(កំពង់ចាម)៖ កម្លាំងនគរបាលខេត្តកំពង់ចាម ក្រោមការបញ្ជាផ្ទាល់ពីលោកឧត្តមសេនីយ៍ត្រី ឯម កុសល ស្នងការនគរបាលខេត្ត នៅថ្ងៃទី២៣-២៤ ខែវិច្ឆិកា ឆ្នាំ២០១៧ បានបើកប្រតិបត្តិការមួយថ្ងៃពេញ ដោយឃាត់ខ្លួនជនសង្ស័យពាក់ព័ន្ធករណីគ្រឿងញៀន បាន១៤នាក់ នៅស្រុកបាធាយ ស្រុកស្ទឹងត្រង់ ស្រុកចំការលើ និងស្រុកកំពង់សៀម។
ស្នងការនគរបាលខេត្ត លោកឧត្តមសេនីយ៍ត្រី ឯម កុសល បានឲ្យដឹងនៅព្រឹកថ្ងៃទី២៤ ខែវិច្ឆិកា ឆ្នាំ២០១៧នេះថា ករណីទី១នៅចំណុចភូមិផ្អាវ ឃុំផ្អាវ ស្រុកបាធាយ ដោយជំនាញការិយាល័យប្រឆាំងគ្រឿងញៀន សហការជាមួយកម្លាំងជំនាញអធិការដ្ឋាននគរបាលជើងព្រៃ និងស្រុកបាធាយ ដឹកនាំដោយលោកវរសេនីយ៍ត្រី ជីវ សេងរស់ នាយរងការិយាល័យប្រឆាំងគ្រឿងញៀន ដោយឃាត់ខ្លួនជនសង្ស័យ០៤នាក់ ដកហូតទូរស័ព្ទដៃ០៣គ្រឿង។
ករណីទី២៖ នៅចំណុចភូមិផ្អាវ ឃុំផ្អាវ ស្រុកបាធាយ ជំនាញការិយាល័យប្រឆាំងគ្រឿងញៀន សហការជាមួយកម្លាំងជំនាញអធិការដ្ឋាននគរបាលស្រុកបាធាយ អនុវត្តដីកាបង្គាប់ឲ្យចាប់ខ្លួន លេខ១៩៤១តព្រ ចុះថ្ងៃទី២៥ ខែមេសា ឆ្នាំ២០១៧ ចេញដោយលោក សួន សំណាង ចៅក្រមជំនុំជម្រះ សាលាដំបូងខេត្តកំពង់ចាម ឃាត់ខ្លួនជនសង្ស័យឈ្មោះ ហឿន ហុង ភេទប្រុស អាយុ១៧ឆ្នាំ ពីបទជួញដូរដោយខុសច្បាប់នូវសារធាតុញៀន កាលពីថ្ងៃទី១០ ខែកក្កដា ឆ្នាំ២០១៧។
ករណីទី៣៖ នៅចំណុចភូមិបុសពោធិ៍ ឃុំមេសជ្រៃ ស្រុកស្ទឹងត្រង់ កម្លាំងជំនាញអធិការដ្ឋាននគរបាលស្រុកស្ទឹងត្រង់ សហការជាមួយកម្លាំងប៉ុស្តិ៍នគរបាលរដ្ឋបាលមេសជ្រៃ បានចុះល្បាត និងបង្ក្រាបឃាត់ខ្លួនជនសង្ស័យម្នាក់ ខណ:ពេលកំពុងប្រើប្រាស់គ្រឿងញៀន ឈ្មោះ ផុន ផា ភេទប្រុស អាយុ១៧ឆ្នាំ ចំណែកបក្សពួកបានរត់គេចខ្លួនបាត់ ដោយយប់ងងិត។
ករណីទី៤៖កម្លាំងជំនាញនៃអធិការដ្ឋាននគរបាលស្រុកចំការលើ ដឹកនាំដោយលោកអនុសេនីយ៍ឯក មុំ ធន់ អធិការរងទទួលផែនប្រឆាំងគ្រឿងញៀន បានចុះត្រួតពិនិត្យអាវុធ ជាតិផ្ទុះនៅចំណុចផ្លូវលេខ៧១A ភូមិតាប៉ុម ឃុំចំការអណ្ដូង ស្រុកចំការលើ ធ្វើការបង្ក្រាបឃាត់ខ្លួនសង្ស័យចំនួន០២នាក់ ហើយបានធ្វើការឆែកឆេររកឃើញវត្ថុតាង ម្សៅក្រាមពណ៌ស សង្ស័យជាថ្នាំញៀន១កញ្ចប់ ទូរស័ព្ទដៃ០១គ្រឿង និងដកហូតម៉ូតូ០១គ្រឿង។ ដោយមានចម្លើយសារភាពរបស់ជនសង្ស័យទាំង០២នាក់ខាងលើ នៅថ្ងៃដដែលវេលាម៉ោង០៩៖៥៥នាទី កម្លាំងជំនាញអធិការដ្ឋាន បានសហការជាមួយ កម្លាំងប៉ុស្ដិ៍នគរបាលរដ្ឋបាលតាប្រុក បន្ដកិច្ចប្រតិបត្តិការទៅផ្ទះមុខសញ្ញាជួញដូរគ្រឿងញៀនខុសច្បាប់ ធ្វើការបង្ក្រាបឃាត់ខ្លួនបានជនសង្ស័យចំនួន០៤នាក់ទៀត ដែលកំពុងប្រើប្រាស់គ្រឿងញៀននៅលើផ្ទះ ហើយដកហូតបាន ម្សៅក្រាមពណ៌សចំនួន១កញ្ចប់ ឧបករណ៍សេពគ្រឿងញៀន ទូរស័ព្ទដៃ០៥គ្រឿង កាំបិតចុងស្រួច ០១ដើម និងដកហូតម៉ូតូ០២គ្រឿង និងវត្ថុតាងមួយចំនួនទៀត។
ករណីទី៥៖ ឈានចូលនៅថ្ងៃទី២៤ ខែវិច្ឆិកា ឆ្នាំ២០១៧ នៅចំណុចក្លឹបកម្សាន្ត ហ្គោល ស្ថិតក្នុងភូមិបឹងស្នាយ ឃុំសំបួរមាស ក្រុងកំពង់ចាម ជំនាញការិយាល័យប្រឆាំងគ្រឿងញៀន សហការជាមួយកម្លាំងជំនាញអធិការដ្ឋាននគរបាលស្រុកកំពង់សៀម និងក្រុងកំពង់ចាម ដឹកនាំដោយលោកវរសេនីយ៍ទោ ឯក ប៉ាន់ដន អធិការនគរបាលស្រុកកំពង់សៀម និងលោកវរសេនីយ៍ត្រី ជីវ សេងរស់ នាយរងការិយាល័យប្រឆាំងគ្រឿងញៀន ប្រតិបត្តិការបង្ក្រាបករណីជួញដូរដោយខុសច្បាប់នូវសារធាតុញៀន ឃាត់ខ្លួនជនសង្ស័យ០២នាក់ ស្រីម្នាក់។ ដកហូតបាន ម្សៅក្រាមពណ៌ស១កញ្ចប់ និងសម្ភារៈមួយចំនួន។
បើតាមលោកឧត្តមសេនីយ៍ស្នងការ ក្រោយប្រតិបត្តិការជនសង្ស័យទាំងអស់នេះ ត្រូវបានបញ្ជូនទៅការិយាល័យជំនាញ ដើម្បីចាត់ការបន្ដតាមនីតិវិធី៕
