(ភ្នំពេញ)៖ រោងចាំដីរបស់អតីតអភិបាលរងខេត្តព្រះវិហារ ដែលធ្លាប់ជាប់ពន្ធនាគាររឿងដីធ្លី គឺលោក មាស សាវឿន ដែលបានសាងសង់លើដីទំនាស់មួយកន្លែង ស្ថិតនៅក្នុងភូមិទួលពពែ សង្កាត់ទួលសង្កែទី២ ត្រូវបានលោក ជា ពិសី អភិបាលខណ្ឌឫស្សីកែវ បញ្ជាឲ្យលោក ប្រាជ្ញ សីហា អភិបាលរងខណ្ឌ ដឹកនាំកម្លាំងចម្រុះប្រើវិធានការរដ្ឋបាលចុះទៅរុះរើ នៅថ្ងៃទី២៧ ខែវិឆ្ឆិកា ឆ្នាំ២០១៧។
តែទោះបីជាយ៉ាងណា ការប្រើវិធានការរដ្ឋបាលនោះ ពុំបានសម្រេចឡើយ ដោយសារតែលោក មាស សាវឿន បានចេញមុខមកស្នើរសុំឲ្យអាជ្ញាធរ ឲ្យជួយពន្យាពេលរយៈពេល១០ថ្ងៃក្រោយ គាត់នឹងរុះរើចេញខ្លួនឯង ដោយរាប់គិតត្រឹមថ្ងៃទី៨ ខែធ្នូ ឆ្នាំ២០១៧ខាងមុខប៉ុណ្ណោះ។
លោក ប្រាជ្ញ សីហា អភិបាលរងខណ្ឌឬស្សីកែវ បានបញ្ជាក់ថា ការចុះរុះរើរោងចាំដី ដែលសង់រំលោភលើដីទំនាស់ខាងលើនេះដែរ បានធ្វើឡើងតាមបញ្ជារបស់លោក ឃួង ស្រេង អភិបាលរាជធានីភ្នំពេញ បន្ទាប់ពីមានពាក្យបណ្តឹងរបស់ឈ្មោះ លឹម វណ្ណា ភេទស្រី អាយុ៦១ឆ្នាំ ព្រោះនៅមុនពេលឈានដល់ការចុះរុះរើសំណង់រោងឈើនេះ អាជ្ញាធរបានចុះមកហាមឃាត់ និងណែនាំឲ្យរុះរើដោយខ្លួនឯង តែម្ចាស់មិនស្តាប់ទើបឈានដល់ការប្រើវិធានការរដ្ឋាបាល ស្រាប់តែក្រុមគ្រួសារលោកស្រី ថាច់ ស៊ីសាម៉ា ដែលជាអ្នកចាំដីឲ្យលោក មាស សាវឿន និងបក្ខពួកប្រមាណជិត១០នាក់ ប្រដាប់ដោយកាំបិត ពូថៅ មកធ្វើការរេរ៉ាំងអាជ្ញាធរផងដែរ។
ទោះបីជាយ៉ាងណាលោក មាស សាវឿន បានចេញមុខមកអះអាងសម្របសម្រួល ដោយស្នើសុំពន្យាពេលរយះពេល១០ថ្ងៃក្រោយ គិតត្រឹមថ្ងៃទី៨ ខែធ្នូ ឆ្នាំ២០១៧ខាងមុខប៉ុណ្ណោះ ដើម្បីរុះរើសំណង់ឈើលើដីនោះចេញដោយខ្លួនឯង បើមិនដូច្នេះទេ អាជ្ញាធរនិងចាត់វិធានការរុះរើ ដោយមិនទទួលខុសត្រូវលើការខូចខាតទ្រព្យសម្បត្តិឡើយ។
បើតាមការអះអាងពីលោកស្រី លឹម វណ្ណា បានឲ្យដឹងថា ដីទំនាស់នេះ មានទំហំប្រមាណជាង១ហិកតា ស្មើនិង១២០០០ម៉ែត្រការ៉េ ដែលមានជម្លោះដ៍រ៉ាំរ៉ៃជាយូរមកហើយ ជាមួយលោក មាស សាវឿន ដោយគាត់បានទិញដោយស្របច្បាប់ពីលោក លឹម អាន តាំងពីឆ្នាំ១៩៩៩ ដោយមានអាជ្ញាធរ ភូមិ សង្កាត់ ខណ្ឌដឹងឮ និងទទួលស្គាល់ត្រឹមត្រូវ។ លុះក្រោយមកស្រាប់តែលោកមាស សាវឿន ដែលមានដីនៅខាងកើតបានលក់ដីអស់ហើយ និងបានប្តឹងចោទឈ្មោះ លឹម អាន ថា លួចបានយកដីលក់ និងប្តឹងដណ្ដើមដីរបស់គាត់ដែលទិញដោយស្របច្បាប់ទៅវិញ។
លោកស្រី លឹម វណ្ណា បន្តថា កាលពីអំឡុងថ្ងៃទី១៥ ខែតុលា ឆ្នាំ២០១៧ កន្លងទៅ ស្រាប់តែក្រុមគ្រួសារលោកស្រី ថាច់ ស៊ី សុម៉ា ប្រមាណជិត១០នាក់ ដែលអ្នកយាមដីឲ្យលោក មាស សាវឿន បាននាំគ្នាមកសាងសង់រោងរំលោភយកដីរបស់គាត់។ ជាមួយគ្នានោះ គាត់ក៏បានប្តឹងទៅអាជ្ញាធរខណ្ឌឬស្សីកែវ ឲ្យជួយអន្តរាគមន៍ចុះមករុះរើ នៅពេលនេះ តែត្រូវម្ចាស់សុំពន្យាពេល។
លោកមាស សាវឿន ក៍បានឲ្យដឹងផងដែរថា ដីនោះជាដីរបស់គាត់ដែលបានកាន់កាប់តាំងពីឆ្នាំ១៩៨៨ ដោយមានទំហំជាង៣ហិកតា៕
