(កណ្តាល)៖ រហូតមកដល់ថ្ងៃទី២៤ ខែវិច្ឆិកា ឆ្នាំ២០១៧នេះ អតីតសមាជិកក្រុមប្រឹក្សាឃុំ និងបេក្ខជនបម្រុង មកពីគណបក្សសង្គ្រោះជាតិ នៅទូទាំងស្រុកពញាឮ ខេត្តកណ្តាល ចំនួន១៩រូប បានសុំចូលរួមរស់ជីវភាពនយោបាយ ជាមួយគណបក្សប្រជាជនកម្ពុជា។
ការសម្រេចដើរចេញរបស់ អតីតមន្រ្តីគណបក្សសង្រ្គោះជាតិទាំង១៩រូបនេះ បានធ្វើឡើងបន្ទាប់ពីតុលាការកំពូល បានកាត់រំលាយគណបក្សសង្រ្គោះជាតិ ដែលពាក់ព័ន្ធនឹងការប្រព្រឹត្តអំពើក្បត់ជាតិ ព្រមទាំងបានហាមឃាត់សមាជិកជាន់ខ្ពស់ របស់គណបក្សនេះ ចំនួន១១៨រូប មិនឱ្យធ្វើនយោបាយ រយៈពេល៥ឆ្នាំផងដែរ កាលពីថ្ងៃទី១៦ ខែវិច្ឆិកា ឆ្នាំ២០១៧។
គណបក្សប្រជាជនកម្ពុជាស្រុកពញាឮ ខេត្តកណ្តាល បានប្រកាសស្វាគមន៍ និងទទួលសមាជិកសមាជិកាថ្មី មកពីអតីតគណបក្សសង្គ្រោះជាតិទាំង១៩រូប ដែលសុំចូលរួមរស់ជីវភាពនយោបាយជាមួយ គណបក្សប្រជាជនកម្ពុជា បន្ទាប់ពីបានជ្រួតជ្រាប នូវអំពើក្បត់ជាតិរបស់មេបក្សខ្លួន។ អតីតមន្រ្តីគណបក្សសង្គ្រោះជាតិទាំង១៩រូបរួមមាន៖
ទី១៖ នៅឃុំវិហ៊ារលួងចំនួន២នាក់ គឺឈ្មោះ ប៉ាល់ ថុល អតីតបេក្ខជនបម្រុង និងឈ្មោះ ប៉ាល់ យ៉ាន អតីតបេក្ខជនបម្រុង
ទី២៖ ឃុំព្រែកតាទែនចំនួន២នាក់ គឺឈ្មោះ ផន សុភាព អតីតបេក្ខជនបម្រុង និងឈ្មោះ អ៊ុន សុផុន អតីតបេក្ខជនបម្រុង
ទី៣៖ ឃុំឈ្វាំងចំនួន២នាក់ គឺឈ្មោះ ជឹម ជឺន អតីតបេក្ខជនបម្រុង និងឈ្មោះ ចាយ ជួន អតីតបេក្ខជនបម្រុង
ទី៤៖ ឃុំទំនប់ធំម្នាក់ គឺឈ្មោះ ឈិត ម៉េត អតីតបេក្ខជនបម្រុង
ទី៥៖ ឃុំជ្រៃលាស់ម្នាក់ គឺឈ្មោះ នៅ ចាន់អូន អតីតបេក្ខជនបម្រុង
ទី៦៖ ឃុំភ្នំបាតម្នាក់ គឺឈ្មោះ ចំរើន វី អតីតបេក្ខជនបម្រុង។
គណបក្សប្រជាជនកម្ពុជាស្រុកពញាឮ ខេត្តកណ្តាល បានប្រកាសស្វាគមន៍ និងទទួលសមាជិកសមាជិកាថ្មី មកពីអតីតគណបក្សសង្គ្រោះជាតិទាំង៨រូបនោះ ដែលសុំចូលរួមរស់ជីវភាពនយោបាយជាមួយ គណបក្សប្រជាជនកម្ពុជា បន្ទាប់ពីបានជ្រួតជ្រាបនូវអំពើក្បត់ជាតិរបស់មេបក្សខ្លួន។
សូមជម្រាបថា ដោយសារតែសន្ទុះនៃការសម្រុកចុះចូលបាននិងកំពុងកើនឡើងយ៉ាងខ្លាំង ហើយម្យ៉ាងទៀតថ្ងៃកំណត់ទី២៤ ខែវិច្ឆិកា អាចមានការរៀបចំមិនទាន់ ដូច្នេះសម្ដេចតេជោ ហ៊ុន សែន នាយករដ្ឋមន្រ្តី នៃកម្ពុជា បានប្រកាសផ្តល់ឱកាសបន្តជូនមន្រ្តីគណបក្សសង្គ្រោះជាតិ នៅថ្នាក់មូលដ្ឋានទាំងអស់ មកចូលរួមជីវភាពនយោបាយ ជាមួយគណបក្សប្រជាជន រហូតដល់ម៉ោង៩យប់ ថ្ងៃទី២៦ ខែវិច្ឆិកា ឆ្នាំ២០១៧។
សម្តេចតេជោ ហ៊ុន សែន បានអំពាវនាវឲ្យអតីតមន្រ្តីគណបក្សសង្រ្គោះជាតិ ដែលត្រូវបានតុលាការកំពូលកាត់រំលាយ សូមប្រញាប់ប្រញាល់ចុះចូលជាមួយ គណបក្សប្រជាជនកម្ពុជា ដើម្បីទទួលបាននូវតួនាទីឋានៈអ្វីៗដដែល ព្រោះការកំណត់ពេលវេលាត្រឹមយប់ថ្ងៃទី២៦នេះ ធ្វើឡើងតាមលក្ខខណ្ឌរបស់គ.ជ.ប៕
