(កំពង់ឆ្នាំង)៖ អតីតសមាជិកក្រុមប្រឹក្សា ជំទប់ និងមេបក្សឃុំ សរុប៨នាក់ទៀតហើយ ក្នុងមូលដ្ឋានខេត្តកំពង់ឆ្នាំង របស់គណបក្សសង្គ្រោះជាតិ ដែលទើបរលាយ បានប្រកាសចុះចូលជាមួយ គណបក្សប្រជាជនកម្ពុជាដោយសារតែពួកគាត់ បានឃើញនូវអំពើក្បត់ជាតិរបស់មេគណបក្សសង្គ្រោះជាតិ ដែលបម្រើបរទេស។ នេះបើតាមលិខិតប្រកាសចុះចូល ដែលអង្គភាព Fresh News ទទួលបាននៅថ្ងៃទី២០ ខែវិច្ឆិកា ឆ្នាំ២០១៧នេះ។
ការសម្រេចដើរចេញរបស់អតីតមន្រ្តីគណបក្សសង្រ្គោះជាតិទាំង៨រូបនេះ បានធ្វើឡើងបន្ទាប់ពីតុលាការកំពូល បានកាត់ទោសរំលាយគណបក្សសង្រ្គោះជាតិ ដែលពាក់ព័ន្ធនឹង ការប្រព្រឹត្តអំពើក្បត់ជាតិ ព្រមទាំងបានហាមឃាត់សមាជិកជាន់ខ្ពស់របស់គណបក្សនេះ ចំនួន១១៨រូប មិនឱ្យធ្វើនយោបាយ រយៈពេល៥ឆ្នាំផងដែរ កាលពីថ្ងៃទី១៦ ខែវិច្ឆិកា ឆ្នាំ២០១៧។
អតីតមន្ដ្រីគណបក្សសង្គ្រោះជាតិទាំង៨រូបនោះ រួមមាន៖
ទី១៖លោក អៃ ឈុន អាយុ៥៣ឆ្នាំ អតីតប្រធានគណបក្សឃុំជលសា ស្រុកកំពង់លែង
ទី២៖លោក សេង សំ អាយុ៤៥ឆ្នាំ អតីតជំទប់ទី២ ឃុំធ្លកវៀន ស្រុកកំពង់ត្រឡាច
ទី៣៖លោក កុយ ប៊ុនលី អតីតសមាជិកក្រុមប្រឹក្សាឃុំអូរឬស្សី ស្រុកកំពង់ត្រឡាច
ទី៤៖លោក ម៉ម សារ អតីតសមាជិកក្រុមប្រឹក្សាស្រុកកំពង់ត្រឡាច
ទី៥៖លោក សយ ប៊ុនគង់ អតីតជំទប់ទី២ ឃុំអូរឬស្សី ស្រុកកំពង់ត្រឡាច
ទី៦៖លោក ហ៊ុន ពៅ អតីតជំទប់ទី២ ឃុំតាំងក្រសាំង ស្រុកទឹកផុស
ទី៧៖លោក សោម ភារម្យ អតីតសមាជិកក្រុមប្រឹក្សាឃុំជ្រៃបាក់ ស្រុករលាប្អៀរ
ទី៨៖លោក ហ៊ីម មើ អតីតសមាជិកក្រុមប្រឹក្សាឃុំអូរឬស្សី ស្រុកកំពង់ត្រឡាច។
គណបក្សប្រជាជនកម្ពុជាខេត្តកំពង់ឆ្នាំង បានប្រកាសស្វាគមន៍ និងទទួលសមាជិកសមាជិកាថ្មី មកពីអតីតគណបក្សសង្គ្រោះជាតិទាំង៧រូបនេះ ដែលសុំចូលរួមរស់ជីវភាពនយោបាយជាមួយ គណបក្សប្រជាជនកម្ពុជា បន្ទាប់ពីបានជ្រួតជ្រាបនូវអំពើក្បត់ជាតិរបស់មេបក្សខ្លួន។
សម្រាប់ការចុះចូលពីសំណាក់អតីតមន្រ្តីគណបក្សសង្គ្រោះជាតិខាងលើនេះ ត្រូវបានសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងជាប្រមុខដឹកនាំគណបក្សប្រជាជនកម្ពុជា បានប្រកាសតាមបណ្តាញសារព័ត៌មាន Fresh News ថា «ការស្ម័គ្រចិត្តចុះចូលមកគណបក្សប្រជាជនកម្ពុជា មានឱសានវាទត្រឹមថ្ងៃទី២៤ ខែវិច្ឆិកាប៉ុណ្ណោះ ព្រោះការរៀបចំបញ្ជីក្រុមប្រឹក្សាឃុំសង្កាត់ថ្មី ដើម្បីបញ្ជូនទៅកាន់ គជប នឹងត្រូវបិទត្រឹមថ្ងៃទី២៤ ខែវិច្ឆិកា, ប្រសិនបើចាប់ពីថ្ងៃទី២៥ ខែវិច្ឆិកាទៅ ការចុះចូលនៅតែបន្តដដែល ប៉ុន្តែមិនផ្តល់តួនាទីអ្វីនោះទេ»។
សម្តេចតេជោ ហ៊ុន សែន បានប្រសាសន៍អំពាវនាវឲ្យអតីតមន្រ្តីគណបក្សសង្រ្គោះជាតិ ដែលត្រូវបានតុលាការកំពូលកាត់រំលាយ សូមប្រញាប់ប្រញាល់ចុះចូលជាមួយ គណបក្សប្រជាជនកម្ពុជា ដើម្បីទទួលបាននូវតួនាទីឋានៈអ្វីៗដដែល ព្រោះការកំណត់ពេលវេលាត្រឹមថ្ងៃទី២៤ ខែវិច្ឆិកា នេះ ធ្វើឡើងតាមលក្ខខណ្ឌរបស់ គ.ជ. ប៕
