(ភ្នំពេញ)៖ ក្រសួងវប្បធម៌ និងវិចិត្រសិល្បៈ នឹងរៀបចំប្រកួតប្រជែងមហោស្រពភាពយន្ដជាតិ លើកទី៥ រយៈពេល៥ថ្ងៃ ដើម្បីយកស្នាដៃភាពយន្ដរបស់ម្ចាស់ស្នាដៃផលិតករខ្មែរ ទៅប្រកួតប្រជែង និងលើកកម្ពស់សមត្ថភាព ក្នុងការផលិតស្នាដៃភាពយន្ដ។
លោក គង់ កន្ដារ៉ា អនុរដ្ឋលេខាធិការក្រសួងវប្បធម៌ និងវិចិត្រសិល្បៈ បានថ្លែងថា មហោស្រពភាពយន្ដ ជាព្រឹត្តិការណ៍នៃការប្រមូលផ្ដុំស្នាដៃខ្មែរ ដែលទទួលបានការគាំទ្រពីសំណាក់ មហាជនកន្លងមក យកមកធ្វើការប្រកួតប្រជែងដណ្ដើមជយលាភី និងពាន់រង្វាន់។ នេះជាលើកទី៥ហើយ ដែលក្រសួងវប្បធម៌ និងវិចិត្រសិល្បៈបានរៀបចំព្រឹត្តិការណ៍នេះ។
លោកបានបន្ដទៀតថា ការប្រកួតមហោស្រពនេះ នឹងចាប់ផ្ដើមឡើងរយៈពេល៥ថ្ងៃចាប់ពីថ្ងៃទី០៦ ដល់ថ្ងៃទី១០ ខែធ្នូ ឆ្នាំ២០១៧ នៅសាលសន្និសីទចតុមុខ និងគ្រប់រោងភាពយន្ដទំនើប ក្នុងរាជធានីភ្នំពេញ។
គ្រប់ស្នាដៃទាំងអស់ដែលត្រូវយកមកប្រកួតប្រជែងត្រូវផ្ដោតលើខ្លឹមសារដូចជា៖
១៖ ផ្ដោតទៅលើការអប់រំ និងផ្សព្វផ្សាយចំណេះដឹងអំពីវប្បធម៌ ទំនៀមទំលាប់ ប្រពៃណីជាតិ
២៖ លើកស្ទួយវប្បធម៌សន្ដិភាព និងអហិង្សា
៣៖ ពង្រឹងសាមគ្គីភាព និងឯកភាពជាតិ
លោកអនុដ្ឋលេខាធិការ បានថ្លែងឲ្យដឹងទៀតថា ពាន់រង្វាន់ និងជយលាភីសរុបចំនួន១០ ដែលក្នុងនោះមានតែ១ប៉ុណ្ណោះសម្រាប់ស្នាដៃភាពយន្ដល្អផ្ដាច់គេ និងពានរង្វាន់បុគ្គល៩ផ្សេងទៀត សម្រាប់បុគ្គលជាតិខ្មែរ ដែលមានស្នាដៃល្អឆ្នើម។
លោកបញ្ជាក់ទៀតថា ផលិតកម្មដែលបានយកស្នាដៃភាពយន្ដ មកចូលរួមប្រកួតប្រជែងមាន៩រួមមាន៖ ផលិតកម្មរ៉ក់ , មហាហង្ស, មាតុចក្រ, ចក្រវាឡពេជ្រ, ខ្មែមេគង្គ, កងចក្រភីកឈ័រ, ថោន អ៊ិនធើធេនមេន, ៨០២ អេឌី និងផលិតកម្ម ហ្សី អ៊ីនធើធេនមេន។ ស្នាដៃភាពយន្ដទាំងអស់នឹងឆ្លងកាត់ ការពិនិត្យវាយតម្លៃជា២ដំណាក់កាល ដោយគណៈកម្មការមេប្រយោគ។ ស្នាដៃដែលទទួលបានការជ្រើសរើសចូលក្នុងវគ្គទី២ នឹងយកទៅចាក់បញ្ចាំងតាមរោងភាពយន្ដ។
លោកបានបញ្ជាក់ថា ស្នាដៃភាពយន្ដដែលជាប់ ជយលាភីល្អប្រចាំមហោស្រព នឹងទទួលបានពានរង្វាន់មាស អមជាមួយថវិកាចំនួន៣០លានរៀល។ ចំណែកឯងពានរង្វាន់ឯកទេស សម្រាប់បុគ្គល (ជនជាតិខ្មែរ) ដែលមានស្នាដៃឆ្នើមចំនួន៩រង្វាន់រួមមាន អ្នកនិពន្ធឆ្នើម ទទួលបានពានរង្វាន់មាស អមជាមួយថវិកា, អ្នកដឹកនាំរឿងឆ្នើម ទទួលបានពានរង្វាន់មាស និងថវិកា, អ្នកថតភាពយន្ដឆ្នើម ទទួលបានពានរង្វាន់មាស និងថវិកា, តួសម្ដែងឆ្នើម (បុរស) ទទួលបានពានរង្វាន់មាស និងថវិកា, តួសម្ដែងឆ្នើម (ស្រ្ដី) ទទួលបានពានមាស និងថវិកា អ្នកតុបតែងឆាកឆ្នើម ទទួលបានពានរង្វាន់មាស និងថិវកា អ្នកបច្ចេកទេសពន្លឺឆ្នើម ពានមាសនិងថវិកា អ្នកដំឡើងរូបភាពឆ្នើមទទួលបានពានរង្វាន់មាស និងថវិកា និងអ្នកផ្គុំសំឡេងឆ្នើម ទទួលបានពាន់រង្វាន់មាស និងថិវកា៕
