(កំពង់ចាម)៖ អតីតបេក្ខជនបម្រុងក្រុមប្រឹក្សាឃុំ ក្នុងស្រុកព្រៃឈរ និងស្រុកកងមាស ខេត្តកំពង់ចាម៧នាក់ទៀតហើយ ដែលទើបរលាយបានប្រកាសចុះចូលជាមួយ គណបក្សប្រជាជនកម្ពុជា ដោយសារតែពួកគាត់បានឃើញ នូវអំពើក្បត់ជាតិរបស់មេគណបក្សសង្គ្រោះជាតិ ដែលបម្រើបរទេស។ នេះបើតាមលិខិតដែលអង្គភាព Fresh News ទទួលបាននៅថ្ងៃទី២៣ ខែវិច្ឆិកា ឆ្នាំ២០១៧នេះ។
ការសម្រេចដើរចេញរបស់អតីតមន្រ្តីគណបក្សសង្រ្គោះជាតិទាំង៧រូបនេះ បានធ្វើឡើងបន្ទាប់ពីតុលាការកំពូល បានកាត់ទោសរំលាយគណបក្សសង្រ្គោះជាតិ ដែលពាក់ព័ន្ធនឹង ការប្រព្រឹត្តអំពើក្បត់ជាតិ ព្រមទាំងបានហាមឃាត់សមាជិកជាន់ខ្ពស់របស់គណបក្សនេះ ចំនួន១១៨រូប មិនឱ្យធ្វើនយោបាយ រយៈពេល៥ឆ្នាំផងដែរ កាលពីថ្ងៃទី១៦ ខែវិច្ឆិកា ឆ្នាំ២០១៧។
អតីតមន្ដ្រីគណបក្សសង្គ្រោះជាតិទាំង៧រូបនោះ រួមមាន៖
ទី១៖លោក ស្រ៊ីម ហឿន អាយុ៤៣ឆ្នាំ បេក្ខជនបម្រុងក្រុមប្រឹក្សាឃុំមៀន ស្រុកព្រៃឈរ ខេត្តកំពង់ចាម
ទី២៖លោក នួន ថេន អាយុ៥៤ឆ្នាំ បេក្ខជនបម្រុងក្រុមប្រឹក្សាឃុំថ្មពូន ស្រុកព្រៃឈរ ខេត្តកំពង់ចាម
ទី៣៖ លោក គុន ណារុន អតីតបេក្ខជនបម្រុង ឃុំសូរគាង ស្រុកកងមាស ខេត្តកំពង់ចាម
ទី៤៖ លោក មាឃ តៃរិន អតីតបេក្ខជនបម្រុង ឃុំសូរគង ស្រុកកងមាស ខេត្តកំពង់ចាម
ទី៥៖ លោក ទ៊ុត សុភារស់ អតីតបេក្ខជនបម្រុង ឃុំសូរគាង ស្រុកកងមាស ខេត្តកំពង់ចាម
ទី៦៖ លោក ជិន សំអឿន អតីតបេក្ខជនបម្រុង ឃុំសូរគង ស្រុកកងមាស ខេត្តកំពង់ចាម
ទី៧៖ លោក សោ សុខធឿន អតីតបេក្ខជនបម្រុង ឃុំត្រពាំងព្រះ ស្រុកព្រៃឈរ ខេត្តកំពង់ចាម។
បើលិខិតដែលអង្គភាព Fresh News ទទួលបានសម្រាប់ស្រុកព្រៃឈរ ខេត្តកំពង់ចាម នៅថ្ងៃទី២៣ ខែវិច្ឆិកានេះ បេក្ខជនបម្រុងសរុប៧នាក់ហើយ ដែលបានចុះចូលជាមួយគណបក្សប្រជាជនកម្ពុជា។
អនុប្រធានគណបក្សប្រជាជនកម្ពុជាខេត្តកំពង់ចាម លោក គួច ចំរើន បានប្រកាសស្វាគមន៍ និងទទួលសមាជិកសមាជិកាថ្មី មកពីអតីតគណបក្សសង្គ្រោះជាតិទាំងអស់នោះ ដែលសុំចូលរួមរស់ជីវភាពនយោបាយជាមួយ គណបក្សប្រជាជនកម្ពុជា បន្ទាប់ពីបានជ្រួតជ្រាបនូវអំពើក្បត់ជាតិរបស់មេបក្សខ្លួន។
សម្រាប់ការចុះចូលពីសំណាក់អតីតមន្រ្តីគណបក្សសង្គ្រោះជាតិខាងលើនេះ ត្រូវបានសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងជាប្រមុខដឹកនាំគណបក្សប្រជាជនកម្ពុជា បានប្រកាសតាមបណ្តាញសារព័ត៌មាន Fresh News ថា «ការស្ម័គ្រចិត្តចុះចូលមកគណបក្សប្រជាជនកម្ពុជា មានឱសានវាទត្រឹមថ្ងៃទី២៤ ខែវិច្ឆិកាប៉ុណ្ណោះ ព្រោះការរៀបចំបញ្ជីក្រុមប្រឹក្សាឃុំសង្កាត់ថ្មី ដើម្បីបញ្ជូនទៅកាន់ គជប នឹងត្រូវបិទត្រឹមថ្ងៃទី២៤ ខែវិច្ឆិកា, ប្រសិនបើចាប់ពីថ្ងៃទី២៥ ខែវិច្ឆិកាទៅ ការចុះចូលនៅតែបន្តដដែល ប៉ុន្តែមិនផ្តល់តួនាទីអ្វីនោះទេ»។
សម្តេចតេជោ ហ៊ុន សែន បានអំពាវនាវឲ្យអតីតមន្រ្តីគណបក្សសង្រ្គោះជាតិ ដែលត្រូវបានតុលាការកំពូលកាត់រំលាយ សូមប្រញាប់ប្រញាល់ចុះចូលជាមួយ គណបក្សប្រជាជនកម្ពុជា ដើម្បីទទួលបាននូវតួនាទីឋានៈអ្វីៗដដែល ព្រោះការកំណត់ពេលវេលាត្រឹមថ្ងៃទី២៤ ខែវិច្ឆិកា នេះ ធ្វើឡើងតាមលក្ខខណ្ឌរបស់ គ.ជ.ប៕
