(ត្បូងឃ្មុំ)៖ អតីតមេឃុំ ជំទប់ទី១ និងសមាជិកក្រុមប្រឹក្សាឃុំសរុប៥នាក់ របស់ខេត្តត្បូងឃ្មុំ របស់គណបក្សសង្គ្រោះជាតិ ដែលទើបរលាយ បានប្រកាសជាសាធារណៈ ដើរចេញពីបក្សរបស់ខ្លួន ហើយមកសុំរួមរស់ជាមួយ គណបក្សប្រជាជនកម្ពុជា ដោយសារតែរូបគាត់បានឃើញ នូវអំពើក្បត់ជាតិរបស់គណបក្សសង្គ្រោះជាតិ ដែលបម្រើបរទេស។ នេះបើតាមលិខិតប្រកាសចុះចូល ដែលអង្គភាព Fresh News ទទួលបាននៅថ្ងៃទី១៧ ខែវិច្ឆិកា ឆ្នាំ២០១៧នេះ។
អតីតសមាជិកក្រុមប្រឹក្សាឃុំទាំង៥នាក់ ដែលទើបមកចូលរួមជាមួយ គណបក្សប្រជាជនកម្ពុជារួមមាន៖
១៖ លោក ងួន តិច អាយុ៦៧ឆ្នាំ ជាមេឃុំគគីរ ស្រុកមេមត់ ខេត្តត្បូងឃ្មុំ។
២៖ លោក អ៊ុក ឌឿន អាយុ៣៩ឆ្នាំ ជាសមាជិកក្រុមប្រឹក្សាសង្កាត់សួង ក្រុងសួង ខេត្តត្បូងឃ្មុំ។
៣៖ លោក ឆាយ សុគន់ អាយុ៦១ឆ្នាំ ជាជំទប់ទី១ ឃុំគងជ័យ ស្រុកអូររាំងឪ ខេត្តត្បូងឃ្មុំ។
៤៖ លោក យុន ទឹម អាយុ៦០ឆ្នាំ ជាសមាជិកក្រុមប្រឹក្សាស្រុកអូររាំងឪ ខេត្តត្បូងឃ្មុំ។
៥៖ លោក ជ្រា អេងឈុង អាយុ៦៨ឆ្នាំ ជាមេឃុំអំពិលតាពក ស្រុកអូររាំងឪ ខេត្តត្បូងឃ្មុំ។
អតីតសមាជិកបក្សសង្គ្រោះជាតិ បានសរសេក្នុងលិខិតលាឈប់ពីគណបក្សថា ដោយមើលឃើញអំពើក្បត់របស់លោក កឹម សុខា និងគណបក្យសង្រ្គោះជាតិ បានឃុបឃិតជាមួយបរទេស ចង់បំផ្លិចបំផ្លាញប្រទេសជាតិ ទើបលោកសម្រេចចិត្តសុំចូលជា សមាជិកគណបក្យប្រជាជន។
តាមលិខិតដែលអង្គភាព Fresh News ទទួលបានរបស់អតីតមេឃុំ ជំទប់ទី១ សមាជិកក្រុមប្រឹក្សាទាំង៥រូប បានបញ្ជាក់យ៉ាងដូច្នេះថា កាលពីមុននឹកស្មានថា ការស៊ូដំណ្ដើមអំណាចតាមរយៈការបោះឆ្នោត និងតាមរបៀបលទ្ធិ ប្រជាធិបតេយ្យពិតប្រាកដ។ ប៉ុន្ដែក្រោយពីបានឃើញនូវវីដេអូឃ្លឹប និងសកម្មភាពជាក់ស្ដែងពីការធ្វើបដិវត្តន៍ពណ៌ ញុះញង់បំបែកបំបាក់ជាតិខ្មែរ ផ្ដួលរំលំរាជរដ្ឋាភិបាលស្របច្បាប់ ដែលដឹកនាំដោយសម្ដេចតេជោ ហ៊ុន សែន នាយករដ្ឋមន្ដ្រី និងជាប្រធានគណបក្សប្រជាជន។
នៅព្រលប់ថ្ងៃទី១៦ ខែវិច្ឆិកា ឆ្នាំ២០១៧ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន និងជាប្រធានគណបក្សប្រជាជនកម្ពុជា បានអំពាវនាវជាថ្មីម្តងទៀត ចំពោះសមាជិកក្រុមប្រឹក្សាឃុំ សង្កាត់ សមាជិកក្រុមប្រឹក្សាខេត្ត ស្រុក ខណ្ឌ នៅទូទាំងប្រទេសរបស់គណបក្សសង្គ្រោះជាតិ ដែលចង់បន្តបម្រើប្រជាពលរដ្ឋ គឺបងប្អូនមានពេលវេលាច្រើនជាង១សប្តាហ៍ទៀត ដើម្បីមានឱកាសរួមជីវភាពនយោបាយ និងអាចបម្រើប្រជាពលរដ្ឋតទៅទៀត។
ការអំពាវនាវជាថ្មីរបស់សម្តេចតេជោជាលើកទី២នេះ ត្រូវបានសម្តេចអះអាងយ៉ាងច្បាស់ថា គឺមិនមែនជាការទិញដូរនោះឡើយ គឺគណបក្សប្រជាជនកម្ពុជា គ្មានប្រាក់ដើម្បីធ្វើការទិញដូរណាមួយនោះទេ គ្រាប់តែជាការផ្តល់ឱកាសដើម្បីឲ្យបងប្អូនដែលចង់បន្ត បម្រើប្រពលរដ្ឋមានពេលវេលាមកធ្វើកិច្ចការ ដើម្បីបម្រើប្រជាជន និងប្រទេសជាតិប៉ុណ្ណោះ៕
