(ស្ទឹងត្រែង)៖ អតីតបេក្ខជនក្រុមប្រឹក្សាឃុំ ក្នុងស្រុកសេសាន ស្រុកថាឡាបរិវ៉ាត និងស្រុកសៀមបូក ខេត្តស្ទឹងត្រែងសរុប៨នាក់ទៀត របស់គណបក្សសង្គ្រោះជាតិ ដែលទើបរលាយបានប្រកាសចុះចូលជាមួយ គណបក្សប្រជាជនកម្ពុជា ដោយសារតែពួកគាត់បានឃើញ នូវអំពើក្បត់ជាតិរបស់មេគណបក្សសង្គ្រោះជាតិ ដែលបម្រើបរទេស។ នេះបើតាមលិខិតដែលអង្គភាព Fresh News ទទួលបាននៅថ្ងៃទី២៦ ខែវិច្ឆិកា ឆ្នាំ២០១៧នេះ។
ការសម្រេចដើរចេញរបស់ អតីតមន្រ្តីគណបក្សសង្រ្គោះជាតិទាំង៨រូបនេះ បានធ្វើឡើងបន្ទាប់ពីតុលាការកំពូល បានកាត់រំលាយគណបក្សសង្រ្គោះជាតិ ដែលពាក់ព័ន្ធនឹង ការប្រព្រឹត្តអំពើក្បត់ជាតិ ព្រមទាំងបានហាមឃាត់សមាជិកជាន់ខ្ពស់របស់គណបក្សនេះ ចំនួន១១៨រូប មិនឱ្យធ្វើនយោបាយ រយៈពេល៥ឆ្នាំផងដែរ កាលពីថ្ងៃទី១៦ ខែវិច្ឆិកា ឆ្នាំ២០១៧។
អតីតមន្ដ្រីគណបក្សសង្គ្រោះជាតិទាំង៨រូបនេះ រួមមាន៖
ទី១៖ លោក ចាន់ កន បេក្ខជនឃុំស្តៅ ស្រុកសេសាន
ទី២៖ លោកស្រី ម៉ា ណាង បេក្ខជនឃុំតាឡាត ស្រុកសេសាន
ទី៣៖ លោក ផែង ស៊ីថា បេក្ខជនឃុំតាឡាត ស្រុកសេសាន
ទី៤៖ លោក ហ្វូត ធី បេក្ខជនឃុំកោះសំពាយ ស្រុកសៀមបូក
ទី៥៖ លោក ចាប ស៊ីរឿន បេក្ខជនឃុំអូរឬស្សីកណ្តាល ស្រុកសៀមបូក
ទី៦៖ លោក ធឿន អិត បេក្ខជនឃុំអន្លង់ជ្រៃ ស្រុកថាឡាបរិវ៉ាត់
ទី៧៖ លោកស្រី ប៊ុន សខេម បេក្ខជនឃុំថាឡាបរិវ៉ាត់ ស្រុកថាឡាបរិវ៉ាត់
ទី៨៖ លោក ពិន ឈាន បេក្ខជនឃុំស្រែឬស្សី ស្រុកថាឡាបរិវ៉ាត់។
គណបក្សប្រជាជនកម្ពុជាខេត្តស្ទឹងត្រែង បានប្រកាសស្វាគមន៍ និងទទួលសមាជិកសមាជិកាថ្មី មកពីអតីតគណបក្សសង្គ្រោះជាតិទាំង៨រូបនោះ ដែលសុំចូលរួមរស់ជីវភាពនយោបាយជាមួយ គណបក្សប្រជាជនកម្ពុជា បន្ទាប់ពីបានជ្រួតជ្រាបនូវអំពើក្បត់ជាតិរបស់មេបក្សខ្លួន។
សូមជម្រាបថា ដោយសារតែសន្ទុះនៃការសម្រុកចុះចូលបាននិងកំពុងកើនឡើងយ៉ាងខ្លាំង ហើយម្យ៉ាងទៀតថ្ងៃកំណត់ទី២៤ ខែវិច្ឆិកា អាចមានការរៀបចំមិនទាន់ ដូច្នេះសម្ដេចតេជោ ហ៊ុន សែន នាយករដ្ឋមន្រ្តី នៃកម្ពុជា បានប្រកាសផ្តល់ឱកាសបន្តជូនមន្រ្តីគណបក្សសង្គ្រោះជាតិ នៅថ្នាក់មូលដ្ឋានទាំងអស់ មកចូលរួមជីវភាពនយោបាយ ជាមួយគណបក្សប្រជាជន រហូតដល់ម៉ោង៩យប់ ថ្ងៃទី២៦ ខែវិច្ឆិកា ឆ្នាំ២០១៧។
សម្តេចតេជោ ហ៊ុន សែន បានអំពាវនាវឲ្យអតីតមន្រ្តីគណបក្សសង្រ្គោះជាតិ ដែលត្រូវបានតុលាការកំពូលកាត់រំលាយ សូមប្រញាប់ប្រញាល់ចុះចូលជាមួយ គណបក្សប្រជាជនកម្ពុជា ដើម្បីទទួលបាននូវតួនាទីឋានៈអ្វីៗដដែល ព្រោះការកំណត់ពេលវេលាត្រឹមយប់ថ្ងៃទី២៦ ធ្វើឡើងតាមលក្ខខណ្ឌរបស់គ.ជ.ប៕
