(ភ្នំពេញ)៖ ក្នុងកិច្ចប្រជុំសមាគមមិត្តភាពកម្ពុជា-ថៃ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានថ្លែងឲ្យដឹងថា សមាគមមិត្តភាពកម្ពុជា-ថៃ បានជួយឲ្យចំណងមិត្តភាព និងកិច្ចសហប្រតិបត្តិការរបស់ប្រទេសទាំងពីរ កាន់តែរីកចម្រើនលូតលាស់ទ្វេរឡើង។
ថ្លែងក្នុងកិច្ចប្រជុំសមាគមមិត្តភាពកម្ពុជា-ថៃ នៅថ្ងៃទី២២ ខែវិច្ឆិកា ឆ្នាំ២០១៧នេះ សម្ដេចពិជ័យសេនា ទៀ បាញ់ បានថ្លែងថា «ទោះបីជាកន្លងមកសកម្មភាពមិនបានខ្លាំងក៏ដោយ សមាគមទាំងពីរនេះ បាននាំឲ្យចំណងមិត្តភាព និងកិច្ចសហប្រតិបត្តិការរបស់ប្រទេសទាំងពីរ បានលូតលាស់ជាបន្ដបន្ទាប់។ ដំណាក់កាលកន្លងមកឃើញថា ការដោះស្រាយបញ្ហាពលករ ការដោះស្រាយនៅតាមព្រំដែនការដឹកជញ្ចូនគ្រប់បែបយ៉ាងទាំងអស់ ត្រូវបានដោះស្រាយឲ្យមានការរីកចម្រើនជាបន្ដបន្ទាប់ ទំនិញទាំងឡាយដែលមានការកក់ស្ទះមួយចំនួនត្រូវបានសម្រួលបានយ៉ាងល្អប្រសើរ»។
សម្ដេច ទៀ បាញ់ បានគូសបញ្ជាក់ដែរថា តាមរយៈសមាគមកម្ពុជា-ថៃនេះ ពលកររបស់កម្ពុជា ត្រូវបានថៃជួយសម្រួលជាបន្ដបន្ទាប់ឲ្យក្លាយ
ជាពលករស្រប់ច្បាប់នាពេលខាងមុខនេះ។
សម្ដេចបានបញ្ជាក់ទៀតថា «ទោះបីជាកន្លងមកកម្ពុជា-ថៃមានភាពមិនចុះសម្រុងនឹងគ្នាយ៉ាងណាក៏ដោយប៉ុន្ដែឥឡូវនេះត្រូវបានលុបលាងជាបន្ដបន្ទាប់ និងនាំមកនូវភាពល្អូកល្អើន និងបានដោះស្រាយបញ្ហាជាមួយគ្នាយ៉ាងប្រពៃក្នុងរយៈពេលកន្លងមក»។
សូមបញ្ជាក់ថា រាជរដ្ឋាភិបាលកម្ពុជា បានសម្រេចបង្កើតសមាគមមិត្តភាពកម្ពុជា-ថៃ កាលពីខែធ្នូ ឆ្នាំ២០១៥ ដើម្បីរឹតចំណងមិត្តភាព សាមគ្គីភាព និងសហប្រតិបត្តិការរវាងកម្ពុជា-ថៃ ការពង្រឹង និងពង្រីកទំនាក់ទំនងលើគ្រប់ផ្នែក និងវិស័យដូចជាពាណិជ្ជកម្ម វិនិយោគ កសិកម្មវប្បធម៌ ទែសចរណ៍កីឡា អប់រំ សុខាភិបាល បណ្តុះបណ្តាលវិជ្ជាជីវៈនិងសង្គមកិច្ច។ សមាគមនេះ ក៏មានភារកិច្ចរៀបចំគម្រោងនិងកម្មវិធីសហប្រតិបត្តិការ ផ្លាស់ប្តូរយោបល់ ទស្សនកិច្ចសិក្សា ស្រាវជ្រាវ ចែករំលែកបទពិសោធន៍ ពង្រឹងប្រព័ន្ធទំនាក់ទំនងនិងធ្វើរបាយការណ៍ ពីសកម្មភាពដាក់ជូនរដ្ឋាភិបាលជាដើម។
សមាគមនេះមានសម្តេចពិជ័យសេនា ទៀ បាញ់ ជាប្រធាន ឧកញ៉ា លី យ៉ុងផាត់ ជាអនុប្រធាន ។ សមាគមនេះជាគណៈកម្មាធិការអន្តរក្រសួងសម្រាប់ទំនាក់ទំនងកម្ពុជា-ថៃ ដែលមានសមាជិកជាង ៧០រូប រាប់បញ្ចូលទាំងទីប្រឹក្សាផងដែរ ដែលជារដ្ឋមន្រ្តីមកពីក្រសួងឧស្សាហកម្ម និងសិប្បកម្ម ក្រសួងកសិកម្ម រដ្ឋមន្រ្តីក្រសួងបរិស្ថាន និងអគ្គលេខាធិការក្រុមប្រឹក្សាអភិវឌ្ឍន៍កម្ពុជា និងរដ្ឋលេខាធិការក្រសួងការបរទេស។ ទីប្រឹក្សាផ្សេងទៀតមានអភិបាលខេត្តបាត់ដំបង កោះកុង បន្ទាយមានជ័យ ឧត្តរមានជ័យ និងព្រះវិហារ។
ឧកញ៉ាចំនួន ៣៥រូបជាសមាជិក ក្នុងនោះរួមមាន លោក គិត ម៉េង លោក កុក អាន លោក ពុង ខៀវសែ លោក ឡាវ ម៉េងឃីន និងលោក អាន ម៉ាឌី ជាដើម។ សមាគមនេះ មានអគ្គលេខាធិការដ្ឋានមួយជាសេនាធិការ ដែលមានសមាជិកចំនួន៦រូប។ សមាគមមិត្តភាពកម្ពុជាថៃ មា
សមាគមមិត្តភាពកម្ពុជា-ថៃ ក៏មានសិទ្ធប្រើប្រាស់ថវិកា ដោយឡែករបស់ទីស្ដីការគណៈរដ្ឋមន្រ្ដី និងមានសិទ្ធិទទួល និងចាត់ចែងប្រើប្រាស់តាមនីតិវិធីច្បាប់ជាធរមាននូវធនធាន និងមូលនិធិដែលបានមកពីប្រភពផ្សេងៗទៀត សម្រាប់ដំណើរការការងាររបស់ខ្លួន៕
