(កំពង់ចាម)៖ កម្លាំងនគរបាលខេត្តកំពង់ចាម បានបង្ក្រាបជនសង្ស័យ១៨នាក់ ជាបន្ដបន្ទាប់ដែលពាក់ព័ន្ធករណីគ្រឿងញៀន ភូមិស្វាយស្រណោះទី២ ឃុំរកាអា​ ស្រុកកងមាស ដោយកម្លាំងការិយាល័យប្រឆាំងគ្រឿងញៀនខេត្ត សហការជាមួយកម្លាំងអធិការដ្ឋាននគរបាលស្រុកកងមាស ដោយឡែកនៅស្រុកចំការលើ ក៏ឃាត់ខ្លួនបានជនសង្ស័យ៥នាក់ផងដែរ។

ស្នងការនគរបាលខេត្តកំពង់ចាម លោកឧត្តមសេនីយ៍ត្រី ឯម កុសល បានប្រាប់អង្គភាព Fresh News នៅព្រឹកថ្ងៃទី១៦ ខែវិច្ឆិកា ឆ្នាំ២០១៧នេះថា ប្រតិបត្ដិការនេះលោកបានបញ្ជាឲ្យលោកវរសេនីយ៍ត្រី ជីវ សេងរស់ នាយរងការិយាល័យប្រឆាំងគ្រឿងញៀន​ខេត្ត។

លោកឧត្តមសេនីយ៍ស្នងការ បញ្ជាក់ថាក្រោយការស្រាវជ្រាវយ៉ាងយកចិត្តទុកដាក់ កម្លាំងនគរបាលជំនាញឃាត់ខ្លួនបានជនសង្ស័យម្នាក់​ ឈ្មោះ លឹម វិច្ឆិកា​ ភេទស្រី អាយុ៣៧ឆ្នាំ នៅ​ភូមិស្វាយស្រណោះទី២ ឃុំរកាអា​ ស្រុកកងមាស ខេត្តកំពង់ចាម ដោយក្នុងនោះដកហូតបាន ​ម្សៅក្រាមពណ៌ស​ចំនួន​៤៦កញ្ចប់ និងសម្ភារៈមួយចំនួនទៀត។

ក្រោយឃាត់ខ្លួនជនសង្ស័យម្នាក់នេះ និងតាមចម្លើយសារភាពនោះ កម្លាំងជំនាញបន្ដឃាត់ខ្លួនជនសង្ស័យ១៧នាក់ផ្សេងទៀត ​ដោយដកហូតបានទូរស័ព្ទដៃចំនួន០៨គ្រឿង ម៉ូតូចំនួន០៧គ្រឿង ប្រាក់រៀលចំនួន២០០,០០០រៀល។ បច្ចុប្បន្នជនសង្ស័យត្រូវបានកម្លាំងកំពុងរៀបចំឯកសារ ដើម្បីចាត់ការបន្ដតាមច្បាប់។

យ៉ាងណាមិញ សម្រាប់ប្រតិបត្ដិការនៅស្រុកចំការលើវិញ ​នៅក្នុង​បន្ទប់ផ្ទះសំណាក់យីហោ ផ្កាឈូក ស្ថិតនៅភូមិថ្នល់បែកកើត ឃុំស្វាយទាប ដោយ​លោកវរសេនីយ៍ទោ ខេង ស្រេង អធិការនគរបាលស្រុកចំការលើ និងធ្វើការ​​ឃាត់ខ្លួន​បានជនសង្ស័យចំនួន​០៥​នាក់ រួមជាមួយថ្នាំញៀនមួយកញ្ចប់ និងសម្ភារៈមួយចំនួនទៀតផងដែរ៕