(សៀមរាប)៖ សម្ដេចពិជ័យសេនា ទៀ បាញ់ ប្រធានក្រុមការងារចុះជួយខេត្តសៀមរាប នៅថ្ងៃទី០១ ខែធ្នូ ឆ្នាំ២០១៧នេះ បានជួបសំណេះសំណាលជាមួយ សមាជិករបស់អតីតគណបក្សសង្គ្រោះជាតិ ដែលបានមកសុំចូលរួមជីវភាពនយោបាយជាមួយគណបក្សប្រជាជនកម្ពុជា ក្នុងមូលដ្ឋានខេត្តសៀមរាប។

ក្នុងពិធីសំណេះសំណាលនេះ ក៏មានការចូលរួមពី លោក ឃឹម ប៊ុនសុង ប្រធានគណបក្សប្រជាជនខេត្តសៀមរាប និងថ្នាក់ដឹកនាំ សមាជិក សមាជិការ ជាច្រើនរូបផងដែរ។

សម្តេចពិជ័យសេនា ទៀ បាញ់ បានសម្តែងអំណរគុណ​ ​ចំពោះបងប្អូនអតីតសមាជិក សមាជិកា ក្រុមប្រឹក្សា ឃុំ សង្កាត់ ដែលបានស្ម័គ្រចិត្ត​ប្រកបដោយ​មនសិការ ​មកចូលរួម​ជាមួយ​គណបក្ស​ប្រជាជនកម្ពុជា ដែល​​​​​​​ជាការផ្តល់ឱកាសសម្រាប់បងប្អូនទទួលបាននូវការបម្រើប្រជាជនជាបន្តទៀត ក្រោមឆ័ត្ររបស់​គណបក្ស​​​​​​​​ប្រជាជន​កម្ពុជា ដើម្បីរួមគ្នាធានាបាននូវឯកភាពជាតិ និងសាមគ្គីជាតិ​ក្នុងគោលដៅ​បម្រើ​ប្រជាពលរដ្ឋ​​​​​ឲ្យបានល្អនៅមូលដ្ឋាន​។ ទោះបី​គណបក្ស​សង្រ្គោះជាតិ ​ត្រូវបានរំលាយ​តាម​គោល​ការណ៍​​​​ច្បាប់ក៏ពិតមែន ប៉ុន្តែបងប្អូននៅតែមាន​សិទ្ធិ​សេរីភាព​​ខាង​​​​​​នយោបាយ និងត្រូវបាន​ការពារ​​ស្របតាម​​​រដ្ឋធម្មនុញ្ញ និងច្បាប់ជាធរមាន លើកលែង​តែថ្នាក់​ដឹកនាំ​មួយ​ចំនួន​​ដែលត្រូវតុលាការ​កំពូល​ហាម​ឃាត់​​​ការធ្វើ​សកម្មភាពនយោបាយរយៈពេលប្រាំឆ្នាំប៉ុណ្ណោះ​។

​ទោះបីសភាពការណ៍សកលលោក និងសភាពការណ៍​ក្នុងតំបន់ មានការវិវត្ត​ប្រែប្រួល​យ៉ាងណា​ក្តី​ ក៏​រាជរដ្ឋាភិបាលក្រោមការដឹកនាំរបស់សម្តេចតេជោ ហ៊ុន សែន ដែល​កើត​ចេញពី​គណបក្ស​ប្រជាជន​កម្ពុជា នៅតែបន្ត​ប្រកាន់​​​​ខ្ជាប់​ដោយឥតងាករេ​នូវ​​ឧត្តមគតិ និងបេសកកម្ម​ជាប្រវត្តិ​សាស្រ្ត​របស់​ខ្លួន គឺការរួមសុខ រួមទុក្ខ​ជាមួយ​ប្រជាជន​គ្រប់​កាលៈទេសៈ អនុវត្ត​គោល​នយោបាយ​បង្រួបបង្រួម ផ្សះផ្សាជាតិ និង​ឯកភាព​ជាតិ ដើម្បីប្រមូល​កម្លាំង​សាមគ្គីជាតិ​ក្នុងបុព្វហេតុ​ការពារ​ប្រទេសជាតិ។

