(កំពង់ធំ)៖ នៅថ្ងៃទី២៦ ខែវិច្ឆិកា ឆ្នាំ២០១៧នេះ អតីតសមាជិកក្រុមប្រឹក្សាស្រុកកំពង់ស្វាយ និងបេក្ខជនបម្រុងឃុំរបស់ CNRP ដែលទើបរលាយ ក្នុងស្រុកកំពង់ស្វាយ ស្រុកស្ទោង និងស្រុកសន្ទុក នៅខេត្តកំពង់ធំ សរុប៧នាក់ទៀតហើយ បានប្រកាសចុះចូលជាមួយគណបក្សប្រជាជនកម្ពុជា ដោយសារតែពួកគាត់បានឃើញ នូវអំពើក្បត់ជាតិរបស់មេគណបក្សសង្គ្រោះជាតិ ដែលបម្រើបរទេស។ នេះបើតាមលិខិតដែលអង្គភាព Fresh News ទទួលបាននៅថ្ងៃទី២៦ ខែវិច្ឆិកានេះ។
អតីតសមាជិកក្រុមប្រឹក្សា និងបេក្ខជនបម្រុងរបស់ CNRP ទាំង៧រូបនេះរួមមានឈ្មោះដូចតទៅ៖
ទី១៖ លោក អ៊ា សុវណ្ណ អាយុ៥១ឆ្នាំ បេក្ខជនពេញសិទ្ធិស្រុកកំពង់ស្វាយ
ទី២៖ លោក ទៀង រុន អាយុ៥៧ឆ្នាំ បេក្ខជនពេញសិទ្ធិឃុំកំពង់គោ ស្រុកកំពង់ស្វាយ
ទី៣៖ លោក ស៊ុម ជឿន អាយុ៤៦ឆ្នាំ បេក្ខជនពេញសិទ្ធិឃុំពាមបាង ស្រុកស្ទោង
ទី៤៖ លោក ប៉ិច សុខប៉ា អាយុ២៦ឆ្នាំ បេក្ខជនពេញសិទ្ធិឃុំព្រះដំរី ស្រុកស្ទោង
ទី៥៖ លោកស្រី យឹង មឿន អាយុ៤៥ឆ្នាំ បេក្ខជនបម្រុងឃុំប្រាសាទ ស្រុកសន្ទុក
ទី៦៖ លោក ហែម ស្រ៊ាន់ អាយុ៤៣ឆ្នាំ បេក្ខជនបម្រុងឃុំប្រាសាទ ស្រុកសន្ទុក
ទី៧៖ លោក ឡាច ណេង អាយុ៤៣ឆ្នាំ បេក្ខជនបម្រុងឃុំប្រាសាទ ស្រុកសន្ទុក។
ការសម្រេចដើរចេញរបស់ អតីតមន្រ្តីគណបក្សសង្រ្គោះជាតិទាំងនេះ បានធ្វើឡើងបន្ទាប់ពីតុលាការកំពូល កាលពីថ្ងៃទី១៦ ខែវិច្ឆិកា ឆ្នាំ២០១៧ បានកាត់រំលាយគណបក្សសង្រ្គោះជាតិ ដែលពាក់ព័ន្ធនឹងការប្រព្រឹត្តអំពើក្បត់ជាតិ ព្រមទាំងបានហាមឃាត់សមាជិកជាន់ខ្ពស់របស់គណបក្សនេះ ចំនួន១១៨រូប មិនឱ្យធ្វើនយោបាយ រយៈពេល៥ឆ្នាំផងដែរ៕
គណបក្សប្រជាជនកម្ពុជាខេត្តកំពង់ធំ បានប្រកាសស្វាគមន៍ និងទទួលសមាជិកសមាជិកាថ្មី មកពីអតីតគណបក្សសង្គ្រោះជាតិទាំង៧រូបនោះ ដែលសុំចូលរួមរស់ជីវភាពនយោបាយជាមួយ គណបក្សប្រជាជនកម្ពុជា បន្ទាប់ពីបានជ្រួតជ្រាបនូវអំពើក្បត់ជាតិរបស់មេបក្សខ្លួន។
សូមជម្រាបថា ដោយសារតែសន្ទុះនៃការសម្រុកចុះចូលបាននិងកំពុងកើនឡើងយ៉ាងខ្លាំង ហើយម្យ៉ាងទៀតថ្ងៃកំណត់ទី២៤ ខែវិច្ឆិកា អាចមានការរៀបចំមិនទាន់ ដូច្នេះសម្ដេចតេជោ ហ៊ុន សែន នាយករដ្ឋមន្រ្តី នៃកម្ពុជា បានប្រកាសផ្តល់ឱកាសបន្តជូនមន្រ្តីគណបក្សសង្គ្រោះជាតិ នៅថ្នាក់មូលដ្ឋានទាំងអស់ មកចូលរួមជីវភាពនយោបាយ ជាមួយគណបក្សប្រជាជន រហូតដល់ម៉ោង៩យប់ ថ្ងៃទី២៦ ខែវិច្ឆិកា ឆ្នាំ២០១៧។
សម្តេចតេជោ ហ៊ុន សែន បានអំពាវនាវឲ្យអតីតមន្រ្តីគណបក្សសង្រ្គោះជាតិ ដែលត្រូវបានតុលាការកំពូលកាត់រំលាយ សូមប្រញាប់ប្រញាល់ចុះចូលជាមួយ គណបក្សប្រជាជនកម្ពុជា ដើម្បីទទួលបាននូវតួនាទីឋានៈអ្វីៗដដែល ព្រោះការកំណត់ពេលវេលាត្រឹមយប់ថ្ងៃទី២៦ ធ្វើឡើងតាមលក្ខខណ្ឌរបស់គ.ជ.ប៕
