(ភ្នំពេញ)៖ នាយឧត្តមសេនីយ៍ កង សុខន អគ្គស្នងការរងនគរបាលជាតិ នៅព្រឹកថ្ងៃទី២៨ ខែវិច្ឆិកា ឆ្នាំ២០១៧នេះ បានដឹកនាំកិច្ចប្រជុំបូកសរុបលទ្ធផលការងារប្រចាំខែ របស់នាយកដ្ឋាននគរបាលព្រហ្មទណ្ឌ ក្រសួងមហាផ្ទៃ និងប្រាប់ឲ្យថ្នាក់ដឹកនាំនាយកដ្ឋានមួយនេះ បង្កើនការអនុវត្តការងារឲ្យបានល្អបន្ថែមទៀត។
ក្នុងកិច្ចប្រជុំខាងលើនេះ ក៏មានការចូលរួមពីលោកឧត្តមសេនីយ៍ឯក សុខ ខេមរិន ប្រធាននាយកដ្ឋាន, លោកអនុប្រធាននាយកដ្ឋាន, នាយ នាយរងការិយាល័យ និងមន្ដ្រីពាក់ព័ន្ធជាច្រើនទៀតផងដែរ។
ថ្លែងក្នុងឱកាសនេះ លោកឧត្តសេនីយ៍ឯក សុខ ខេមរិន ក៏បានលើកឡើងពីលទ្ធផល ដែលកម្លាំងនាយកដ្ឋាននគរបាលព្រហ្មទណ្ឌ បង្ក្រាបបាន និងបញ្ហាប្រឈមផ្សេងៗ ដែលបានជួបប្រទះ ព្រមទាំងលើកនូវសំណូមពរមួយចំនួនផងដែរ។
សូមជម្រាបថា ក្នុងកិច្ចប្រជុំនោះ ក៏មានការប្រកាសតួនាទី នាយនគរបាលក្នុងនាយកដ្ឋាននគរបាលព្រហ្មទណ្ឌ ចំនួន២រូបផងដែរ ដោយទី១៖លោកវរសេនីយ៍ឯក ហុង ទ្រី ជាអនុប្រធាននាយកដ្ឋាន និងទី២៖លោកវរសេនីយ៍ទោ ព្រំ សារឿន ជានាយការិយាល័យគ្រប់គ្រងដីកា៕