សម្តេចពិជ័យសេនា ​សង្កត់ធ្ងន់ថា រាជរដ្ឋាភិបាលកម្ពុជា នៅតែរក្សា​ការ​ប្តេជ្ញា​ចិត្ត​យ៉ាង​មុតមាំក្នុងការការពារដំណើរការ នៃលទ្ធិប្រជាធិបតេយ្យសេរីពហុបក្ស និង​នីតិរដ្ឋ ស្របតាម​រដ្ឋធម្មនុញ្ញ​​នៃ​កម្ពុជា ហើយការ​បោះឆ្នោត​នា​ពេលខាងមុខ​​​​ នឹងត្រូវប្រព្រឹត្ត​ទៅក្រោម​ការ​ចាត់​ចែង រៀបចំរបស់​គណៈ​កម្មា-​ធិការ​ជាតិ​​រៀបចំការបោះឆ្នោត ​ដែល​ជា​​ស្ថាប័នឯករាជ្យ ក្នុងនោះការបោះឆ្នោត​ជ្រើស​​​​​​​តាំងសមាជិកព្រឹទ្ធសភា នឹងត្រូវ​​រៀបចំ​​​​នៅថ្ងៃទី២៥ ខែកុម្ភៈ ឆ្នាំ២០១៧ ហើយការបោះឆ្នោត​ជ្រើស​តាំង​តំណាងរាស្រ្ត នឹងត្រូវរៀបចំនៅថ្ងៃទី២៩ ខែ​កក្កដា ឆ្នាំ២០១៨ តាមការគ្រោងទុក ។

សម្តេចពិជ័យសេនា ទៀ បាញ់ បានផ្តល់អនុសាសន៍​ដល់ក្រុមការងារ​ចុះជួយមូលដ្ឋាន​គ្រប់​លំដាប់​ថ្នាក់​ ត្រូវខិត​ខំ​យក​ចិត្តទុកដាក់ថែមទៀត គឺធ្វើឲ្យប្រជាជន​​​​​​​​បាន​ទទួល​ផល​​​​សប្បាយចិត្ត ដើម្បីឲ្យប្រជាជនឃើញពីគុណភាព, ស្មារតី​ទទួល​​ខុសត្រូវ, របស់​ក្រុម​ការងារ ក៏ដូចជា​រដ្ឋបាល​មូលដ្ឋាន​គ្រប់​លំដាប់ថ្នាក់។ ត្រូវខិតខំលុបបំបាត់ទង្វើអសកម្មទាំងឡាយ ដែលមានរយៈ​ពេល​កន្លងមក ដូចជា បញ្ហាការបំផ្លាញ​ព្រៃឈើ​​​, អំពើ​ពុក​រលួយ, ដីធ្លី, រដ្ឋបា​លសាធារណៈ, និងបាតុភាព​អសកម្ម​ផ្សេងៗ​ ដែល​ធ្វើឲ្យប្រជាជនមិនសប្បាយចិត្ត និង​​ត្រូវ​ឆ្លៀត​ពេល​​វេលាក្រៅម៉ោងរដ្ឋបាល ដើម្បី​ចុះមូលដ្ឋាន ទើប​​យល់ដឹងពីសុខទុក្ខ សំណូមពរ និងសេចក្តី​ត្រូវការ​ជាក់ស្តែង​របស់​ប្រជាជន​។

