(ភ្នំពេញ)៖ ថ្ងៃតុលាការកំពូលបើកសវនាការកាត់ទោសរំលាយគណបក្សសង្គ្រោះជាតិ តាមពាក្យបណ្ដឹងថាបានប្រព្រឹត្តិអំពើក្បត់ជាតិនោះ ពោលគឺនៅសល់តែពីរថ្ងៃទៀតតែប៉ុណ្ណោះ នៅថ្ងៃទី១៦ ខែវិច្ឆិកា ឆ្នាំ២០១៧ ហើយស្របពេលនេះដែរ ក៏មានដំណឹងលេចឮថា ក្រុមគណបក្សសង្គ្រោះជាតិ បានកកូរកកាយសកម្មជនរបស់ខ្លួនមកប្រឆាំងចំពោះការកាត់ក្ដីនេះ។
នៅព្រឹកថ្ងៃទី១៥ ខែវិច្ឆិកា ឆ្នាំ២០១៧នេះ តាមរយៈអង្គភាពព័ត៌មាន Fresh News លោក គឹម សន្ដិភាព អ្នកនាំពាក្យក្រសួងយុត្តិធម៌ បានចេញមកពន្យល់ថា ច្បាប់បានផ្តល់អំណាច ដល់តុលាការកំពូលទទួលពិនិត្យ និងសម្រេចលើបណ្តឹងពាក់ព័ន្ធនឹងការរំលាយគណបក្សនយោបាយដែលល្មើសច្បាប់ ហើយសេចក្តីសម្រេចរបស់តុលាការកំពូល ពាក់ព័ន្ធនឹងបណ្តឹងខាងលើនេះ ជាសេចក្តីសម្រេចស្ថាពរបិទការតវ៉ា។
លោក គឹម សន្ដិភាព បានបញ្ជាក់យ៉ាងដូច្នេះថា «ប្រជាពលរដ្ឋខ្មែរគ្រប់រូបមានកាតព្វកិច្ចគោរពរដ្ឋធម្មនុញ្ញ និងគោរពច្បាប់ ដូចមានកំណត់ក្នុងមាត្រា៤៩ រដ្ឋធម្មនុញ្ញនៃកម្ពុជា ហេតុនេះភាគីទាំងអស់ត្រូវគោរពអនុវត្តនូវសាលដីកាស្ថាពររបស់តុលាការកំពូល។ ការមិនអនុវត្តសេចក្តីសម្រេចរបស់តុលាការ គឺជាបទល្មើសព្រហ្មទណ្ឌ ដែលមានកំណត់ក្នុងក្រមព្រហ្មទណ្ឌនៃព្រះរាជាណាចក្រកម្ពុជា»។
យ៉ាងណាមិញ ពាក់ព័ន្ធព័ត៌មានរឿងកកូរកកាយសកម្មជនរបស់ខ្លួនមកតវ៉ានេះ លោក គឹម សន្ដិភាពធ្លាប់បានបញ្ជាក់ផងដែរថា ការប្រមូលផ្តុំកម្លាំងមហាជន ដើម្បីដាក់សម្ពាធលើស្ថាប័នតុលាការ គឺជាទង្វើល្មើសច្បាប់ ហើយអាជ្ញាធរសាធារណៈមានកាតព្វកិច្ចអនុវត្តនូវវិធានការចាំបាច់ផ្សេងៗ។
អ្នកនាំពាក្យរូបនេះ បានថ្លែងថា «ការប្រមូលផ្តុំកម្លាំងមហាជន ដើម្បីដាក់សម្ពាធលើស្ថាប័នតុលាការ គឺជាទង្វើល្មើសច្បាប់។ ហេតុនេះអាជ្ញាធរសាធារណៈដែលមានកាតព្វកិច្ច តាមផ្លូវច្បាប់ក្នុងការបង្កា ទប់ស្កាត់ និងបង្ក្រាបអំពើល្មើសក្នុងសង្គម មានភារកិច្ចអនុវត្តវិធានការចាំបាច់នានា ដើម្បីទប់ស្កាត់នូវអំពើល្មើសខាងលើនេះ!»។
នៅថ្ងៃទី១៣ ខែវិច្ឆិកាម្សិលមិញនេះ ក្រុមមេធាវីតំណាងក្រសួងមហាផ្ទៃ បានទៅដល់តុលាការកំពូល ដើម្បីដាក់ភស្តុតាងសំខាន់ៗ៣បន្ថែមទៀត ពាក់ព័ន្ធសំណុំរឿងប្តឹងសុំរំលាយគណបក្សសង្គ្រោះជាតិ។ ភស្តុតាងទាំងបីបន្ថែមនោះក៏មានបញ្ជីឈ្មោះថ្នាក់ដឹកនាំ គណបក្សសង្គ្រោះជាតិ ដែលនឹងត្រូវហាមឃាត់សិទ្ធិធ្វើនយោបាយ៥ឆ្នាំ។
កាលពីថ្ងៃទី០៦ ខែតុលា ឆ្នាំ២០១៧ ក្រុមមេធាវី៥រូបរបស់ក្រសួងមហាផ្ទៃ បានដាក់ពាក្យបណ្តឹងចូលទៅកាន់តុលាការកំពូល ដើម្បីប្តឹងស្នើសុំរំលាយគណបក្សសង្គ្រោះជាតិ ដោយយោងតាមពាក្យបណ្តឹងរបស់គណបក្សហ្វ៊ុនស៊ិនប៉ិនរបស់សម្តេចក្រុមព្រះ និងគណបក្សយុវជនកម្ពុជា របស់លោក ពេជ្រ ស្រស់៕
