(ភ្នំពេញ)៖ ​ម្ចាស់ខុនដូរមួយកន្លែង ដែលស្ថិតនៅក្រុមទី៩ ភូមិទួលគោក សង្កាត់ទួលសង្កែ ខណ្ឌឬស្សីកែវ កំពុងរងការចោទប្រកាន់ថា បានយកផ្លូវសាធារណៈធ្វើអាជីវកម្មផ្ទាល់ខ្លួន ដោយបានបិទផ្លូវមិនឲ្យប្រជាពលរដ្ឋដែលមានលំនៅដ្ឋានក្បែរនោះឆ្លងកាត់ឡើយ។

ប្រជាពលរដ្ឋដែលមានលំនៅដ្ឋានក្បែរនោះ បានទទូចឲ្យអាជ្ញាធរខណ្ឌឬស្សីកែវ មេតា្ដជួយអន្ដរាគមន៍លើបញ្ហានេះផង ព្រោះថាពួកគាត់ពិតជាពិបាកក្នុងការធ្វើដំណើរចេញ ចូល លំនៅដ្ឋានខ្លាំងណាស់ រៀងរាល់ថ្ងៃនេះ ខណៈដែលពាក្យបណ្ដឹងបានដាក់ជូនអាជ្ញាធរក្នុងសង្កាត់ទួលសង្កែរួចរាល់ហើយ។

ពលរដ្ឋដែលបាននិងកំពុងទទួលរងការបំពាននោះ បានទូរស័ព្ទមកការិយាល័យនិពន្ធ អង្គភាព Fresh News នៅថ្ងៃទី២១ ខែវិច្ឆិកា ឆ្នាំ២០១៧នេះ ដោយបានរៀបរាប់ថា ម្ចាស់​ខុនដូរឈ្មោះ ចេតនា បានយកផ្លូវ​មកធ្វើអាជីវកម្មផ្ទាល់ខ្លួន ដោយលើកមូលហេតុថា ជាដីឡូតរបស់ខ្លួន ប៉ុន្តែ​នៅពីមុខ និងក្រោយផ្លូវ គឺសុទ្ធតែមានផ្ទះប្រជាជន​រស់នៅឆ្លងកាត់។

ប្រភពដដែលបានបញ្ជាក់ទៀតថា «ពេលដែលទៅសាកសួរ និងប្តឹងទៅអជ្ញារធរទួលសង្កែ គឺមិនមានលទ្ធផលអ្វីទេ គឺមានតែចំលើយថាជាដីឡូតរបស់ខ្លួនប៉ុណ្ណោះ​ ហើយម្ចាស់ដីឡូតក៏បាននិយាយដែរ ថាដីឡូតនេះជាដីរបស់ខ្លួន ដែលខ្លួនបានឲ្យខ្ចីប្រើ»។

យ៉ាងណាមិញពាក់ព័ន្ធបញ្ហានេះ អង្គភាព Fresh News មិនទាន់អាចសុំការបំភ្លឺពីម្ចាស់ខុនដូរនោះបាននៅឡើយទេ គិតត្រឹមរសៀលថ្ងៃទី២១ ខែវិច្ឆិកានេះ៕