(ត្បូងឃ្មុំ)៖ ត្រឹមតែមួយថ្ងៃទី២៣ ខែវិច្ឆិកា ឆ្នាំ២០១៧នេះ អតីតសមាជិកក្រុមប្រឹក្សាឃុំ-សង្កាត់ និងបេក្ខជនបម្រុង មកពីគណបក្សសង្គ្រោះជាតិ នៅទូទាំងខេត្តត្បូងឃ្មុំរហូតដល់១២រូប បានសុំចូលរួមរស់ជីវភាពនយោបាយ ជាមួយគណបក្សប្រជាជនកម្ពុជា។
ការសម្រេចដើរចេញរបស់ អតីតមន្រ្តីគណបក្សសង្រ្គោះជាតិទាំង១២រូបនេះ បានធ្វើឡើងបន្ទាប់ពីតុលាការកំពូល កាលពីថ្ងៃទី១៦ ខែវិច្ឆិកា ឆ្នាំ២០១៧ បានកាត់ទោសរំលាយគណបក្សសង្រ្គោះជាតិ ដែលពាក់ព័ន្ធនឹង ការប្រព្រឹត្តអំពើក្បត់ជាតិ ព្រមទាំងបានហាមឃាត់សមាជិកជាន់ខ្ពស់ របស់គណបក្សនេះ ចំនួន១១៨រូប មិនឱ្យធ្វើនយោបាយ រយៈពេល៥ឆ្នាំផងដែរ ។
គណបក្សប្រជាជនកម្ពុជាខេត្តត្បូងឃ្មុំ បានប្រកាសស្វាគមន៍ និងទទួលសមាជិកសមាជិកាថ្មី មកពីអតីតគណបក្សសង្គ្រោះជាតិចំនួន១២រូប ដែលសុំចូលរួមរស់ជីវភាពនយោបាយជាមួយ គណបក្សប្រជាជនកម្ពុជា បន្ទាប់ពីបានជ្រួតជ្រាប នូវអំពើក្បត់ជាតិរបស់មេបក្សខ្លួន។
អតីតមន្រ្តីគណបក្សសង្គ្រោះជាតិទាំង១២រូប មានអតីតសមាជិកក្រុមប្រឹក្សា៥នាក់ និងបំរុង ៧ នាក់ ក្នុងនោះរួមមាន៖
១៖ ស្រុកពញាក្រែក ៤នាក់៖
-សមាជិកក្រុមប្រឹក្សាឃុំកក់ ១នាក់ និងបេក្ខជនបំរុង ៣នាក់ ឃុំកោងកាង ១នាក់ ឃុំត្រពាំងផ្លូង ១នាក់ និងឃុំវាលម្លូរ ១នាក់ ។
២៖ ស្រុកអូររាំងឪ ៣នាក់៖
-សមាជិកស្ថិតក្នុងបញ្ជីបេក្ខជនពេញសិទ្ធិ តែមិនជាប់លេខនៅឃុំមៀន ២នាក់ ឃុំអំពិលតាពក១នាក់ ។
៣៖ ស្រុកត្បូងឃ្មុំ ២ នាក់ :
-សមាជិកក្រុមប្រឹក្សាឃុំថ្មពេជ្រ។
៤៖ ស្រុកតំបែរ ១នាក់
-ជំទប់ទី២ឃុំតំបែរ ។
៥៖ ស្រុកមេមត់ ១ នាក់ ជាសមាជិក
-ក្រុមប្រឹក្សាឃុំ រំចេក ។
៦៖ ក្រុងសួង ១ នាក់
-បេក្ខជនបំរុង សង្កាត់វិហារលួង ។
សម្រាប់ការចុះចូលពីសំណាក់អតីតមន្រ្តីគណបក្សសង្គ្រោះជាតិខាងលើនេះ ត្រូវបានសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងជាប្រមុខដឹកនាំគណបក្សប្រជាជនកម្ពុជា បានប្រកាសតាមបណ្តាញសារព័ត៌មាន Fresh News ថា «ការស្ម័គ្រចិត្តចុះចូលមកគណបក្សប្រជាជនកម្ពុជា មានឱសានវាទត្រឹមថ្ងៃទី២៤ ខែវិច្ឆិកាប៉ុណ្ណោះ ព្រោះការរៀបចំបញ្ជីក្រុមប្រឹក្សាឃុំសង្កាត់ថ្មី ដើម្បីបញ្ជូនទៅកាន់ គជប នឹងត្រូវបិទត្រឹមថ្ងៃទី២៤ ខែវិច្ឆិកា, ប្រសិនបើចាប់ពីថ្ងៃទី២៥ ខែវិច្ឆិកាទៅ ការចុះចូលនៅតែបន្តដដែល ប៉ុន្តែមិនផ្តល់តួនាទីអ្វីនោះទេ»។
សម្តេចតេជោ ហ៊ុន សែន បានប្រសាសន៍អំពាវនាវ ឲ្យអតីតមន្រ្តីគណបក្សសង្រ្គោះជាតិ ដែលត្រូវបានតុលាការកំពូលកាត់រំលាយ សូមប្រញាប់ប្រញាល់ចុះចូលជាមួយ គណបក្សប្រជាជនកម្ពុជា ដើម្បីទទួលបាននូវតួនាទីឋានៈអ្វីៗដដែល ព្រោះការកំណត់ពេលវេលាត្រឹមថ្ងៃទី២៤ ខែវិច្ឆិកានេះ ធ្វើឡើងតាមលក្ខខណ្ឌរបស់ គ.ជ. ប៕
