(ភ្នំពេញ)៖ កញ្ញាឯកលំដាប់ពិភពលោក «Miss Global Internatoinal 2017» ដែលទើបតែទទួលបានជយលាភីទាំង៥ រូប ត្រូវបានរោងភាពយន្ត «Prime Cineplex» និងដៃគូសហការ អញ្ជើញឲ្យចូលរួមជួបជាមួយអ្នកគាំទ្រ ​របស់ខ្លួន និងថតរូបទុកជាអនុស្សាវរីយ៍ ​នារសៀលថ្ងៃទី១៨ ខែវិច្ឆិកា ឆ្នាំ២០១៧នេះ នៅរោងភាពយន្ត «Prime Cineplex» ផ្សារទំនើប សុវណ្ណា។

តំណាងរោងភាពយន្ត «Prime Cineplex» បានថ្លែងឲ្យដឹងថា ការអញ្ជើញកញ្ញាឯកលំដាប់ពិភពលោក «Miss Global ​2017» ដែលទទួលបានជយលាភីពីលេខ១ ដល់លេខ៥ ជួបអ្នកគាំទ្ររបស់ខ្លួន នៅពេលនេះ គឺក្នុងគោលបំណង ចង់ឲ្យអតិថិជនរបស់រោងភាពយន្ត «Prime Cineplex» ក៏ដូចជាអ្នកគាំទ្រ ប្រិយមិត្តរបស់ «Miss Global ​2017» មានឱកាសបានថតរូបអនុស្សាវរីយ៍ ជាមួយពួកគាត់ ក្នុងឱកាសដែលកម្ពុជាធ្វើជាម្ចាស់ផ្ទះ នៅក្នុងការប្រកួតលក្ខណៈពិភពលោកនេះ។

ជាមួយនឹងការជួបជុំថតរូប ពីសំណាក់ «Miss Global ​2017» នេះ នៅរោងភាពយន្ត «Prime Cineplex» ក៏មានការដាក់តាំងលក់​ផលិតផល Cosmetic ម៉ាកល្បីៗ ក្នុងតម្លៃពិសេស និងការលេងហ្គេមកំសាន្ត ដើម្បីឈ្នះរង្វាន់ជាច្រើនផងដែរ។

សូមបញ្ជាក់ថា ព្រឹត្តិការណ៍ប្រកួតសម្រស់កញ្ញាឯក លំដាប់ពិភពលោក «Miss Global Internatoinal 2017» ដែលបានប្រព្រឹត្តទៅ នាយប់ថ្ងៃទី១៧ ខែវិច្ឆិកា ឆ្នាំ២០១៧ នៅសាលមហោស្រពកោះពេជ្រ ដែលកម្ពុជាបានទទួលសិទ្ធិធ្វើជាម្ចាស់ផ្ទះរៀបចំកម្មវិធីនេះ បានរកឃើញអ្នកទទួលបានជយលាភី​ ​ដើម្បីគ្រងមកុដ (Miss Global 2017) ប្រចាំឆ្នាំ២០១៧ នេះ។ ក្នុងនោះកញ្ញាឯក​ដែលមានវាសនាខ្ពស់ បានគ្រងតំណែងនេះ គឺបានទៅលើកញ្ញាឯកមកពីប្រទេសប្រេស៊ីល ខណៈលេខ២ បានទៅលើកញ្ញាឯកមកពីប្រទេសប៉ាណាម៉ា, លេខ៣ បានទៅលើកញ្ញាឯកមកពីប្រទេស អាល្លឺម៉ង់, លេខ៤ បានទៅលើកញ្ញាឯកមកពីប្រទេសសូម៉ាលីយ៉ា និងលេខ៥ បានទៅលើកញ្ញាឯកមកពីប្រទេសចិន។

​កញ្ញាឯកទាំងអស់ ទោះបីជាទទួលបានជយលាភី ឬមិនទទួលបានជយលាភី តំណាងទាំង៦០ប្រទេសនេះ នឹងបានពាំនាំ ជួយផ្សព្វផ្សាយ ពីតំបន់ទេសចរណ៍ដ៏សម្បូរបែបរបស់កម្ពុជា ទៅកាន់ពិភពលោកឲ្យបានដឹង ពីសក្តានុពលជាច្រើននៅក្នុងប្រទេសកម្ពុជា ដែលជាប្រទេសមួយ ពោរពេញទៅដោយសម្បត្តិវប្បធម៌ និងធម្មជាតិដ៏ស្រស់បំព្រង៕