(ហ្សឺណែវ, ស្វីស)៖ អង្គការពាណិជ្ជកម្មពិភពលោក (WTO) បានវាយតម្លៃខ្ពស់ចំពោះវឌ្ឍនភាព និងភាពរឹងមាំនៃសេដ្ឋកិច្ចរបស់ប្រទេសកម្ពុជា ជាពិសេសការបំពេញតួនាទីបានយ៉ាងល្អក្នុងនាមជាសមាជិករបស់អង្គការ WTO រយៈពេលប្រមាណ១៣ឆ្នាំនេះ។
ការវាយតម្លៃនេះបានធ្វើឡើងក្នុងកិច្ចប្រជុំត្រួតពិនិត្យឡើងវិញនូវគោលនយោបាយពាណិជ្ជកម្មលើកទី២របស់កម្ពុជានៅអង្គការពាណិជ្ជកម្មពិភពលោក ដែលបានធ្វើឡើងនៅទីក្រុងហ្សឺណែវ ប្រទេសស្វីស នាថ្ងៃទី២៣ ខែវិច្ឆិកា ឆ្នាំ២០១៧។ លោក ប៉ាន សូរស័ក្តិ រដ្ឋមន្រ្តីពាំណិជ្ជកម្ម បានដឹកនាំគណៈប្រតិភូតំណាងរាជរដ្ឋាភិបាលកម្ពុជាចូលរួមក្នុងកិច្ចប្រជុំនេះ។
លោក ប៉ាន សូរស័ក្តិ បានថ្លែងប្រាប់ Fresh News ពីទីក្រុងហ្សឺណែវ ប្រទេសស្វីសថា កិច្ចប្រជុំបានបញ្ចប់ដោយជោគជ័យ និងទទួលបានការកោតសរសើរ និងវាយតម្លៃខ្ពស់ពីបណ្តាប្រទេសជាសមាជិក WTO។
លោករដ្ឋមន្រ្តីបានឲ្យដឹងដែរថា ក្នុងកិច្ចប្រជុំការត្រួតពិនិត្យទ្បើងវិញនូវគោលនយោបាយពាណិជ្ជកម្ម លើកទី២ របស់កម្ពុជា មានប្រទេសជាសមាជិកអង្គការពាណិជ្ជកម្មពិភពលោក រួមទាំងតំណាងប្រទេសអាស៊ាន តំណាងក្រុមប្រទេសអភិវឌ្ឍន៍តិចតួច និងតំណាងអង្គការអន្តរជាតិនានា បានកត់សម្គាល់ និងសំដែងការកោតសរសើរចំពោះវឌ្ឍនភាព របស់កម្ពុជា ក្នុងការសម្រេចបាននូវកំណើនសេដ្ឋកិច្ច និងការរក្សាបានស្ថេរភាពម៉ាក្រូសេដ្ឋកិច្ច ក្នុងអំឡុងពេលត្រួតពិនិត្យទ្បើងវិញ នូវគោលនយោបាយពាណិជ្ជកម្មលើកទី២របស់កម្ពុជា។
លោក Juan Carlos Gonzalez អគ្គរដ្ឋទូតប្រទេសកូឡុំប៊ី និងជាប្រធានអង្គប្រជុំបានវាយតម្លៃខ្ពស់ ចំពោះការសម្រេចបានជាវិជ្ជមាននៃវឌ្ឍនភាពសេដ្ឋកិច្ចរបស់កម្ពុជាកន្លងមក។ ទន្ទឹមនឹងនេះ លោកប្រធានអង្គប្រជុំក៏ជំរុញឲ្យកម្ពុជាបន្តកិច្ចការដែលកំពុងធ្វើ និងបំពេញកាតព្វកិច្ចរបស់ខ្លួនបន្ថែមទៀត ពិសេសតាមការស្នើសុំរបស់សមាជិកអង្គការពាណិជ្ជកម្មពិភពលោក ដើម្បីលើកកម្ពស់តម្លាភាពក្នុងរបបពាណិជ្ជកម្ម និងអនុលោមភាពស្របតាមគោលការណ៍ ដែលមានចែងក្នុងបទដ្ឋានអន្តរជាតិ ដែលកម្ពុជាបានចូលជាភាគីហត្ថលេខា។