នៅក្នុងពិធីនេះ លោក សយ សីហា ក្នុងនាមតំណាងឲ្យសមាជិកទាំង១០៤នាក់ ដែលបានលាលែង ពីអតីត​គណបក្ស​សង្គ្រោះ​​ជាតិ ស្ម័គ្រ​​​ចិត្ត​​មករួមជីវភាពនយោបាយជាមួយគណបក្សប្រជាជនកម្ពុជា មានការ​សោក​​​ស្តាយ​ជា​ពន់​ពេក​ ដែល​​​​​​​កន្លងមកបានចាញ់ឧបាយកល បោកបញ្ឆោត​​​​​បស់មេដឹកនាំក្បត់ជាតិ ក្បត់​ឆន្ទៈ​​​​ប្រជាពល​រដ្ឋ​ដែលផ្ទុយ​ពី​បំណង​​​​​ប្រាថ្នារបស់ពួកគាត់ ក្នុងការបម្រើ​ផលប្រយោជន៍របស់ប្រជាពលរដ្ឋ រក្សា​ការពារ សុខសន្តិភាព សុវត្ថិភាព និង​ការ​​​​អភិវឌ្ឍន៍​​​ក្នុងមូលដ្ឋាន និងថ្លែងអំណរគុណ​បំផុតចំពោះ សម្តេច​​​តេជោ ហ៊ុន សែន ដែលបាន​ដាក់​ចេញ​​​​​​​គោល​នយោបាយ បង្រួប​បង្រួម​​​ជាតិ ឈ្នះ ឈ្នះ ផ្តល់​ឱកាស​ឲ្យពួកគាត់បាន​បន្ត​ជីវភាព​នយោ​បាយ​​ រួមរស់ជាមួយគណបក្សប្រជាជនកម្ពុជា ពិសេស​​​​​​គឺ​បានបន្ត​បម្រើ​​​​សេវា​សាធារណៈ​ជូនប្រជាពលរដ្ឋ​នៅ​​​ក្នុង​​​មូលដ្ឋាន ។

តាមរបាយការណ៍របស់ លោក ឃឹម ប៊ុនសុង ​បញ្ជាក់ថា សមាជិកអតីត​គណបក្ស​សង្គ្រោះ​​ជាតិ ស្ម័គ្រ​​​ចិត្ត​​មករួមជីវភាព​នយោបាយ​ជាមួយ​គណបក្ស​ប្រជាជនកម្ពុជា នៅ​ឃុំ សង្កាត់ ក្រុង ស្រុក ខេត្តសៀមរាប សរុបចំនួន១០៤នាក់ ក្នុងនោះនារី១៣នាក់ រួមមាន សមាជិក​ក្រុម​ប្រឹក្សា​ស្រុក​០៣​​​នាក់, បេក្ខជន​​​បម្រុងស្រុក០១នាក់, ចៅសង្កាត់មេឃុំ០៤នាក់, ចៅសង្កាត់​រង​ទី១​​និងជំទប់ទី១ ០៤នាក់, ចៅ​សង្កាត់​រង​ទី២​និង​​ជំទប់ទី២-០១នាក់, សមាជិកក្រុមប្រឹក្សាឃុំ សង្កាត់​១៤នាក់, បេក្ខជនបម្រុង៧៧នាក់ ។នៅក្នុងពិធីនេះ សម្តេចពិជ័យសេនា ទៀ បាញ់ បានផ្តល់ថវិកាឧបត្ថម្ភជូនសមាជិកក្រុមប្រឹក្សាឃុំ សង្កាត់​ចំនួន​៧៧២​​នាក់ ដោយម្នាក់ៗទទួលបានថវិកា១០ម៉ឺនរៀល និងបានរៀបចំពិធីពិសារអាហារសាមគ្គី ជាមួយក្រុម​ការងារ​ចុះ​មូលដ្ឋាន​គ្រប់លំដាប់ថ្នាក់, មន្ត្រីរាជការ, កងកម្លាំងប្រដាប់អាវុធ, និងសមាជិកក្រុមប្រឹក្សាឃុំ សង្កាត់​ទាំងអស់នៅ​ខេត្ត​សៀមរាប​ផងដែរ៕