(បន្ទាយមានជ័យ)៖ លោក គោស៊ុ សារឿត អនុប្រធានក្រុមការងារ គណបក្សប្រជាជនកម្ពុជា ចុះជួយខេត្តបន្ទាយមានជ័យ, លោកអ៊ុង អឿន ប្រធានក្រុមប្រឹក្សារខេត្ត និង លោកសួន បវរ ប្រធាន CPP ខេត្ត នៅថ្ងៃទី២៦ ខែវិច្ឆិកា ឆ្នាំ២០១៧នេះ បានជួបសំណេះសំណាលជាមួយ សមាជិកមូលដ្ឋានគណបក្សប្រជាជនកម្ពុជា និងអតីតក្រុមប្រឹក្សាឃុំ/សង្កាត់ ស្រុក ក្រុង របស់អតីតគណបក្សសង្គ្រោះជាតិចំនួន១៣៨រូប នៅស្នាក់ការ CPP ខេត្តបន្ទាយមានជ័យ ដើម្បីផ្សព្វផ្សាយពីសភាពការណ៍នយោបាយថ្មីៗ សារនយោបាយសំខាន់ៗ សម្រាប់ពួកគាត់យកទៅផ្សព្វផ្សាយបន្តដល់ពលរដ្ឋ បានយល់យល់ដឹង។
ក្នុងពិធីជួបសំណេះសំណាលនោះ លោក សួន បវរ បានលើកឡើងថា សុខសន្តិភាពពេញលេញ ដែលកម្ពុជាមាននាពេលនេះ វាបានធ្វើប្រជាពលរដ្ឋគ្រប់ៗគ្នា រស់នៅដោយសុខសាន្ត និងប្រទេសជាតិមានការរីកចម្រើន។ ចលនាបដិវត្តន៍ពណ៌ និងចលនាផ្តួលរលំរដ្ឋាភិបាលស្របច្បាប់ និងទង្វើក្បត់ជាតិរបស់គណបក្សប្រឆាំង (CNRP) ដែលឈានដល់តុលការកាត់ទោសរំលាយចោលនោះ ជាការអនុវត្តដ៏ត្រឹមត្រូវតាមច្បាប់ និងរដ្ឋធម្មនុញ្ញ។
លោកបានស្នើឲ្យមន្ត្រីមូលដ្ឋានទាំងអស់បន្តខិតខំ ធ្វើការផ្សព្វផ្សាយពន្យល់រឿងទាំងនេះ ឲ្យបានផុសផុលជ្រោតជ្រៀត ដល់ស្រទាប់មហាជន ប្រជាពលរដ្ឋ បានយល់ច្បាស់។ ម្យ៉ាងទៀតក៏រូវធ្វើការផ្សព្វផ្សាយពីការរីកចម្រើន សមិទ្ធផល ស្នាដៃនានាដែលក្រុមការងារ និងរាជរដ្ឋាភិបាលកម្ពុជា ក្រោមការដឹកនាំដោយ សម្តេចតេជោ ហ៊ុន សែន សម្រេចបានជូនជាតិ និងប្រជាជននាពេលបច្ចុប្បន្ននេះ។
លោក គោស៊ុ សារឿត បានថ្លែងថា ក្រោយពីរំលាយគណបក្សប្រឆាំងយ៉ាងណាក្តី តែយើងទាំងអស់គ្នា ត្រូវខិតខំទ្វេដង ឲ្យសកម្មចុះទៅមូលដ្ឋានដោះស្រាយបញ្ហាសុខទុក្ខ លំបាករបស់ប្រជាពលរដ្ឋ និងខិតខំកសាង អភិវឌ្ឍន៍ មូលដ្ឋានផ្តល់ផលប្រយោជន៍ដល់ពលរដ្ឋ ។
ក្នុងនាមជាអនុប្រធានក្រុមការងារចុះជួយខេត្ត លោកក៏បានអំពាវនាវ ដល់អស់លោក លោកស្រីដែលមិនទាន់បានមកចូលរួម ជាមួយគណប្សប្រជាជន ប្រញាប់ប្រញាលចូលរួមជាមួយគណប្សប្រជាជន ចូលក្នុងកិច្ចការអភិវឌ្ឍន៍នៅមូលដ្ឋានបន្តទៀត។
លោក អ៊ុយ សុខណៃ អតីតក្រុមប្រឹក្សាគណបក្សសង្រ្គោះចាតិ ស្រុកស្វាយចេកតំណាងឲ្យក្រុមប្រឹក្សាស្រុក ឃុំ សកម្មជន CNRP ចំនួន១៣៨រូប បានអានលិខិតប្តេជ្ញាចិត្ត និងស្មោះស្ម័គ្រ រួមរស់ជាមួយគណបក្សប្រជាជនកម្ពុជា ចាប់ពីពេលវេលាម៉ោង ថ្ងៃនេះរហូត និងសន្យាចូលរួមផ្តល់មាតិ យល់បល់អភិវឌ្ឍនៅតាមមូលដ្ឋាននានា ក្នុងភូមិសាស្ត្រខេត្តបន្ទាយមានជ័យ ។
លោកក៏បានសម្តែងការមិនពេញចិត្ត ចំពោះលោក សម រង្សី អតីតប្រធានបក្ស និងលោក កឹម សុខា ដែលបានបំបែកបំបាក់សាមគ្គីផ្ទៃក្នុង លាបពណ៌ គ្រប់យុត្តិសាស្ត្រ បម្រើបរទេសផងដែរ។ ដូច្នេះលោក និងសមាជិកទាំងអស់គ្នាមិនចូលរួមបន្តសកម្មភាព និងមិនគាំទ្រ ទង្វើក្បត់ជាតិមាតុភូមិកម្ពុជាឡើយ។
សូមបញ្ជាក់ថា ក្នុងពិធីនោះ លោក គោស៊ុ សារឿត ក៏បានផ្តល់កាដូរកំដរដៃដល់ក្រុមការងារ និងសមាជិកគណបក្សប្រជាជនកម្ពុជា មូលដ្ឋាន និងអតីតក្រុមប្រឹក្សាស្រុក ក្រុង សកម្មជនសង្គ្រោះជាតិ ប្រមាណជា៥០០រូប ក្នុង១រូប ទទួលបានថវិកា ចំនួន១០ម៉ឺនរៀលផងដែរ ៕
