(ព្រះវិហារ)៖​ នៅថ្ងៃទី១៨ ខែវិច្ឆិកា ឆ្នាំ២០១៧នេះ ស្លាកគណបក្សសង្គ្រោះជាតិ នៅទូទាំងខេត្តព្រះវិហារ ត្រូវបានទម្លាក់ចុះអស់រលីងហើយ សរុបចំនួន៣៥០ស្លាក ខណៈដែលអាជ្ញាធរនិងសមត្ថកិច្ចចម្រុះ បានរុះរើស្លាកសញ្ញា បដា និងពាក្យស្លោកគណបក្សនេះ នៅទីសាធារណៈនានា ជាបន្តបន្ទាប់ទៀត ក្រោយពីតុលាការកំពូល កាត់ទោសរំលាយចោល។

ស្លាកសញ្ញាគណបក្សសង្រ្គោះជាតិ ដែលត្រូវបានទំលាក់ចេញតាមផ្លូវសាធារណ:ចំនួនសរុប ៣៥០ស្លាកក្នុងនោះ៖

១៖ ស្រុកជាំក្សាន្ត ចំនួន២៣
២៖ ស្រុកឆែប ចំនួន៣៧
៣៖ ក្រុងព្រះវិហារ ចំនួន១៣
៤៖ ស្រុកជ័យសែន ចំនួន៦០
៥៖ ស្រុកត្បែងមានជ័យ ចំនួន១៨
៦៖ ស្រុកគូលែន ចំនួន៦៧
៧៖ ស្រុករវៀង ចំនួន៨០
៨៖ ស្រុកសង្គមថ្មី ចំនួន៥២

នៅក្នុងខេត្តព្រះវិហារមិនមានសល់ស្លាកបក្សសង្គ្រោះជាតិដាក់បង្ហាញទៀតទេ ស្លាកដែលរុះរើ និងទំលាក់រួច ត្រូវបានយកមករក្សទុកនៅប៉ុស្តិ៍នគរបាលរដ្ឋបាល
។
សូមជំរាបថា ក្នុងពេលចុះរុះរើ និងទំលាក់ស្លាកសញ្ញាបក្សសង្រ្គោះជាតិ បានការចូលរួមសហការដោយលោក កែវ ស៊ីថា ប្រធានគណបក្សសង្រ្គោះជាតិប្រចាំខេត្តព្រះវិហារផងដែរ និងមិនមានការតវ៉ារំខានណាមួយឡើយ។

ការទម្លាក់ និងរុះរើទម្លាក់ស្លាកនេះ បានធ្វើឡើងបន្ទាប់ពីតុលាការកំពូល បានកាត់ទោសរំលាយគណបក្សសង្គ្រោះជាតិ ហើយក្រសួងមហាផ្ទៃ បានប្រកាសលុបឈ្មោះគណបក្សនេះ ចេញពីបញ្ជីគណបក្សនយោបាយ ព្រមទាំងបង្គាប់ឲ្យអាជ្ញាធរគ្រប់រាជធានីខេត្ត ចុះអនុវត្ដសាលដីកាទម្លាក់ស្លាក, បដា និងពាក្យស្លោកផ្សេងៗ របស់គណបក្សសង្គ្រោះជាតិទូទាំងប្រទេស។

សូមបញ្ជាក់ថា នៅល្ងាចថ្ងៃទី១៦ ខែវិច្ឆិកា ឆ្នាំ២០១៧ តុលាការកំពូលរបស់កម្ពុជា បានប្រកាសសាលដីកាសម្រេចឲ្យរំលាយគណបក្សសង្រ្គោះជាតិ ចាប់ពីថ្ងៃចេញដីកានេះតទៅ ដោយសារតែគណបក្សនេះ បានប្រព្រឹត្តអំពើក្បត់ជាតិជាប្រព័ន្ធឃុបឃិតជាមួយបរទេស ក្នុងគោលដៅផ្តួលរំលំរាជរដ្ឋាភិបាលស្របច្បាប់របស់កម្ពុជា។ ជាមួយគ្នានេះ តុលាការកំពូល ក៏បានប្រកាសហាមឃាត់ដល់មន្រ្តីថ្នាក់ដឹកនាំ គណបក្សសង្រ្គោះជាតិ ចំនួន១១៨នាក់ មិនឲ្យធ្វើនយោបាយ រយៈពេល៥ឆ្នាំផងដែរ។

ក្រោយតុលាការកំពូលចេញដីកានេះ រាជរដ្ឋាភិបាលកម្ពុជា បានអំពាវនាវដល់ប្រជាពលរដ្ឋនៅទូទាំងប្រទេស ឲ្យរក្សាភាពស្ងប់ស្ងៀម ហើយចូលរួមថែរក្សាសន្ដិភាព ស្ថិរភាព និងការអភិវឌ្ឍរបស់ប្រទេស ហើយរាជរដ្ឋាភិបាលកម្ពុជាក៏ប្រកាស ប្ដេជ្ញាធានាដល់លទ្ធិប្រជាធិបតេយ្យសេរីពហុបក្ស របស់កម្ពុជាព្រមទាំងធានាដល់ការបោះឆ្នោត ដែលនឹងធ្វើឡើងជាបន្ដបន្ទាប់នៅឆ្នាំក្រោយនេះ៕