(ភ្នំពេញ)៖ លោកវរសេនីយ៍ឯក យឹម សារ៉ាន់ អធិការនគរបាលខណ្ឌពោធិ៍សែនជ័យ បានប្រាប់បណ្ដាញសារព័ត៌មាន Fresh News ឲ្យដឹងនៅមុននេះបន្ដិចថា នៅវេលាម៉ោងប្រមាណជាង១០ព្រឹកនេះ កម្មកររោងចក្រ​ EVC ម៉េងដាហ្វូតវៀរ ប្រមាណ៥០០នាក់ ដែលបានបិទផ្លូវវេងស្រេងនោះ ពេលនេះបានព្រមបើកឲ្យប្រជាពលរដ្ឋធ្វើដំណើរវិញហើយ។

ការព្រមបើកផ្លូវឲ្យពលរដ្ឋធ្វើដំណើរវិញនេះ ត្រូវបានលោកអធិការខណ្ឌពោធិ៍សែនជ័យ បញ្ជាក់ថា ក្រោយពីលោក​បានជួបពិភាក្សាផ្ទាល់ជាមួយកម្មករ ដែលបន្ទាប់ពីបានទទួលបញ្ជាភ្លាមៗ ពីនាយឧត្តមសេនីយ៍ ជួន សុវណ្ណ ស្នងការនគរបាលរាជធានីភ្នំពេញ ដោយឲ្យ​ចុះទៅសម្របសម្រួលជាមួយកម្មករ ដើម្បីបើកផ្លូវទុកជាប្រយោជន៍សាធារណៈជូនពលរដ្ឋ​ និងរង់ចាំការពិគ្រោះដោះស្រាយរវាងអាជ្ញាធរពាក់ព័ន្ធ និងថៅកែរោងចក្រ។

សួមជម្រាបថា នៅវេលាម៉ោងប្រមាណជិត១០ព្រឹក ថ្ងៃទី០១ ខែធ្នូ ឆ្នាំ២០១៧នេះ កម្មកររោងចក្រ EVC ម៉េងដាហ្វូតវៀរ បាននាំគ្នាបិទផ្លូវវេងស្រេងជិតតែម្ដង ក្នុងទឹកដីខណ្ឌពោធិ៍សែនជ័យ បណ្ដាលឲ្យមានការកកស្ទះយ៉ាងខ្លាំង​ដល់ប្រជាពលរដ្ឋដែលធ្វើដំណើរតាមដងផ្លូវ។

តាមសេចក្ដីរាយការណ៍ពីភ្នាក់ងារ Fresh News មូលហេតុដែលនាំឲ្យមានការបិទផ្លូវនេះ ដោយសារតែពួកគេតវ៉ាពីលក្ខខណ្ឌការងារមួយចំនួនពីថៅកែរោងចក្រ៕