បន្ថែមលើសពីនេះ ប្រទេសសមាជិកអង្គការពាណិជ្ជកម្មពិភពលោកជាច្រើនដែលចូលរួម បានសំដែងការសារទរចំពោះសមិទ្ធផលរបស់កម្ពុជា ដែលកើតចេញពីគោលនយោបាយ និងផែនការយុទ្ធសាស្រ្តនានា រួមមាន គោលនយោបាយអភិវឌ្ឍន៍ឧស្សាហកម្ម ឆ្នាំ២០១៥-២០២៥ និងផែនការយុទ្ធសាស្រ្តអភិវឌ្ឍន៍វិស័យទេសចរណ៍ ឆ្នាំ២០១២-២០២០ជាដើម។
តំណាងសហរដ្ឋអាមេរិក និងសហភាពអឺរ៉ុប ក៏បានទទួលស្គាល់ចំពោះការរីកចម្រើន នៃសេដ្ឋកិច្ចដ៏រឹងមាំរបស់កម្ពុជា ព្រមទាំងបង្ហាញការកោតសរសើរចំពោះការខិតខំរបស់កម្ពុជា ក្នុងការអនុវត្តច្បាប់ទាក់ទងកម្មសិទ្ធិបញ្ញា ព្រមទាំងការបន្តអនុម័ត និងអនុវត្តកិច្ចព្រមព្រៀងអន្តរជាតិនានា។
នៅក្នុងកិច្ចប្រជុំនោះលោក ប៉ាន សូរស័ក្តិ បានអរគុណចំពោះលោកស្រី Frances Mary Lisson អគ្គរដ្ឋទូតអូស្ត្រាលីដែលជា Discussant បណ្តាសមាជិកអង្គការពាណិជ្ជកម្មពិភពលោក និងអង្គការដៃគូរអភិវឌ្ឍន៍ ដែលតែងតែជួយជ្រោមជ្រែងកម្ពុជា ក្នុងកិច្ចការអភិវឌ្ឍន៍ និងការរក្សាទំនាក់ទំនងល្អរបស់កម្ពុជាក្នុងឆាកអន្តរជាតិ។
ជាមួយគ្នានេះ លោករដ្ឋមន្រ្តី បានធ្វើកិច្ចអន្តរាគមន៍ចំពោះបញ្ហាមួយចំនួន ដែលលើកឡើងដោយប្រទេសសមាជិកអង្គការពាណិជ្ជកម្មពិភពលោក រួមមាន ការធ្វើឲ្យប្រសើរឡើងនូវបរិយាកាសវិនិយោគ និងធុរកិច្ច ការបង្កើនភាពប្រកួតប្រជែង កំណែទម្រង់ប្រព័ន្ធយុត្តិធម៌ និងអភិបាលកិច្ចល្អ ការធ្វើពិពិធកម្មទីផ្សារនាំចេញរបស់កម្ពុជា គោលនយោបាយម៉ាក្រូសេដ្ឋកិច្ច (ដូចជាអត្រាពន្ធគយ ការធ្វើលទ្ធកម្មសាធារណៈ និងបំណុលសាធារណៈជាដើម) និងវឌ្ឍនភាពនៃការបង្កើតបទប្បញ្ញត្តិច្បាប់មួយចំនួន ដែលជាការសន្យារបស់កម្ពុជា ស្របតាមអភិក្រមអង្គការពាណិជ្ជកម្មពិភពលោក។
លោករដ្ឋមន្រ្តី បានលើកឡើងថា គំនិតផ្តួចផ្តើមនៃការបង្កើតស្ថានបេសកកម្មអចិន្ត្រៃយ៍កម្ពុជា ប្រចាំអង្គការពាណិជ្ជកម្មពិភពលោក ជាសក្ខីភាពបង្ហាញអំពីការប្តេជ្ញាចិត្តរបស់កម្ពុជាក្នុងក្របខ័ណ្ឌអង្គការពាណិជ្ជកម្មពិភពលោក ដែលនឹងជួយជ្រោមជ្រែងបន្ថែមដល់ការចូលរួមរបស់កម្ពុជាក្នុងកិច្ចការអន្តរជាតិពាក់ព័ន្ធនឹងវិស័យពាណិជ្ជកម្ម ពិសេសការបំពេញតួនាទីរបស់កម្ពុជា ជាប្រធានសម្របសម្រួលប្រទេសអភិវឌ្ឍន៍តិចតួច៕
