(ភ្នំពេញ)៖ គណៈប្រតិភូសហភាពសហព័ន្ធយុវជនកម្ពុជា និងក្រសួងវប្បធម៌ និងវិចិត្រសិល្បៈ បានចាកចេញពីកម្ពុជាហើយ នៅល្ងាចថ្ងៃទី២៨ ខែវិច្ឆិកា ឆ្នាំ២០១៧នេះ ក្នុងដំណើរឆ្ពោះទៅកាន់ទីក្រុងឡុងដ៍ ចក្រភពអង់គ្លេស ទីដែលគ្រឿងអលង្ការមាស សម្រាប់លម្អរូបចម្លាក់ សម័យអង្គរបានដាក់តាំងនៅទីនោះ ដើម្បីធ្វើការដង្ហែយកមកកាន់កម្ពុជាវិញ ក្នុងពេលដ៏ខ្លីខាងមុខនេះ។
គួររំលឹកថា កាលពីថ្ងៃទី១៨ ខែវិច្ឆិកា ឆ្នាំ ២០១៦ ក្រសួងវប្បធម៌ និងវិចិត្រសិល្បៈ បានទទួលព័ត៌មានថា ភ្នាក់ងារលក់វត្ថុបុរាណមួយ ដែលមានទីស្នាក់ការនៅទីក្រុងឡុងដ៍ បានប្រកាសដាក់លក់វត្ថុបុរាណជាច្រើន ដែលក្នុងនោះរួមមានឈុតគ្រឿងអលង្ការមាស សម្រាប់លម្អរូបចម្លាក់ថ្ម ដែលត្រូវបានបញ្ចាក់ថា ជាវត្ថុបុរាណរបស់ជាតិកម្ពុជា។
ភ្លាមបន្ទាប់ពីទទួលបានដំណឹង ដំណើរការនៃការស្នើសុំទាមទារយកមកវិញនូវ វត្ថុបុរាណដ៏កម្រនេះ ត្រូវបានអនុវត្តយ៉ាងយកចិត្តទុកដាក់បំផុត ពីសំណាក់រាជរដ្ឋាភិបាលកម្ពុជា ដោយមានកិច្ចសហការជាមួយនឹង រាជរដ្ឋាភិបាលនៃចក្រភពអង់គ្លេស តាមរយៈស្ថានទូត នៃព្រះរាជាណាចក្រកម្ពុជា ប្រចាំនៅចក្រភពអង់គ្លេស រួមជាមួយមន្ត្រីជំនាញ នៃក្រសួងវប្បធម៌ និងវិចិត្រសិល្បៈ។ ជាលទ្ធផល ភ្នាក់ងារលក់វត្ថុបុរាណបានស័្មគ្រចិត្តប្រគល់ ឈុតគ្រឿងអលង្ការមាសសម្រាប់លម្អរូបចម្លាក់ ជូនមករាជរដ្ឋាភិបាល និងប្រជាជនកម្ពុជាវិញ កាលពីថ្ងៃទី២០ ខែមេសា ឆ្នាំ២០១៧។
គ្រឿងអលង្ការមាសសម្រាប់លម្អលើ រូបចម្លាក់នាសម័យអង្គរ ដែលទាមទារបានដោយជោគជ័យយកមកវិញនេះ សរុបរួមមាន១០មុខ ហើយត្រូវបានក្រុមអ្នកជំនាញបុរាណវត្ថុជាតិ និងអន្តរជាតិចាត់ទុកថា ជាសម្បត្តិបេតិកភណ្ឌមនុស្សជាតិ ដ៏វិសេសវិសាល និងពុំអាចកាត់ថ្លៃបាន។ សម្បត្តិទាំងនេះជាផ្នែកមួយ នៃដួងព្រលឹងរបស់បុព្វបុរសខ្មែរពិតៗ ដែលស្ថិតនៅទូទាំងពិភពលោក ហើយត្រូវបានយាងត្រឡប់ មកកាន់មាតុភូមិវិញជាបន្តបន្ទាប់ ក្នុងសម័យកាលដែលជាតិយើង បានទទួលនូវសុខសន្តិភាពពេញបរិបូណ៌។
បើតាមព័ត៌មានពីក្រុមគណៈប្រតិភូ គ្រឿងអលង្ការដែលជាដួងព្រលឹង នៃវប្បធម៌ជាតិយើងទាំងនេះ នឹងត្រូវប្រគល់ជូនដោយភ្នាក់ងារលក់វត្ថុបុរាណនៅអង់គ្លេស ហើយភ្លាមបន្ទាប់ពីទទួល បាននូវគ្រឿងអលង្ការទាំងនេះ ក្រុមគណៈប្រតិភូ នឹងធ្វើពិធីដង្ហែយកមកកម្ពុជាវិញ ក្នុងពេលដ៏ខ្លីបំផុត។
អង្គភាពព័ត៌មាន Fresh News នឹងបន្តតាមដានព័ត៌មាន ពីការដង្ហែត្រឡប់មកវិញនូវកេតនភណ្ឌទាំងនេះ ហើយសូមអំពាវនាវផងដែរ ឲ្យជនរួមជាតិចូលរួមអបអរសាទរ នៃការវិលត្រឡប់ នៃមរតកដូនតាយើងទាំងអស់គ្នា ក្នុងពេលដ៏ខ្លីខាងមុខនេះ។
