(ព្រះវិហារ)៖ អតីតសមាជិកក្រុមប្រឹក្សាខេត្ត ស្រុក ឃុំ មេឃុំ និងជំទប់ ក្នុងខេត្តព្រះវិហារ សរុប៩នាក់ទៀតហើយ របស់គណបក្សសង្គ្រោះជាតិ ដែលទើបរលាយបានប្រកាសចុះចូលជាមួយ គណបក្សប្រជាជនកម្ពុជាដោយសារតែរូបគាត់ បានឃើញនូវអំពើក្បត់ជាតិរបស់មេគណបក្សសង្គ្រោះជាតិ ដែលបម្រើបរទេស។ នេះបើតាមលិខិតប្រកាសចុះចូល ដែលអង្គភាព Fresh News ទទួលបាននៅថ្ងៃទី២១ ខែវិច្ឆិកា ឆ្នាំ២០១៧នេះ។
ការសម្រេចដើរចេញរបស់អតីតមន្រ្តីគណបក្សសង្រ្គោះជាតិទាំង៩រូបនេះ បានធ្វើឡើងបន្ទាប់ពីតុលាការកំពូល បានកាត់ទោសរំលាយគណបក្សសង្រ្គោះជាតិ ដែលពាក់ព័ន្ធនឹង ការប្រព្រឹត្តអំពើក្បត់ជាតិ ព្រមទាំងបានហាមឃាត់សមាជិកជាន់ខ្ពស់របស់គណបក្សនេះ ចំនួន១១៨រូប មិនឱ្យធ្វើនយោបាយ រយៈពេល៥ឆ្នាំផងដែរ កាលពីថ្ងៃទី១៦ ខែវិច្ឆិកា ឆ្នាំ២០១៧។
អតីតមន្ដ្រីគណបក្សសង្គ្រោះជាតិទាំង៩រូបនេះ រួមមាន៖
ទី១៖លោក ស៊ឹង សាន់ដេ សមាជិកក្រុមប្រឹក្សាខេត្តព្រះវិហារ
ទី២៖លោក នង់ ឈីម សមាជិកក្រុមប្រឹក្សាស្រុករវៀង ខេត្តព្រះវិហារ
ទី៣៖លោក ឆិត អាយ ជំទប់ទី១ ឃុំរហ័ស ស្រុករវៀង ខេត្តព្រះវិហារ
ទី៤៖លោក ណយ ថេត ជំទប់ទី២ ឃុំរួសរាន់ ស្រុករវៀង ខេត្តព្រះវិហារ
ទី៥៖លោក លឹម មុនាលីន សមាជិកក្រុមប្រឹក្សាឃុំរួសរាន់ ស្រុករវៀង ខេត្តព្រះវិហារ
ទី៦៖លោក រស់ សឿន សមាជិកឃុំរក្សា ស្រុករវៀង ខេត្តព្រះវិហារ
ទី៧៖លោក ចាន់ សុធា សមាជិកក្រុមប្រឹក្សាឃុំរហ័ស ស្រុករវៀង ខេត្តព្រះវិហារ
ទី៨៖លោក វ៉ាន់ គឿន សមាជិកក្រុមប្រឹក្សាឃុំសង្កែ២ ស្រុកឆែប ខេត្តព្រះវិហារ
ទី៩៖លោក សោម មុត មេឃុំរមទម ស្រុករវៀង ខេត្តព្រះវិហារ។
គណបក្សប្រជាជនកម្ពុជាខេត្តព្រះវិហារ បានប្រកាសស្វាគមន៍ និងទទួលសមាជិកសមាជិកាថ្មី មកពីអតីតគណបក្សសង្គ្រោះជាតិទាំង៩រូបនេះ ដែលសុំចូលរួមរស់ជីវភាពនយោបាយជាមួយ គណបក្សប្រជាជនកម្ពុជា បន្ទាប់ពីបានជ្រួតជ្រាបនូវអំពើក្បត់ជាតិរបស់មេបក្សខ្លួន។
សម្រាប់ការចុះចូលពីសំណាក់អតីតមន្រ្តីគណបក្សសង្គ្រោះជាតិខាងលើនេះ ត្រូវបានសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងជាប្រមុខដឹកនាំគណបក្សប្រជាជនកម្ពុជា បានប្រកាសតាមបណ្តាញសារព័ត៌មាន Fresh News ថា «ការស្ម័គ្រចិត្តចុះចូលមកគណបក្សប្រជាជនកម្ពុជា មានឱសានវាទត្រឹមថ្ងៃទី២៤ ខែវិច្ឆិកាប៉ុណ្ណោះ ព្រោះការរៀបចំបញ្ជីក្រុមប្រឹក្សាឃុំសង្កាត់ថ្មី ដើម្បីបញ្ជូនទៅកាន់ គ.ជ.ប នឹងត្រូវបិទត្រឹមថ្ងៃទី២៤ ខែវិច្ឆិកា, ប្រសិនបើចាប់ពីថ្ងៃទី២៥ ខែវិច្ឆិកាទៅ ការចុះចូលនៅតែបន្តដដែល ប៉ុន្តែមិនផ្តល់តួនាទីអ្វីនោះទេ»។
សម្តេចតេជោ ហ៊ុន សែន បានអំពាវនាវឲ្យអតីតមន្រ្តីគណបក្សសង្រ្គោះជាតិ ដែលត្រូវបានតុលាការកំពូលកាត់រំលាយ សូមប្រញាប់ប្រញាល់ចុះចូលជាមួយ គណបក្សប្រជាជនកម្ពុជា ដើម្បីទទួលបាននូវតួនាទីឋានៈអ្វីៗដដែល ព្រោះការកំណត់ពេលវេលាត្រឹមថ្ងៃទី២៤ ខែវិច្ឆិកា នេះ ធ្វើឡើងតាមលក្ខខណ្ឌរបស់ គ.ជ.ប៕
