុងសាធារណៈ របស់រដ្ឋបាលរាជធានីភ្នំពេញ ដោយឥតគិតថ្លៃ (Free) រយៈពេល​០២ឆ្នាំ (ពីខែសីហា ឆ្នាំ២០១៧-​ខែសីហា ឆ្នាំ២០១៩) ហើយនៅឆ្នាំ២០១៩ កម្មករទាំងអស់ នឹងទទួលបានប្រាក់សោធនិវត្តន៍ (ប្រាក់រ៉ឺត្រែត) ដែលនឹងទទួលបានចំនួន៨០ភាគរយនៃប្រាក់ខែ ដែលខ្លួនធ្លាប់ទទួលបាននៅពេលធ្វើការចុងក្រោយ។

រដ្ឋបាលខណ្ឌ បានសំណូមពរដល់ម្ចាស់ផ្ទះជួលកុំឲ្យតម្លើងថ្លៃផ្ទះជួល ដើម្បីជួយឲ្យបងប្អូនកម្មករ មានលទ្ធភាពរកប្រាក់ចំណូល បានបន្ថែម និងជីវភាពប្រសើរឡើង ហើយម្ចាស់ផ្ទះជួលបានឯកភាព ទៅតាមអនុសាសន៍អំពាវនាវ របស់សម្តេចតេជោ ហ៊ុន សែន គឺមិនតម្លើងថ្លៃឈ្នួលផ្ទះឡើយ នៅឆ្នាំ២០១៨ខាងមុខ។

ជាមួយគ្នានេះ ក្រុមមន្រ្តីបានសាកសួរអំពីកង្វល់ បញ្ហា និងតម្រូវការនានារបស់បងប្អូនកម្មករ ដើម្បីយកមកដោះស្រាយជូនទាន់ពេលវេលា ដូចជាការងារសន្តិសុខសណ្តាប់ធ្នាប់ អនាម័យបរិស្ថាន ជាដើម។

ក្នុង​ឱកាសនោះ បងប្អូនកម្មករកម្មការិនីទាំងអស់ បានភាពរីករាយ និងអបអរសាទរចំពោះអត្ថប្រយោជន៍ ដែលសម្តេចតេជោ បានផ្តល់ជូនដល់ពួកគាត់កន្លងមក និងបន្ថែមថ្មីៗខាងមុខទៀត ព្រមទាំងថ្លែងអំណរគុណសម្តេចតេជោ ហ៊ុន សែន និងមន្ត្រីរាជការគ្រប់លំដាប់ថ្នាក់ ដែលបានគិតគូរ និងយកចិត្តទុកដាក់ដល់បញ្ហា និងការលំបាកនានារបស់ពួកគាត់ ព្រមទាំងដោះស្រាយជូនបានទាន់ពេលវេលា ធ្វើឲ្យពួកគាត់កាន់តែមានជីវភាពកាន់តែល្អប្រសើរឡើង ក្រោមម្លប់សន្តិភាពនៅទូទាំងប្រទេស ដោយមានសម្តេច​តេជោ ហ៊ុន សែន ជានាយករដ្ឋមន្ត្រី៕