(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានប្រកាសថា ឱកាសរបស់អតីតសមាជិកក្រុមប្រឹក្សាឃុំ/សង្កាត់របស់គណបក្សសង្រ្គោះជាតិ ក្នុងការចុះចូលជាមួយគណបក្សប្រជាជនកម្ពុជាដើម្បីរក្សាតួនាទី នឹងត្រូវបញ្ចប់នៅម៉ោង៩៖០០នាទីយប់ ថ្ងៃទី២៦ ខែវិច្ឆិកា ឆ្នាំ២០១៧នេះ។

សម្តេចតជោ ហ៊ុន សែន បានប្រកាសយ៉ាងដូច្នេះថា៖ «ថ្ងៃនេះទី២៦ វិច្ឆិកា គឺជាថ្ងៃឱសានវាទ និងជាឱកាសចុងក្រោយ របស់បងប្អូនមកពីអតីត គណបក្ស CNRP ដែលត្រូវបានតុលាការកំពូលបានរំលាយដោយសាលដីការ កាលពីថ្ងៃទី១៦ វិច្ឆិកា ២០១៧ កន្លងទៅនេះ។ គណបក្សប្រជាជនកម្ពុជា រីករាយរង់ចាំស្វាគមន៍បងប្អូនរហូតដល់ម៉ោង ៩:០០យប់នេះ»។

ទោះជាយ៉ាងនេះក្តី សម្តេចតេជោ ហ៊ុន សែន បានបញ្ជាក់បន្តទៀតថា ក៏បានថ្លែងអំណរគុណសមាជិកថ្មីទាំងអស់ ដែលបានស្ម័គ្រចិត្តចូលមករួមរស់ជាមួយ គណបក្សប្រជាជនកន្លងមកនេះ ដើម្បីរួមគ្នាពួតដៃកសាង និងអភិវឌ្ឍ ប្រទេសជាតិឱ្យកាន់តែរីកចម្រើន។

សូមជំរាបថា នៅព្រលប់ថ្ងៃទី២៥ ខែវិច្ឆិកា ឆ្នាំ២០១៧ម្សិលមិញ អភិបាលរាជធានី-ខេត្តទូទាំងប្រទេសកម្ពុជា បានថ្លែងប្រាប់បណ្ដាញ​ព័ត៌មានដ៏ធំមួយនៅកម្ពុជា Fresh News ឲ្យដឹងថា អតីតមន្ដ្រីគណបក្សសង្គ្រោះជាតិសរុបជិត២,៣០០នាក់ហើយ ស្មើនឹងប្រមាណជិត៥០% បានចុះចូលជាមួយគណបក្សកាន់អំណាច ក្រោយគណបក្សសង្រ្គោះជាតិ ត្រូវបានកាត់រំលាយដោយតុលាការកំពូលរបស់កម្ពុជា។

ការចុះចូលរបស់អតីតមន្ដ្រីគណបក្សសង្គ្រោះជាតិដ៏ច្រើនសន្ធឹកសន្ធាប់នេះ ត្រូវបានអភិបាលរាជធានី-ខេត្តទូទាំងប្រទេស បញ្ជាក់ប្រាប់បណ្ដាញព័ត៌មាន Fresh News ឲ្យដឹងថា រួមមានតំណាងរាស្ដ្រ, សមាជិកក្រុមប្រឹក្សាខេត្ត សមាជិកក្រុមប្រឹក្សាក្រុង-ស្រុក មេឃុំ ចៅសង្កាត់, ជំទប់ទី១ ជំទប់ទី២, សមាជិកក្រុមប្រឹក្សា ឃុំសង្កាត់ និងបេក្ខជនបម្រុង សរុបចំនួន ២,២៨៩នាក់។

អភិបាលរាជធានី-ខេត្តទូទាំងប្រទេស បានបញ្ជាក់បន្ថែមទៀតថា ការកើនឡើងយ៉ាងគំហុកដូចទឹកបាក់ទំនប់នៃការចុះចូលនេះ កើតឡើងរយៈពេល២ថ្ងៃចុងក្រោយនេះតែម្ដង។

ខាងក្រោមនេះ ចំនួននៃអតីតមន្ដ្រីរបស់គណបក្សសង្គ្រោះជាតិ តាមបណ្ដារាជធានី-ខេត្តទូទាំងប្រទេស ដែលបានចុះចូលជាមួយគណបក្សប្រជាជនកម្ពុជា គិតត្រឹមព្រលប់ថ្ងៃទី២៥ ខែវិច្ឆិកា ឆ្នាំ២០១៧នេះ៖

១៖ ខេត្តបន្ទាយមានជ័យ ចំនួន១៣៨នាក់​
២៖ ខេត្តបាត់ដំបង ចំនួន​១២៤នាក់
៣៖ ខេត្តកំពង់ចាម ចំនួន​១៨០នាក់
៤​៖ ខេត្តកំពង់ឆ្នាំង ចំនួន​៩៥នាក់
៥៖ ខេត្តកំពង់ស្ពឺ ចំនួន​១១៥នាក់
៦៖ ខេត្តកំពង់ធំ ចំនួន​១៧៤នាក់
៧៖ ខេត្តកំពត ចំនួន​១៤១នាក់
៨៖ ខេត្តកណ្ដាល ចំនួន​​១៥១នាក់
៩៖ ខេត្តកោះកុង ចំនួន​១១៥នាក់
១០៖ ខេត្តក្រចេះ ចំនួន​៣៣នាក់
១១៖ ខេត្តមណ្ឌលគិរី ចំនួន​១២នាក់
១២៖ រាជធានីភ្នំពេញ ចំនួន​១៤៩នាក់
១៣៖ ខេត្តព្រះវិហារ ចំនួន​៤៥នាក់
១៤៖ ខេត្តព្រៃវែង ចំនួន​១៣៩នាក់
១៥៖ ខេត្តពោធិ៍សាត់ ចំនួន​៩៨នាក់
១៦៖ ខេត្តរតនគិរី ចំនួន​៥នាក់
១៧៖ ខេត្តសៀមរាប ចំនួន៨៩នាក់
១៨៖ ខេត្តព្រះសីហនុ ចំនួន៥៤នាក់
១៩៖ ខេត្តស្ទឹងត្រែង ចំនួន៣៧នាក់
២០៖ ខេត្តស្វាយរៀង ចំនួន១០៧នាក់
២១៖ ខេត្តតាកែវ ចំនួន១១៦នាក់
២២៖ ខេត្តកែប ចំនួន៥នាក់
២៣៖ ខេត្តប៉ៃលិន ចំនួន៨៤នាក់
២៤៖ ខេត្តឧត្តរមានជ័យ ចំនួន២១នាក់
២៥៖ ខេត្តត្បូងឃ្មុំ ចំនួន៦២នាក់៕