(សៀមរាប)៖ កម្មវិធី «ទស្សនាទានព្រះពុទ្ធសាសនា»​ នៃក្រសួងធម្មការ និងសាសនា​ ដែលដឹកនាំដោយ លោក ប៉ែន វិបុល អនុរដ្ឋលេខាធិការ ក្រសួងធម្មការ និងសាសនា និងជាតំណាងឲ្យលោក ហ៊ឹម ឆែម រដ្ឋមន្រ្តីក្រសួងធម្មការ និងសាសនា បានរៀបចំធ្វើនៅវិទ្យាល័យសម្តេចឪ​ ភូមិថ្នល់​ សង្កាត់ស្រង៉ែ​ ក្រុងសៀមរាប ខេត្តសៀមរាប នាថ្ងៃសុក្រ១៣កើត​ ខែមិគសិរ​ ឆ្នាំរកា​ នព្វស័ក​ ព.ស.២៥៦១​ ​ត្រូវនឹងថ្ងៃទី០១ខែធ្នូ​ ឆ្នាំ២០១៧ ដោយមានការចូលរួមពីសិស្សានុសិស្សចំនួនសរុបជាង១៧០០នាក់។

ក្នុងកម្មវិធីនោះលោក ប៉ែន វិបុល បានសង្កត់ធ្ងន់ទៅលើការ រៀបចំឥរិយាបថផ្ទាល់ខ្លួនរបស់សិស្សានុសិស្ស ហើយត្រូវចេះ គ្រប់គ្រងសកម្មភាព នៃការសិក្សា របស់ខ្លួនឲ្យបានល្អ និងមានគោលដៅច្បាស់លាស់។

លោក ប៉ែន វិបុល បានលើកឡើងបន្តថា ពិធីនេះរៀបចំឡើងក្នុងគោលបំណងដើម្បីអប់រំផ្សព្វផ្សាយ អំពីព្រះធម៌ និងលើក តម្លៃព្រះពុទ្ធសាសនា ដែលជាសាសនារបស់រដ្ឋ នឹងបញ្រ្ជាបពុទ្ធឱវាទដល់សិស្សានុសិស្សដែលជាទំពាំងស្នងឬស្សីឲ្យ យល់ដឹងពីបុណ្យ,បាប,គុណទោស ជាពិសេសការអប់រំ ផ្លូវកាយ វាចា ចិត្ត ពង្រឹង សីលធម៌ សុជីវធម៌ គុណធម៌ ចរិយាធម៌ និងប្រកាន់ភ្ជាប់នូវបញ្ចសីលឬសីលប្រាំ។

វាគ្មិនសំខាន់ៗ​ ដែលចូលរួមនៅក្នុងកម្មវិធីនេះ រួមមានព្រះសុមង្គលសីលាចារ្យ​ អាភាករោ​ ជុំ​ គឹមឡេង, ព្រះមេគណៈ ខេត្តសៀមរាប​, ព្រះធម្មសិរី​ព្រះជាគណ:ថ្នាក់កិត្តិយស, ភិក្ខុតិក្ខញ្ញាណោ​ អៀន​ អ៉ីន ជំនួយការសាលាគណខេត្តសៀមរាប, ព្រះមហា​ គិត​ សុផល​ មន្ត្រីនាយកដ្ឋានស្រាវជ្រាវ ផ្សព្វផ្សាយពុទ្ធសាសនាផ្សារភ្ជាប់សង្គម, លោក ប៉ែន​ វិបុល​ អនុរដ្ឋលេខាធិការ​ ក្រសួងធម្មការ​ និងសាសនា​ តំណាងលោក ហ៊ឹម​ ឆែម​ ទេសរដ្ឋមន្រ្តី​ រដ្ឋមន្រ្តីក្រសួងធម្មការនិងសាសនា, លោក​ ឈិន​ តៃឈាង​ នាយកវិទ្យាល័យសម្តេចឪ, អ្នកស្រី​ ប៉ែន​ និមល​ នាយិការង​ វិទ្យាល័យសម្តេចឪ, លោក​ ហង​ សុភីន​ ប្រធានការិយាល័យគ្រប់គ្រង​ និងបណ្តុះបណ្តាល​ នៃនាយកដ្ឋានស្រាវជ្រាវ​ ផ្សព្វផ្សាយពុទ្ធសាសនាផ្សារភ្ជាប់សង្គម និង នាយករង​ លោកគ្រូអ្នកគ្រូនៃវិទ្យាល័យសម្តេចឪជាដើម។

គួរបញ្ជាក់ថា កម្មវិធី ទស្សនាទានព្រះពុទ្ធសាសនា ដឹកនាំដោយ លោក ហ៊ឹម ឆែម ទេសរដ្ឋមន្រ្តី រដ្ឋមន្រ្តីក្រសួងធម្មការ និងសាសនា សហការជាមួយ អគ្គនាយកដ្ឋានវិទ្យុ ទូរទស្សន៍រដ្ឋ និងឯកជន និងរៀបចំដោយផ្ទាល់ ពីនាយកដ្ឋានស្រាវជ្រាវ ផ្សព្វផ្សាយព្រះពុទ្ធសាសនា ផ្សារភ្ជាប់សង្គម នៃ​ក្រសួងធម្មការ និងសាសនា។ការបង្កើតកម្មវិធីនេះ ក៏បានធ្វើឡើងឆ្លើយតបទៅ នឹងអនុសាសន៍របស់ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចុះថ្ងៃទី២៩ ខែមេសា ឆ្នាំ២០១៥៕